1 Tes 4
4
Nʋnʋgbɩa ‑ɩ ‑ka 'lɛ Laagɔ 'tʋ na
1Na bholiecɩnyɩ, ‑a ya anyɩ saa a cɩ 'ka 'lɛ namʋnamʋnʋ ɩya a 'ka 'lɛ Laagɔ 'tʋ ‑pla na, ca. 'Nyɩ sɛɛ a namʋ 'lɛ. ‑Ma ‑pɔtɔnʋ ‑a sla anyɩ 'wlʋ 'nyɩ ‑a clalɩ anyɩ ‑Kwlenyɔ Zozii 'la 'ŋlɩa nɩkplaan lebhe: A nʋ ‑awlɛ ɩya a zi 'dɛ 'kʋ. 2Sa, a ‑ci ɩmɩa ‑a ca 'lɛ anyɩ ‑Kwlɛnyɔ Zozii 'la 'ŋlɩa nɩkplaan na.
3Laagɔ 'la pɔɔsaa ‑glɩ 'lɛ lebhe a ‑klpɔ ɩya a tlʋbhalɩ ‑badaaglulilie cɩda. 4'Naa, nclɔɔclɔɔ cibhlili saa ma 'cɩcɩlɩ 'ŋlɔ 'nyɩ ɩ pla 'lɛ Laagɔ 'tʋ na. Ɩ 'plɩlɩ ‑kplɔlɩɛɛn ɩya zʋlɩɛɛn. 5A la kalɩa ŋlʋfʋ le maa ‑ɔ 'ta 'lɛ Laagɔ ‑ci na. 6Wɔlɩ ‑naa nɩkplaan, nclɔɔ bhlogbɩɩ 'la nʋa ɔ bholi wɔɔnyinyi cɩ ɩya ɔ 'la tʋa ɔla ‑ngasi. ‑A yɩɩ anyɩ tooto solu 'nyɩ ‑a solu ‑awlɩɩ 'lɛ anyɩ lebhe Laagɔ cɩ 'ka maa ‑ɔ nʋ 'lɛ -saa wɔɔnyinyia na, gbaylɩsa. 7Sa Laagɔ 'ta ‑anyɩ la le ‑a ka ‑badaaglu li, ‑ma ka ɔ la 'lɛ ‑anyɩ le a ka ‑kplɔ. 8Na, nclɔɔ 'ta wɔlɩ ‑naa 'ma na, ‑n 'ta nclɔɔ 'la niwɔlɩ ‑ɔ 'ta 'lɛ 'kwlaanpa, ‑ma Laagɔa ‑ɔ 'nyɩ 'lɛ ‑anyɩ ɔla ‑Kplɔkplɔ ‑Wugoa* na, ɔmɔ, ɔ pa 'lɛ 'kwlaan.
9-Ɩ ‑glɩ 'lɛ anyɩ bholiecɩ ‑gbaaglɩɩn 'la ‑walʋa na, 'a 'matɩ 'ta lebhe ma zie ‑awlɛ anyɩ ɩla gbʋ. Anyɩ 'titi, Laagɔ ya anyɩ saa a cɩ 'ka 'lɛ wabhawabhalɩ na, ca. 10'Nyɩ ‑walʋ ‑naa, ʋmʋ a ‑ka 'lɛ a bholɩecɩa 'fɩan, ‑ɔ ‑kʋ 'lɛ Masedʋanɩbhlɩa ‑tɛtɛa 'kʋ na, 'la gbazɔ. Bholiecɩnyɩ, ‑a zʋ ‑awlɛ anyɩ kɔɔn 'nyɩ ‑a 'clalɩ anyɩ lebhe a nʋ ɩya a zi 'dɛ 'kʋ. 11A 'sɩslɩlɩ ɩya pupue kʋ aya ncɛlɩa 'fɩan ‑gbaaglɩɩn. A 'la bhlilia wɔlɩa 'ta 'lɛ anɩ ‑glɩ na, nɩkplaan ‑ma a 'ma ala wlɩa ɩya a nʋ lobholi, saa ‑a ca 'lɛ anyɩ na 12ɩya maa ‑ɔ 'ta 'lɛ Laagɔ ‑ci na, 'ka ala zʋlɩɛ kalɩ ɩya a la ka nclɔɔ bhlogbɩɩ nekʋ ‑bɛ.
'Ku 'la 'kwɩɩnkʋbhue
13Bholiecɩnyɩ, ‑ɩ ‑glɩ 'lɛ 'ku 'la cɩa wɔlɩa na, ‑a 'ta ‑wa lebhe a kʋ 'nyukwlibhuun ɩya a 'la ka 'ciinkalɔɔn kʋ le, maa ‑ɔ 'ta 'lɛ pɔlɛkʋtɛlɔ ‑ka na, 'bhisa. 14Ɩ ‑ka ‑kʋ lebhe a la ‑nʋawlɛ lebhe Zozii ya 'ku 'nyɩ ɔ ya 'kwɩɩnkʋbho na, 'sɛ ‑tɛɛ bhlogbɩɩ, ‑a la ‑nʋawlɛ lebhe maa ‑ɔ ka 'lɛ Zozii 'la pɔɔtɛtɛ 'nyɩ ‑ɔ 'ku 'lɛ na, Laagɔ cɩ 'ka ma ‑yɔɔsɔ 'kwɩɩnkubho.
15'Lɩka ɩmɩa ‑a ‑ka 'lɛ ɩya ‑a ka anyɩ solu 'nyɩ ‑ɩ ‑glɩ 'lɛ ‑Kwlenyɔa 'la niwɔlɩ na: Daa ‑Kwlenyɔa cɩ 'ka 'lɛ ci na, -anyɩa ‑ɔ -cɩ ka ka 'lɛ kʋ na, -a cɩ 'tɔɔ cɩ ‑bɛɛ ŋenili 'fɩɔn ɩya maa ‑ɔ 'ku 'lɛ na, 'kɔɔ cɩ ŋeni. 16Ma cɩ 'ka ‑blɩɩzɔn bhlo 'nu, bhlaandleekpasa* bhlo 'la ‑blɩɩzɔn ɩya daa Laagɔ 'la lɛglɛa 'ka 'lɛ gba na, ‑Kwlenyɔa 'titi 'ka ‑laagɔɔn 'wlʋ, ɔ 'ka kwli: Na maa ‑ɔ laa 'lɛ Zozi Klisi ‑nʋawlɛ 'nyɩ ‑ɔ 'ku 'lɛ na, cɩ 'ka 'kwɩɩnkʋbho ‑bɛɛ 17ɩya ‑anyɩa ‑ɔ cɩ ka ka 'lɛ kʋ 'dɛ 'la daa na, ‑aya maasɔ 'ka nebhlo 'kubholu, ‑a ka 'nyukplia 'kʋ 'plɩlɩ ɩya ‑a ka ‑Kwlenyɔa 'bɩɩnmʋnʋ. Ɩya ‑a ya ‑Kwlenyɔa 'kanɩ clɩɩa 'fɩan sakʋ. 18Na, a 'ma cacawɔlɩ ‑naa ɩya a zʋzʋlʋ pɔlɛɛn.
Currently Selected:
1 Tes 4: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.