Lobh 28
28
Pɔlʋ ‑kʋ Matɩlekpoa 'kʋ
1Na, daa ‑a 'wlʋ 'lɛ 'kwɩa neen na, ‑a ya 'nu lebhe 'lekpoa ma la 'lɛ Matɩ. 2Ncɛlɩa ‑a ŋenia 'lɛ 'kʋ na, ma ya ‑anyɩ 'nanɩ kla ‑gbɔɔn. Ma ya ‑kosu 'kadie ‑zla 'nyɩ ma yʋʋ ‑anyɩa 'fɩan cɩ la. Sa 'nyu ya bhlalɩɛ bhɔ, 'nyɩ wɔtlɩ cia na. 3Pɔlʋ yaa ‑gbalɩ 'kʋbhli 'nyɩ ɔ yɩɩ ‑kosua nɩkplaan 'pa. Na, ‑kosuwoowoa ya gba 'nyɩ kpacla ya ‑gbalɩa nɩkplaan 'wlʋlʋ 'nyɩ a ya Pɔlʋ 'la sɔa 'ciin mɛ. 4Daa 'lekpoa 'kʋ 'la ncɛlɩa 'lɩ 'lɛ lebhe tlɛa ‑ɛ belea Pɔlʋ 'la sɔa 'ciin na, ma 'claclalɩa lebhe: «Nclɔɔ ‑naa cɩ ‑zaagbʋsa ncaabhlanyɔ 'plɩ. 'Lɩka, ɔ 'ta 'nyiin 'kulu. ‑Ma 'kʋnylugolulɩɛa ‑ɩ 'wlʋlʋ 'lɛ Laagɔ wlɩɩn na cɩ 'ka gba, ɔ 'ka 'ku.» 5‑Ma, Pɔlʋ ya tlɛa gbɔtɔ 'nyɩ ɛ ya ‑kosua nɩkplaan bhlili, ‑ma ɔ 'ta kalɔ bhlogbɩɩ 'lɩ. 6Na, ncɛlɩ ‑naa yaa gugu lebhe Pɔlʋ cɩ 'kaa 'ghlɩ ‑aana ɔ 'ka jɛjɛlɩ, ɔ 'kaa bhli ɩya ɔ 'kaa 'ku. Na, ma ya 'ciinbɩɔ ‑aan 'nyɩ ma 'lɩ 'lɛ lebhe lʋʋ bhlogbɩɩ 'taa Pɔlʋ ŋeni na, ma ya ne kwlacala 'nyɩ ma ya 'cla lebhe: «Nclɔɔ ‑naa cɩ sɛ ‑zlee 'plɩ!»
7Na, ‑dɩklea, ‑a ‑kʋa 'lɛ dɩpɩa 'lɛkpoa 'kʋ na, duu ‑naa toa ma laa 'lɛ Publiyusu na ‑kaa 'yɛpɩ gbazɩ ɔla ‑dʋdʋ. Na, nclɔɔ ‑naa ya ‑anyɩ ɔ 'bhisleen famʋ 'nyɩ ɔ ya ‑anyɩ 'nanɩ kla ‑aan clɩɩ ‑mɔta. 8Na, Publiyusu to 'taa ‑ja 'nyɩ ɔ pʋa. Wɔtlɩ ɩya nɩkpaanje bhlaa 'mɔɔ 'lɛ. Pɔlʋ yɔɔ kopekan mʋ. Ɔ ya Laagɔ bhibhie, ɔ yɔɔ 'nyɩ, ɔ yɔɔ sɩ 'wlugbɛ 'nyɩ ɔ ya jabha. 9Ɩmɩ ‑naa 'plɩ 'lɛ na, 'lɛkpoa 'kʋ 'la guzenyaa 'fɩan ya Pɔlʋ 'bhlɩ ci 'nyɩ ɔ ya maa jabha. 10Na, ncɛlɩ ‑naa ya ‑anyɩ 'klʋ 'nyɩ anɩ ‑naa 'la gbʋ. Na, ɩla leen, ‑a bhɔsʋa 'lɛ le ‑a kaa mʋ na, ma ya ‑anyɩ ‑lɩɩ ‑bhutukpa 'nyɩ le ‑a kaa famʋ.
Pɔlʋ ya Matɩlekpoa 'kʋ 'wlʋ 'nyɩ ɔ ya Wlɔmʋ mʋ
11Na, Wɔtlɩ 'kadiea 'la gbʋ na, gɔlʋ ‑kʋa 'lɛkpoa 'kʋ. Ʋ ‑glɩa Ejibhitibhlɩa 'kʋ 'la 'dua ma la 'lɛ Alɛzandlii na 'la gɔlʋ, 'nyɩ mala ‑zliia ma la 'lɛ Kasʋtɔlʋ ɩya Polusu#28.11 Kasʋtɔlʋ ɩya Polusu ‑glɩa ’ŋlɩkalɩzlii. Ɩ ‑glɩa daplɩ, ’nyɩ ɩ lɩa ’lɛ ’nyɩkʋtaangɔlɩa ’klʋ. 'la 'kwlɩa mɛa 'mʋʋ 'lɛ cɩ. 12Na, ‑a ya mʋ ‑aan 'nyɩ ‑a ya Sisiliibhlɩa 'kʋ 'la 'dua ma la Silakuzu na ŋeni. 'Nyɩ, ‑a ya 'lɛ dɩpɩa clɩɩ ‑mɔta pʋlʋ. 13A ya dɩpɩa 'wlʋ, a ya mʋ 'nyɩ a ya 'dua ma la 'lɛ Ghlezio na ŋeni. Na, ‑zeli ze 'lɛ na, ‑pupolua ʋ 'wlʋlʋa 'lɛ gozɔn gbazɩa na yaa pulɩɛ bhɔ. Ɩ ya gba na, ‑a ya clɩɩ ‑mɔsɔ 'ma 'nyɩ ‑a ya 'lɛ 'nyigboa ma la 'lɛ Puzɔlʋ na, 'pɛ. 14‑A ya duu ‑naa nɩkplaan bholiecɩ ŋeni. Maa ‑naa ya ‑anyɩ macɩ cɩ lalɩ 'nyɩ ‑a ya maa cɩ nyamaclɩɩ bhlo li. Na, 'lɩka ‑sa, ‑a 'plɩlɩ 'lɛ 'nyi 'kʋtaan ‑aan 'nyɩ ‑a ya 'lɛ Wlɔmʋdua 'kʋ mʋ. 15Daa, bholiecɩa ‑ɔ ‑kʋa 'lɛ duu ‑naa nɩkplaan na 'nu 'lɛ ‑ala wɔlɩ na, ma ya ‑anyɩ ‑diklia ma la 'lɛ Apiyusu 'la ‑adabhlaa ɩya nyalida ‑mɔtaa na ‑bɛlɩkaan ci. Na, Pɔlʋ 'lɩ 'lɛ maa na, ɔ ya Laagɔ bhɔlʋ 'nyɩ 'tɛtɩ ya 'mɔɔ 'kʋ ci.
Pɔlʋ ‑kʋ Wlɔmʋdua nɩkplaan
16Na, ‑a ŋeni 'lɛ Wlɔmʋ na, ma ya Pɔlʋ ‑jioli 'nyɩ le ɔ kalɩ ɔla 'wlu 'la ‑palʋ. 'Nyɩ, ma yɔɔ 'sojanyɔ 'nyɩ le ɔ 'kɔɔ ‑bɛ. 17Clɩɩ ‑mɔta 'plɩ 'lɛ na, Pɔlʋ ya Zifʋnyaa* tocɩa ɔ 'bhisleen la. Daa ma 'wlalɩ 'lɛ 'wlu na, ɔ ya maa 'cla lebhe: «Bholiecɩnyɩ, n 'ta ka ‑a 'bhlɩnyaa 'la ‑ngasi bhlogbɩɩ tʋ ‑aana n 'ta ka ‑a tokadɔcɩa 'la ‑jlɩmaa 'dɛ ‑sa. ‑Ma sɛɛ ‑tɛɛ ɩ ‑kʋ 'nyɩ ma yaan 'lɛ Zolizalɛmʋdua nɩkplaan 'kʋ bhli 'nyɩ ma yaan 'lɛ Wlɔmʋnyaa wlɩɩn zʋ. 18Ma ‑plaan 'lɛ 'tɩtɩ na, maa ‑naa ya wabha lebhe ma cɩa ‑amʋa 'cintalɩ, sa ma 'lɩ 'taa wɔlɩa 'titia 'la gbʋa n ya 'kwɩ ‑fataa 'lɛ na. 19‑Ma Zifʋnyaa 'ta 'lɛ sɛɛ 'kʋ ŋonu na, ɩmɩ gba 'lɛ 'nyɩ n ya 'lɛ 'clalɩ le ma laan Sezalɩ ‑deliin. 'Bhlɩmɔɔn, n 'taa ncɩ 'wluun ‑zʋɔ lebhe n 'ka n 'bhlɩnyaa ‑tobhu ‑slo. 20Na, 'lɩka wɔlɩ ‑naa 'la gbʋ, dɛ n 'clalɩ 'lɛ le n 'ka anyɩ 'ciinlɩ ɩya ‑a ka nyɩtɛ. Sa, ɔmɔa Izlayɛlɩnyaa* 'tɛlɩ 'lɛ pɔlɛ 'kʋ na 'la gbʋ, dɛ n ‑kʋ 'lɛ ‑abhluakɩ ‑naa nɩkplaan.» 21Zifʋnyaa yɔɔ neenŋonu lebhe: «‑A 'ta ka ‑azla ‑afluwa bhlogbɩɩ 'lɩ, a 'ka Zudeebhlɩa 'kʋ 'wlʋlʋ ‑mɔɔ ‑naa gbʋ. 'Nyɩ ‑a bholiecɩa nɩkplaan, bhlogbɩɩ 'ta ka ‑wɔlʋ ci ɩya ɔ 'ka ‑anyɩ ‑naa wɔlɩ ‑aana ‑naa wɔɔnyinyi bhlogbɩɩ solu. 22‑Ma, ‑anyɩ, ‑a ‑wa lebhe ‑mɔ 'titi ‑n nyɩtɛ, n solu ‑anyɩ ɩmɩa ‑n gugu 'lɛ na ɩya ‑a ka 'nu. Sa, ‑a ‑ci lebhe daa ‑tɛtɛa, ncɛlɩ nyɩtɛ ‑naa ‑kande ‑naa 'la wɔɔnyinyi na.» 23Na, ma ‑yɔɔsɔ yaa clɩɩ zʋ. Clɩɩ ‑naa ŋeni 'lɛ na, ma yɔɔ 'ciinlɩkan ci ‑bhutukpa ɔ 'bhisleen. Ɔla wɔɔnyɩtua nɩkplaan, Pɔlʋ ya maa Laagɔ 'la ‑kwleliea 'la cɩa wɔlɩ solu. Ɔ ya Moyizi 'la ‑jlɩmaa 'kʋ bhɔlʋ 'nyɩ ɔ ya Laagɔnekʋnyɩtɛnyaa 'la ‑afluwia 'kʋ ŋeni le ma 'ka sɛ Zozii 'la cɩa wɔlɩa ɔ nyɩtɛa 'lɛ na ‑nʋawlɛ la. Wɔɔnyɩtʋ ‑naa bhɔ 'lɛ ‑zʋkpa na, 'ylʋva ‑tɛɛ ʋ ko 'lɛ 'wlu. 24Na, maa nɩkplaan ‑anʋa ya wɔlɩa ɔ nyɩtɛa 'lɛ na 'ma 'nyɩ ‑anʋa bhlo 'tɩɩ 'lɛ ‑nʋawlɛ la. 25Ma 'ta 'lɛ neennununu 'nyɩ ma 'clalɩ 'lɛ ‑gugwie na, Pɔlʋ ya maa 'cla lebhe: «Ɩ ‑glɩ ‑nʋawlɛ ‑zaagbʋsa, ɩmɩa ‑Kplɔkplɔ ‑Wugoa* 'plɩlɩa 'lɛ Laagɔnekʋnyɩtɛnyɔ* Izayii 'kʋ 'nyɩ ʋ claa 'lɛ a tokadɔcɩa lebhe: 26Mʋ ‑n ŋeni 'lɔlʋ ‑naa ɩya ‑n soluu lebhe:
A cɩ 'nyukwliin po ‑aan, 'a cɩ 'ta 'nu.
A cɩ kope ‑aan, 'a cɩ 'ta salɩ.
27 Sa ncɛlɩ ‑naa 'la pɔlɩa ya titlili na.
Ma ya 'nyukwliin tlibhalɩ,
'Nyɩ ma ya mala 'cia kpaslɩlɩ,
le ma 'la kɩɩ nɩkplaan salɩlɩ,
ma 'la ka mala 'nyukwlia nɩkplaan 'nunu,
ma 'la ka wɔlɩ pɔlɛcɩfalɩ
ɩya ma 'la ka Laagɔ 'klʋtla,
'Nyɩ n cɩa maa jabha ‑ma!»
28Pɔlʋ ya ‑awlɛ maa 'cla lebhe: «Maa ‑ɔ 'ta 'lɛ Zifʋnya ‑glɩ na, maa Laagɔ ‑la 'lɛ gbʋʋnsalɩɛa 'la Dɩnanɩa*. Maa, ma cɩ 'ka 'nyukwliin po.» [29]#28.29 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «Pɔlʋ nyɩtɛ 'lɛ wɔlɩ ‑naa 'nyɩ ɔ ‑bhle 'lɛ na, Zifʋnyaa ya 'kʋbho 'nyɩ ma ya mʋ. ‑Ma, wɔɔtʋtʋɛ ya maa sidiin bhlili. Nɩkplaanŋatɩɛ ‑naa 'ta Lobhulobhunyaa 'la nʋnʋgbɩa 'la ‑afluwaa nɩkplaan ‑kʋ.» 30Na, Pɔlʋ ya liowli ‑mɔsɔ ‑totobhuo ‑palʋa ɔmɔ 'titi plʋa 'lɛ dlu na ‑zɔn lili. Ɔ klaa maa ‑tɛtɛa ‑ɔ cia 'mɔɔ 'lɛ 'bhlɩ na. 31Ɔ solua maa laagɔ 'la ‑kwleliea 'la cɩa wɔlɩ. 'Nyɩ, ɔ caa 'lɛ maa ‑Kwlenyɔ Zozi Klisi 'la cɩa wɔlɩ pɔɔtɛtɛ nɩkplaan ɩya pɔlɛ bhloon.
Currently Selected:
Lobh 28: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.