1 Samuel 2
2
Anne ti subur Alona
1Anne ti subur Alona, ti dala:
An nga ni le furîd’a kurun yam Ma didina.
An hle wa yan akulo yam djivi mamba mi lata.
An ndak á san ad’u man suma djangûna.
An nga ni le furîd’a, kayam Alona mi ndjununu.
2Ma didina tu ni Ma bei tchod’a,
Alo meina tu nahinad’a,
Alo ma ding ma d’igi mam na na nga d’i.
3Agi zulugi zla d’a hawa d’a subur tad’a d’i,
ar zla d’a asa’ata ndavunagi d’i,
Kayam Ma didina nAlo ma wahlena petna;
mam mi ma nga mi nga sunda hi sumid’a petna.
4Grang suma dur ayîna, agu yeû mazid’a kus seyo,
wani suma amangeîna a fad’enga á durâ.
5Suma a hopma a nga hal sunda á fe te mazina,
wani suma meid’a nga d’i tchazina
va ndolozi nga ki sunda d’i, a nga tuk taziya.
Atcha d’a gendreged’a nga d’i vut yat kid’iziya,
wani d’a vut grona ablaud’id’a, ti ka bei vuta.
6Ma didina nga mi tchi sana, nga mi mbud’um arid’a,
nga mi im azuleyo, nga mi hulongôm akulo mi.
7Ma didina nga mi mbut sana houd’a, nga mi mbut sana ma beged’a mi;
nga mi hulong sana yam kä, nga mi hle sana yam akulo mi.
8Suma hou suma a nga kä aduk gugumina nga mi hlazi yazi akulo,
suma kid’ak suma a arazi kä woi yam djimgilîna,
nga mi tinizi ata yima hud’a
zlapa ki suma kal teglesâ.
Andagad’a pet ni d’a hi Ma didinid’a;
ni mam ba, mi tinit akulo yam graka.
9Mba mi ngom suma a nga ge yazi kä avoroma,
wani suma bei hum vuna ba na, a mba ba woi kur nduvunda,
kayam sana mi ndak á kus ayîna kad’eng mamba tata d’i.
10Ma didin ma sä akulona nga mi ngop mam suma djangûna;
a nga zlak avoromu,
kayam mam mi sama ka sariyad’a yam suma yam andagad’a petna.
Nga mi had’eng mamba mamul mama,
nga mi i ad’enga hamul ma mam manama avogovok mi#: Gol Luc 1.46-55.
11Bugol ahle ndazina, Elkana mi hulong avo hatam Rama, wani goroma Samuel mi ar sä avo Silo á le sunda mi Ma didina abo ma ngat buzuna Eli.
Eli groma ni suma zlazi nga d’uo na
12Eli groma ni suma zlazi nga d’uo na, a we nga Ma didina d’i. 13Wana ni vama suma ngat buzu ndazina a nga lum ki sumina: Nala, ata yima sana mi he vama ngat buzunina, azong mazina, mi hut go mi hle hliu ma a nga yum akuna ki kiyor ma siyam hindi ma aboma. 14Mi nik kiyor máma aduk hliu ma nga mi yi aku kur duguyonina, hliu ma lara ma kiyorâ mi hlumï na, mam im mi ma ngat buzuna. Ni na ba, Eli groma a nga le ki Israel-lâ pet suma a nga mba á kud’or Alona avo Silo-na.
15Avok ka bei azi ngal mbulâ hi vama tchuma tua d’a pî, azong mazina, mi mba ata sama mi mba ki vama ngat buzunina, mi dum ala: Hanï hliu ma an i ni sorom mi ma ngat buzunina. Mam nga min hliu ma yid’a abong ngi; mi min ni hliu ma arina hol.
16Wani le sa máma mi dum ala: Ar a ngal mbulâ woi ngal tua ba, ang hle ma ang minima tua ni, azong máma mi hulong dum ala: Nga na d’i! Ang hanï ka tchetchem! Le d’uo ni, an hlum kad’enga! 17Ni hina ba, Eli groma a nga le tcho d’a ngola avok Ma didina, kayam azi nga b’lak he d’a hawa d’a a nga mbamzid’a.
Samuel mi nga avo Silo
18Wani Samuel nga mi le sunda avok Ma didina, mi nga ki baru d’a ngat buzuna atamu. 19Biza d’a lara pî Samuel asum nga d’i dubum baru d’a gurei d’a atamba ata yima azi ki ndjuvut a nga i kahle suma ngat buzuna avo Silo avun bizad’ina. 20Eli mi b’e vunam yam Elkana azi kamamba, mi de mi Elkana ala: Ar Ma didina mi hang gro suma dingâ katcha ndata á vrak balum gor ma ndat ti humzina. Ata yi máma azi hulong avo hataziya.
21Ma didina mi djib’er yam Anne, ti vut gro andjofâ kua hindi, gro aropma mbà mi. Wani Samuel nga mi wul avok Ma didina.
Eli mi ngop groma
22Eli mi mbut mamara ngola. Ata yima mi hum ala groma a nga le tchod’a hina hina ki Israel-lâ, a nga bur karop suma a nga le sunda avun zlub’ud’a hAlonid’ina mi na, 23mi dazi ala: Ni zla me ba, an humut hina djeî ge? Ni kayam me ba, agi lagi hina ge? Suma pet a nga dan yam tit magi d’a tcho d’a agi nga tid’ita. 24Grona, agi aragi zla ndata woyo. Ahle suma an nga ni humuzi kagi avun sumina nga djivi d’i. Agi ni zud’ugi suma hi Ma didinina á tchila yam gat mamba. 25Le sana mi le ndrama tchod’a ni, Alona mi ndak á kazi ir zla ndata. Wani le sana mi le tchod’a mi Ma didina ni, ni nge ndak á kazi ir zla ndata ge? Wani azi nga hum zlad’a habuzid’a d’i, kayam Ma didina mi min wa tam á tchazi woyo.
26Wani Samuel nga mi wula, nga mi le Ma didina tam djivid’a, nga mi le suma tazi djivid’a mi.
Alona mi gat Eli azi ki groma
27Ma djok vun Alona tu mi mba mi fe Eli, mi dum ala: Gola! Ma didina mi dala: Ang we, ni an ba ni tak tan mabuyong ngolo kid’a Faron nga mi lazi magomba avo Ezipte-d’a d’uo zu? 28Aduk andjaf Israel-lâ pet, an man abung ngolo Aron á mbut man ma ngal ahle suma ngat buzuna, á he he d’a hawad’a yam yi man ma ngal ahle suma ngat buzuna, á ngal dubang ma his djivid’ina, á tchuk baru d’a efod’a#2.28 baru d’a efod’a: Nala, barud’a hi ma ngat buzunid’a ni d’a a djop Alona ki sed’eta. avoronu. An hahle suma ngat buzuna pet Israel-lâ a nga hazina mandjavamu.
29Ni kayam me ba, agi nga mired’egi vama ngat buzuna ki he d’a hawa d’a an he vuna kat á handji kur gong man nda kud’orid’a ge? Eli, ni kayam me ba, ang he grongâ ngola kalan an nge? Ni kayam me ba, agi nga d’orogi tagi kahle suma djivi suma kal man suma Israel-lâ a nga mbandji á handji he d’a hawad’ina ge?
30Kayam ndata, an Ma didina Alona hi Israel-lîna an nga ni dangû: An hle vunan adjeu mi suma habungâ ki sum mangâ ala: Agi mba kagagi ni man suma ngat buzuna gak didin. Wani ki tchetchemba, an nga ni dang ngei mbak ala: Nga na d’uo d’a! An nga ni he ngola mi suma a nga han ngolina; wani suma a nga golon isâ, an mba ni golozi is mi. 31Gola! Yina ar wa go, ata yi máma an mba ni tchang grongâ woi kandjavang tala sa mi mbut mamar adigazi d’uo d’a. 32Ang mba we sama hurung vum mbuo na kaka kur gong man nda kud’ora. Ata yi máma Israel-lâ a mba kak kahle suma djivina, wani a mba fe sama mamar aduk andjavang ngi. 33An mba ni ar sa mang tu ata yi man ma ngal ahle suma ngat buzuna, mba mi tchang irang mogod’a ki gola, mba mi b’lagang hurung mi. Wani mang suma dingâ pet a mba bo ni kad’eng taziya.
34Fata grong suma mbàna Hofni azi ki Fines djak a mba bo kur bur ma tunid’a, ang mba we ni vama taka ala zla d’a an data mba d’i ndaga. 35Bugola, an mba ni tin ma ngat buzu ma d’engzeng ma mba mi lahlena kur min mandina. An mba ni hum grona á kak suma ngat buzuna burâ ki burâ avok amul ma an manama. 36Sama mba mi ar ad’u andjavangâ, mba mi grif kä avok ma ngat buzu máma á fe bege d’a hapa nde, d’oze avu ma mbruka. Mam mba mi dum ala: An nga ni tchenengû, ang han sunda gen suma ngat buzuna nde, kayam an fe ki tena.
Currently Selected:
1 Samuel 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.