1 Tes 5
5
1Bholiecɩnyɩ, ɩ ‑glɩ 'lɛ daa ɩmɩ ‑naa cɩ 'ka 'lɛ ŋeni ɩya clɩɩa 'kʋ ɩ cɩ 'ka 'lɛ ŋeni na, a 'matɩ 'tanɩ lebhe ma zie anyɩ ɩla gbʋ. 2Sa anyɩ 'titi, a ‑ci sɛɛ wɩaan lebhe ka ‑Kwlenyɔ 'la clɩɩa cɩ 'ka 'lɛ ‑atangblɩsa 'plɩ le saa 'winyɔ ci 'lɛ dobhesa na. 3Daa ncɛlɩ cɩ 'ka 'lɛ 'cla lebhe: «Pupue ‑kʋ daa ‑tɛtɛa, wɔlɩ ‑ylɛylɛ cɩ 'tanɩ ‑anyɩ ŋeni» na, dɛ 'kwlɩbhɩɛ 'kadie cɩ 'ka 'lɛ maa ‑ataangblɩsa 'wlubhlili le saa valʋ kla 'lɛ nɩkpaankalɩŋlɔ na. 'Nyɩ ma cɩ 'tɛɛ 'wlʋkpalɩɛ mino ‑ylɛylɛ. 4‑Ma, anyɩ, bholiecɩnyɩ, a 'ta 'tutuun ‑kʋ ɩya clɩɩ ‑naa 'ka anyɩ ‑zɔnvu le 'winyɔ 'bhisa. 5Sa anyɩa 'fɩan ‑tɛtɛa, lelie 'la ncɛlɩ a ‑glɩ 'lɛ, zezezeli 'la ncɛlɩ a ‑glɩ 'lɛ. ‑A 'ta dobhe 'la ncɛlɩ ‑glɩ naa, ‑a 'ta 'tutuun 'la ncɛlɩ ‑glɩ. 6Na, ‑a 'la ŋɔmʋa le, maa ‑anʋa ‑ɔ 'ta 'lɛ Laagɔ ‑ci na 'bhisa, ‑ma ‑a gblɩbhalɩ ɩya ‑a falɩ acɩ pɔlɛcɩ. 7Sa maa ‑ɔ ŋɔmʋ 'lɛ na, dobhe ma ŋɔmʋ 'lɛ. 'Nyɩ maa ‑ɔ tɩa 'lɛ macɩ nʋ na, dobhe ma tɩʋ 'lɛ macɩ. 8‑Ma ‑anyɩa, ‑ɔ ‑glɩ 'lɛ zezezeli 'la ncɛlɩ na, ɩ ‑fata lebhe ‑a falɩ acɩ pɔlɛcɩ. Pɔɔtɛtɛ ɩya ‑walʋ 'plɩ -ala mlakujanpa ɩya gbʋʋnsalɩɛ 'la pɔlɛkʋtɛlɔa 'plɩ -ala tavʋkpoonkpo. 9Sa Laagɔ 'ta ‑anyɩ desla lebhe ɔ 'ka -anyɩ ɔla dɔgbɛa 'kʋ ‑salɩ, ‑ma ka ɔ la 'lɛ ‑anyɩ le, ‑a ka ‑ala ‑Kwlenyɔ Zozi Klisi 'la 'ŋlɩa nɩkplaan gbʋʋnsalɩɛ 'lɩ. 10Klisi ya ‑ala gbʋ 'ku ɩya ka ‑a ‑ka ‑kʋo ‑aana ka ‑a ‑ka 'kuo, ɔ 'ka gba ɩya ‑a ‑yɔɔsɔ 'ka jabhʋa nɩkplaan kʋ. 11Na, a zʋzʋlʋ 'tɛtɩɩn, saa a nʋa 'lɛ tooto na, ɩya nclɔɔ nclɔɔ 'ka 'tɛtɩ kalɩ.
Bhɩalɩwɔlɩ ɩya ‑ayopalɩɛ
12Bholiecɩnyɩ, ‑a 'cla anyɩ lebhe a zʋ maa ‑Kwlenyɔa 'nyɩ 'lɛ anyɩ 'nyɩ ‑ɔ ‑kʋ 'lɛ anyɩ sidiin le, ‑ɔ ka anyɩ kpa ɩya ‑ɔ ka anyɩ wɔlɩ ca na. 13A kalɩ mala wɔɔgugwie 'nanɛ ɩya mala ‑walʋ, mala lobholia 'la gbʋ. Pupue kʋ anyɩ ‑gbaaglɩɩn.
14Bholiecɩnyɩ, a -sa ‑babanyaa 'bɩ, a zʋ maa 'nyɛkɛ 'kɔtɔɔ 'lɛ na pɔlɛɛn, a klalɩ maa ‑ɔ 'taan 'lɛ 'tɛ na ɩya a sla pɔlɛ sa ɩya a 'nyɩ ncɛlɩa 'fɩan. 15A zʋlʋ pɔlɛ 'kʋ ɩya a 'la 'maa wɔɔnyinyi, a 'la ‑plʋa wɔɔnyinyi dlu. ‑Ma, a 'matɩ clɩɩa 'fɩan le a 'ka 'nanɩ nʋnʋnʋ ɩya a 'ka ncɛlɩa 'fɩan 'nanɩ nʋ.
16A kʋ clɩɩa 'fɩan pɔlɛkʋmɛnɔɔn, 17a bhibhie clɩɩa 'fɩan, 18ɩya saa ‑tɛtɛa ɩ cɩ 'ka 'lɛ kʋkʋlʋ na, a bhɔlʋ Laagɔ. 'Lɩka ɩmɩa Laagɔ 'matɩlɩ 'lɛ anyɩ wlɩɩn aya Zozi Klisi 'la namʋa nɩkplaan na.
19A 'la 'dɩa 'Wugoa ‑gugwieen. 20A 'la 'maa Laagɔnekʋnyɩtɛnyaa* 'la wɔɔnyɩtʋa ɩya a 'la lia ‑zangʋa. 21‑Ma a gbazlɩlɩ ‑tɛtɛa 'fɩan nɩkplaan ɩya a 'ma ɩmɩa ‑ɩ nanɩ 'lɛ na 22ɩya a tlʋbhalɩ wɔɔnyinyia ‑tɛtɛa cɩ da.
23'Naa Laagɔa, ‑ɔ nyɩ 'lɛ pupue na, ɔmɔ 'titi ‑kplɔ anyɩ 'kplookʋ. 'Naa ɔ 'lɩ ala 'wugoa, ala pɔlɛa ɩya ala 'nyɛkɛa 'klʋ ɩya clɩɩa 'kʋa -ala ‑Kwlenyɔ Zozi Klisi cɩ 'ka 'lɛ ci na, ma 'la 'ka anyɩ 'gesalɩda 'lɩ. 24Ɔmɔa, ‑ɔ la 'lɛ ‑anyɩ na, ɔ cɩ 'ka ɩmɩ ‑naa nʋ, ɔ 'ka anyɩ 'nyɩ, ɔ cɩ 'kɩɩ nʋ.
25Bholiecɩnyɩ, a bhibhiemʋ ‑ala da. 26A ŋʋŋɔnʋ bholiecɩa 'fɩan ‑kpacɩ cɩ ɩya a 'pa maa ‑ayo le bholiecɩ.
27‑Kwlenyɔ 'la 'ŋlɩa nɩkplaan, n sla anyɩ 'wlu, a zɛlɩlɩ ‑afluwaa ‑naa bholiecɩa 'fɩan 'ci 'kʋ.
28'Naa ‑ala ‑Kwlenyɔ Zozi Klisi 'la 'nyupalɩɛa kʋ anyɩ 'kʋ.
Currently Selected:
1 Tes 5: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.