Lobh 27
27
Fɛsɩtusu ya Pɔlʋ Wlɔmʋ fa
1Na, daa goonvlaa ma laa 'lɛ Fɛsɩtusu 'cla 'lɛ lebhe ‑a ‑cɩ kaa 'bhlɩa ma laa 'lɛ Italii na 'kʋ mʋ na, ma ya Pɔlʋ ɩya ‑palʋʋnpapanya ‑zlʋsaasa 'sojaa 'la ‑gwlɩɩngbito bhlo wlɩɩn zʋ: 'Sojanyɔ ‑naa, ma laa 'mɔɔ Zuliusu 'nyɩ ɔ ‑glɩa 'bhlɩa 'la ‑kwletoa 'la tavʋkandea ma laa 'lɛ Ogusuta na 'la nɩkplaan nclɔɔ. 2Na, ‑a ya Adlamitidua 'kʋ 'la 'gɔkadie bhlo, ‑ʋ mʋnʋa 'lɛ Aziibhlɩa 'kʋ 'la 'nyigboa 'kʋ ‑gbazɩ na, nɩkplaan 'tɔ 'nyɩ ‑a ya 'lɛ mʋ. Masedʋanɩbhlɩa 'kʋ 'la nclɔɔ bhlo, ma laa 'lɛ Asitakɩ, 'nyɩ ‑ɔ 'wlʋlʋa 'lɛ Tesalonikidua 'kʋ na, ‑kʋmʋa anyɩ sidiin. 3Na, ‑zeli ze 'lɛ na, ‑a yaa Sidɔɔn ŋeni 'nyɩ ‑a yaa 'pɛ. 'Nyɩ nclɔɔa ma laa 'lɛ Zuliusu na, saa ɔla gbɩ nanɩa 'lɛ Pɔlʋ 'la gbazɔ na, ɔ yɔɔ ‑jioli 'nyɩ le ɔ mʋ ɩya ɔ 'kaa ɔ 'nagwɩɛcɩ 'ciinlɩ ɩya ma 'kɔɔ 'nanɩ kla. 4Na, ‑a ya Siplʋlekpoa gozɔn gbazɩ 'manɩ, sa ‑pupolua cilia anyɩ gbatlɩ na. 5'Nyɩ ‑a ya 'lɛ Silisii ɩya Panfiliibhlɩa 'kʋ 'la gea bhli ‑aan 'nyɩ ‑a ya 'lɛ Lisiibhlɩa 'kʋ 'la dua ma la 'lɛ Milaa na 'pɛ. 6'Soja 'la ‑gwlɩɩngbitoa ya dɩpɩa gɔlʋ bhlo ‑ʋ 'wlʋlʋa 'lɛ Ejibhitibhlɩa 'kʋ 'la 'dua ma laa 'lɛ Alɛzandlii 'nyɩ ‑ʋ mʋa 'lɛ Italiibhlɩa 'kʋ na 'lɩ. Ɔ ya gba 'nyɩ ‑a ya gɔlʋ ‑naa nɩkplaan 'tɔ. 7‑A ya clɩɩ ‑zlʋsaasa 'nyikʋtaan li. 'Nyɩ 'kwlɩbhɩɛ nɩkplaan, ‑a ŋeni 'lɛ 'dua ma laa Senidi 'la 'kʋtakpaan. ‑Ma, saa ‑pupolua ŋonu 'taa 'lɛ ‑ylɛylɛ le ‑a 'plɩa na, ‑a ya 'lɛkpoa ma laa 'lɛ Klɛtɩ na gbazɩ 'dɩlɩ, ‑a ya Salomonee ‑dʋdʋa gbazɩ mʋnʋ. 8‑A 'sɩslɩlɩ 'lɛ 'nyɩ ‑a 'plɩ 'lɛ dɩpɩa cɩ na, ‑a ya Laseedua cɩ, daa ma laa 'lɛ «'Nyigbunanɩa» na ŋeni.
9Na, clɩɩ ‑zlʋsaasa yaa 'plɩ. 'Nyɩ gɔlʋa 'la 'lulɩɛ yaanɩa gbʋ 'kʋ ‑gbɛ, sa ‑zelizlodaa 'titi la clɩɩa yaa tooto 'plɩ na. Na, Pɔlʋ ya wabha lebhe ɔ 'kaa maa wɔlɩ pɔlɛcɩfalɩ 'nyɩ ɔ ya maa 'cla lebhe: 10«Ncɛlɩnyɩ, n lɩ lebhe lowluunmʋlɩɛa cɩ 'ka dlɛdlʋ ‑lamʋ. Gɔlʋa ɩya lɩɩa ‑ɩ ‑kʋʋ 'lɛ nɩkplaan na cɩ 'ka nyumo. 'Nyɩ, ‑a 'ta kpaan kla na, ‑anyɩ 'titi ‑ma, ‑a cɩ 'ta 'pʋ.» 11‑Ma, gɔlʋa 'la 'klʋlɩnyɔa ɩya nclɔɔa ‑ɔ ‑kʋa 'lɛ gɔlʋa to 'la 'jeen na ‑tɛɛ 'la pɔɔtɛtɛ 'sojaa 'la ‑gwlɩɩngbitoa ‑kaa 'lɛ 'nyɩ ɔ zia Pɔlʋ 'la wɔlɩa ɔ nyɩtɛa 'lɛ na 'kʋ. 12Na, wɔtlɩ cia 'lɛ ‑gbɔɔn 'dɛ 'la clɩɩa nɩkplaan, 'nyɩ gɔlʋa cɩ 'taa 'lɛ 'nyigbo ‑naa 'kʋ 'pɛda mino na, maa nɩkplaan, ‑bhutukpa ya wabha lebhe ‑a 'sɩslɩlɩ ɩya ‑a kaa Klɛtɩbhlɩa 'kʋ 'la 'nyigboa ma la 'lɛ Fenisi na kla ɩya ‑a kaa dɩpɩa kʋ ‑aan ɩya wɔtlɩcidaa 'kaa 'plɩ. 'Nyigbo ‑naa 'la gozɔan ɩya ala 'wlua 'kʋ ‑tlaa gbazɩa 'ylʋbhuoa pʋlʋ 'lɛ na 'klʋ.
‑Bubo ya gea 'kʋtaan 'ma
13Na, ‑pupolu ya gozɔn ‑gbazɩa 'wlʋlʋ, ʋ 'taa nɩkplaan 'tɛ. 'Nyɩ ma ya gugu lebhe ma cɩa mino, ma cɩa Fenisi ŋeni. Na, ma ya gɔlʋa 'la 'ligewua 'nyiin ‑sa, 'nyɩ ma ya 'plɩ 'nyɩ ma ya mʋ. Ma ‑kʋa Klɛtɩbhlɩa tutoluda. 14'Nyɩ 'kplookʋ, ‑bubokadie ya 'lekpoa 'kʋ 'ma. A ya 'yɛpɩ 'wlʋlʋ 'nyɩ a ya maa 'kʋ kwlili. ‑Bubo ‑naa, ama ma la 'lɛ Elakiyɔɔn, ɩ sa ‑zɔn lebhe ‑pupolua ‑ʋ 'wlʋlʋ 'lɛ gbazɩa 'ylʋbhuoa bholu 'lɛ 'kʋ 'nyɩ ʋ pu 'lɛ 'wlu 'kʋ ɩya gozɔn na. 15A ya gɔlʋa famʋlɩɛ bhɔ, 'nyɩ ʋ mino 'taa 'lɛ ‑pupolua neen 'plɩlɩlɩɛ na, ‑a yʋʋ ne te 'nyɩ famʋa ‑anyɩ. 16‑A ya 'lekpuco bhlo, ma la 'lɛ Kodaa na 'la gozɔan 'plɩlɩ, a dɩa ‑pupolua ‑gugwieen, ɩ ya gba na, ‑a ya mino 'nyɩ ‑a ya 'gɔcoa ‑ʋ ‑gʋalɩɔa 'lɛ 'gɔkadiea cɩ na, 'kʋbhli. 17Ma yʋʋ jli 'nyɩ ma yʋʋ 'gɔkadiea nɩkplaan ‑a ‑kʋa 'lɛ na zʋ. 'Nyɩ gɔlʋa nɩkplaan 'la lobholinʋnyaa ya 'bhli 'ma, ma ya gɔlʋa gʋa. Na, ‑buboa 'la kaa 'lɛ maa Libiibhlɩa 'kʋ 'la 'dua ma la 'lɛ Slitɩ na 'la 'nyɩgboa 'kʋ 'palɩ, ma ya gɔlʋa 'la lokua kwlee, ma ya macɩ 'cintalɩ 'nyɩ ‑buboa famʋa maa. 18‑Zeli ze 'lɛ na, saa ‑buboa ci 'taa 'lɛ ‑dʋdʋ 'kʋ ‑ylɛylɛ na 'nyɩ saa a 'dɩdɔa 'lɛ ‑anyɩ na, gɔlʋa nɩkplaan 'la lobholinʋnyaa ya bhɛbhɛlɩɩa ‑anɩ geen 'pa. 19'Nyɩ, daa ‑mɔta ‑zelia ze 'lɛ na, gɔlʋa 'la lobholinʋnyaa 'titi ya gɔlʋa 'la lɩɩ ‑anɩ geen 'pa. 20Clɩɩ ‑bhutukpa ‑gbaaglɩɩn, 'ylʋbhuo ‑aana ‑zɔlʋ 'ta ‑zɔn 'wlʋ. ‑Ma ‑buboa ‑tɛɛ cicilia 'lɛ 'kʋ. Na, ‑a 'taanɩa pɔɔtɛtɛ ‑ylɛylɛ ‑ka lebhe ‑a cɩa 'pʋ.
21Ɩ nʋnɩa clɩɩ ‑zlʋsaasa, nyalɩtʋ ‑ylɛylɛ ‑naa 'bhla 'taanɩa ‑anyɩ. Na, Pɔlʋ ya 'kʋbho, ɔ ya ncɛlɩa sidiin 'nylugo 'nyɩ ɔ ya maa 'cla lebhe: «N'nagwɛcɩnyɩ, a ‑kaa ‑amʋa 'nyukwliin po na, ‑a cɩ 'taa Klɛtɩ 'wlʋ 'nyɩ wɔlɩ ‑naa ‑tɛtɛa cɩ 'taa ‑anyɩ ŋeni ɩya lɩɩ ‑naa ‑tɛtɛa 'kaa -gbɩɔ. 22‑Ma, saa 'fɩan ɩ ‑ka ‑kʋkʋlʋ, ‑pɔtɔnʋ, n cla anyɩ lebhe: A zʋ 'tɛtɩ! Nclɔɔ bhlogbɩɩ cɩ 'ta 'ku, ‑ma gɔlʋa ‑tɛɛ 'nyɩ ‑a cɩ 'tanɩ kalɩ. 23N cla anyɩ sɛɛ ‑ofi lebhe dobheni ‑naa bhlogbɩɩ Laagɔa n ‑kʋlʋ 'lɛ 'nyɩ n lobho 'lɛ na 'la 'bhlaandlee* bhlo yaan futolu. 24'Nyɩ ɔ yaan 'cla lebhe: Pɔlʋ, ŋanɔ 'la 'bhlɔɔ! Ɩ ‑fata lebhe ‑n 'plɩlɩ Sezalɩ ‑deliin. Na, ‑mɔɔ ‑naa gbʋ na, Laagɔ cɩ 'ka gba ɩya maa ‑tɛtɛa, -n ‑ya maasɔ ‑kʋ 'lɛ gɔlʋa nɩkplaan na, bhlogbɩɩ cɩ 'ta 'ku! 25Na, n 'nagwɛcɩnyɩ, a zʋ 'tɛtɩ, ‑ma n 'tɛlɩ 'na Laagɔa pɔlɛ 'kʋ: Ɩmɩa ɔ soluun 'lɛ na, ɩ cɩ 'ka 'kʋglalɩ. 26'Lekpo bhlo 'kʋ, ‑buboa cɩ 'ka 'lɛ ‑anyɩ famʋ.»
27Na, ‑a yanɩa nyamaclɩɩ ‑mɔsɔ gea 'kʋtaan li. ‑Buboa mʋ 'taa leen ‑ylɛylɛ, ‑ma ka a fafalɩa 'lɛ ‑anyɩ gea ma la 'lɛ Meditelaneea na 'kʋ ‑tɛɛ. Na, 'dɛ 'la clɩɩa bhlogbɩɩ 'kʋ 'la dɩdɩnandɩ, dobhesa, gɔlʋa nɩkplaan 'la lobholinʋnyaa yaa gugu lebhe ‑a yaa 'nyonukpo 'kʋ 'salɩ. 28Na, ma ya 'bhlu 'nyiin palɩ 'nyɩ ma ya 'lɩ lebhe ɩla nɩkplaan ‑tlʋlɔa cɩa ‑sa 'mɛtlɩ ‑gwlʋʋ ɩya 'kʋgba ‑ngbɔɔsɔ ŋeni. Ma ya ‑awlɛ 'pɛpɛ 'kʋklʋʋn mʋ 'nyɩ ma ya 'lɩ lebhe ɩ nʋnɩa 'mɛtlɩ ‑gwlʋʋ ɩya ‑ngbaata. 29Ŋanɔ yaa maa pla, sa ma 'taa daa ma cɩa 'lɛ cɔkʋ 'kʋ 'salɩ na ‑ci. Na, ɩmɩ ‑naa 'la gbʋ na, ma ya 'ligewucɩ ‑nmɔɔna gɔlʋa 'la leean 'nyiin palɩ le ma 'kaa 'dɛ kʋ ‑aan ɩya ‑zeli 'kaa ze. 30‑Ma gɔlʋa nɩkplaan 'la lobholinʋnyaa 'matɩa 'lɛ lebhe ma 'kaa gɔlʋa nɩkplaan 'wlʋ ɩya ma 'kaa 'gu na, ma ya 'gɔcoa gea 'kʋtaan kwlee 'nyɩ ma ya nʋ le saa ma mʋa 'lɛ 'ligewua gɔlʋa 'kʋklʋʋn 'nyiin 'pakaan na. 31Na, Pɔlʋ ya 'soja ‑gwlɩɩ ‑ngbi toa ɩya 'sojaa 'cla lebhe: «Gbazɩ ncɛlɩ ‑naa 'ta gɔlʋa nɩkplaan cɩɩ sa kʋ na, -anyɩa 'fɩan -a cɩ mlɔ.» 32'Sojaa ya 'gɔcoa 'la 'bhlia 'dɩ 'nyɩ ma yʋʋ 'cintalɩ, ʋ ya mʋ.
33Na, ma ‑kʋa 'lɛ zezezelia ‑bɛda na, Pɔlʋ ya ncɛlɩa ‑tɛtɛa ‑ɔ ‑kʋa 'lɛ gɔlʋa nɩkplaan na la le ma kaa li 'nyɩ ɔ ya maa 'cla lebhe: «Ɩ nʋnɩ ‑yaka nyamaclɩɩ ‑mɔsɔ, a ‑bɛ 'lɛ lebhe ‑buboa ci ‑dʋdʋ 'kʋ 'nyɩ a 'ta ka ‑azla 'lɛ ‑lʋʋ bhlogbɩɩ li. 34Na, n cla anyɩ lebhe a li, sa ɩ ‑fata lebhe a 'tɩtɔlʋ ala jabhʋa 'kʋ na. ‑Awlɛ wɔlɩ ‑ylɛylɛ cɩ 'ta anyɩa nɩkplaan nclɔɔ bhlogbɩɩ ŋeni 'nyɩ ala 'wlɩɩ 'la nyacie bhlogbɩɩ 'ta mlɔ.» 35Pɔlʋ nyɩtɛ 'lɛ wɔlɩ ‑naa na, ɔ ya 'flawo 'ma, ɔ ya Laagɔ bhɔlʋ ncɛlɩa 'fɩan 'ci 'kʋ, ɔ yʋʋ poli 'nyɩ ɔ ya lilie bhɔ. 36Na, 'tɛtɩ ya maa 'fɩan 'kʋ ci 'nyɩ maa ‑ma, ma ya li. 37Ncɛlɩa 'fɩan ‑ɔ ‑kʋa 'lɛ gɔlʋa nɩkplaan na, ‑a ‑glɩa ncaagwlɩɩ 'kʋgba ɩya ncɛlɩ ‑gwlɩɩ -mɔsɔ ɩya 'kʋgba ‑ngbʋflʋ. 38Na, daa ‑anyɩa 'fɩan, ‑a li 'lɛ 'nyɩ ‑a lo 'lɛ na, ‑a ya 'bleebaagɩcɩa ‑ɩ ‑kʋa 'lɛ gɔlʋa nɩkplaan na 'nyiin 'pa ɩya gɔlʋa 'kaa 'kʋwɔlɔɔn 'wlʋ.
Nclɔɔ bhlogbɩɩ 'ta 'ku
39Na, ‑zeli ze 'lɛ na, gɔlʋa nɩkplaan 'la lobholinʋnyaa 'ta ‑dʋdʋa cibhlili. ‑Ma, ma ‑jlɛa 'nyisɔ ɩya 'nyigbo bhlo 'kʋ. Na, ma yaa wabha lebhe ɩ ‑kaa ‑kʋ lebhe ma cɩa mino na, ma 'kaa gɔlʋa 'susuo ɩya ma 'kaa 'mʋʋ 'dɛ fa. 40Ɩla gbʋ na, ma yaa 'ligewucɩa ‑blulu, ma yɩɩ gea nɩkplaan te. 'Kplookʋ, ma ya gɔlʋa 'la gʋkɔlɛa 'la 'bhlia 'cintalɩ, ma ya gɔlʋa 'la 'kʋklʋʋn lokwia ‑gblaa. 'Nyɩ ma ya 'lɛ 'nyigboa gbazɩ mʋnʋ. 41‑Ma, gɔlʋa ya 'nyonukpo 'kʋ 'salɩ, ‑gegaagbɩ ‑mɔsɔ ‑gbaaglɩɩn 'nyɩ ʋ ya dɩpɩa ‑tolu. Ʋla 'mɛnɛa ya 'nyonua nɩkplaan 'sli 'nyɩ saa ‑gegaagbɩa 'sɛpɛlɩa 'lɛ ʋla leean na ɩya gba na, ka ʋ nyumoa 'lɛ ʋ mʋ 'lɛ. 42Na, 'sojaa ya wabha lebhe ma 'kaa ‑palʋʋnpapanyaa 'bhla, ɩya bhlogbɩɩ 'la kaa 'nyiin bhlili ɩya ɔ 'la kaa 'gu. 43‑Ma 'sojaa 'la ‑gwlɩɩngbitoa ‑waa 'lɛ lebhe ɔ 'kaa Pɔlʋ 'kʋtɩtɔlʋ na, ɔ ya 'sojaa tie le ma 'la nʋa ɩmɩa ma bhɔsʋa 'lɛ na. Na, ɔ ya maa ‑ɔ ‑cia 'lɛ ylʋsa na 'kʋkpɛ le ma bhlili 'nyiin ‑bɛɛ ɩya ma mʋ 'kike 'kʋ. 44Ɩya maa ‑ɔ ‑toa 'lɛ na, ma 'kaa kpliipɛlɩ ‑aana gɔlʋa 'la 'pɛlɩklia 'kʋ 'plɩlɩ ɩya ma 'kaa 'tɔ. Na, 'lɩka ‑sa ɩ 'plɩ 'lɛ, dɛ nclɔɔ bhlogbɩɩ 'ta 'lɛ 'ku.
Currently Selected:
Lobh 27: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.