DANIELE 1
1
Pina ya Azaria mwa lyangalilo
1 #
Dan 3.23
Ba zamaya-zamaya mwahal'a malimi a mulilo ba nze ba tumisa ni ku lumbeka Mulena Mulimu.
2Azaria a yema mwahal'a mulilo, mi a kala ku lapela, a li,
3“Lwa ku kuteka ni ku ku lumbeka,
Mulena, Mulimu wa kukw'a luna.
Libizo la hao li lumbekwe kuya kuile.
4Mwa linto kaufela z'o ezize,
u li ezize ka ku luka.
Lisepiso za hao kamita li petahala
ka swanelo.
Mwa likezo za hao kaufela ha ku na
s'o siya, mi mikwa ya hao i lukile.
5U atuzi hande mwa likozi kamukana
z'o tiselize luna ni Jerusalema,
muleneñi wa bo kukw'a luna o kenile.
U lu ezize cwalo bakeñisa libi za luna,
mi ki mo ku lukela
kuli ne ku ka ezwa cwalo.
6“Ee, ki niti lu fosize
mi lu ezize mulatu ka ku ku hana.
Ee, fo lu fosize hahulu.
7Ha lu si ka utwa litaelo za Mulao,
ha lu si ka li mamela,
mi ha lu si ka eza mo ne lu bulelezwi,
kuli ne lu ka pila hande.
8Ee, likozi kaufela z'o lu tiselize,
ni linto kamukana z'o ezize ku luna,
u li ezize ka swanelo luli.
9U lu beile mwa mazoho a lila za luna,
batu ba ba sa lati milao,
ba ba sa lati Mulimu ka ku fitisisa,
ba mulena ya maswe,
ili ya maswe ka ku feleleza
mwa lifasi kaufela.
10Kacenu le se lu palelwa nihaiba
ku bulela,
bakeñisa maswabi ni ku sa kuteka
ko ku atezi batu ba hao
ba ba ku sebeleza.
11“Oh Mulena, u si ke wa lu hana
kuya kuile
bakeñisa libizo la hao.
U si ke wa tuhela bulikani bwa hao.
12U si ke wa zwisa lilato la hao
ku luna,
bakeñisa mulikan'a hao Abrahama,
Isaka mutanga wa hao,
ni Jakobo wa hao ya kenile.
13N'o sepisize kuli baikulu ba bona
ba ka ba ba bañata hahulu,
ba ba sa konwi ku balwa sina linaleli
za kwahalimu,
ni ku ata sina mushabati wa liwate.
14Mulena, luna ki luna ba banyinyani
ka ku fitisisa mwa macaba kaufela,
mi cwale lu nyefulwa hahulu
mwa lifasi kamukana
bakeñisa libi za luna.
15“Ka nako ye ha lu na muzamaisi,
ha lu na mupolofita,
mi ha lu na mwan'a mulena.
Ha lu na litabelo za ku cisa
ni litabelo ze ñwi.
Ha lu na insense,
mi ha ku na sibaka se lu ta ku beelanga
lico za kutulo ya luna ya pili,
kuli u lu late.
16Kono u amuhele buinyazo bwa lipilu
za luna ni mioya ye ikokobeza.
17Li amuhelwe sina litabelo za lipoho
za lingu, ni za likomu,
sina likiti za lingu ze nunile.
Cwale u lumelele sitabelo sa luna
kacenu,
mi i be tato ya hao
kuli lu ku latelele ka lipilu
za luna kaufela,
kakuli ba ba ku sepile
ha ba na ku swabiswa.
18Mi cwale lwa ku latelela
ka lipilu za luna kaufela,
lu nze lu ku saba mi lu sepile musa
wa hao.
19U si ke wa lu swabisa.
U lu eze ka mukekecima
kakuli wena kasibili
u lukile mi u na ni musa.
20U lu fe tukuluho ye swanela likezo
za hao ze komokisa,
mi libizo la hao li ku fumanela kanya,
Mulena.
21Ba ba kataza batanga ba hao,
ba lyanganiswe,
ba swabiswe hahulu,
ni ku amuhiwa maata a bona,
mi tata ya bona i feliswe.
22Ba zibe kuli wena
ki wena Mulimu ni Mulena,
ya lumbwa mwa lifasi kaufela.”
23Ka yona nako yeo batanga ba mulena kaufela, ba ba ne ba latezi micaha mwa mulilo, ne ba nze ba u koteza ka mafula a tala, makwati a likota, ni macacani. 24Wa tuka ku fitela malimi a mulilo a ya hahulu mwahalimu ku likana ni mapeka a mashumi a mabeli ka a ketalizoho. 25Ha se u tuka hahulu, wa cisa ni ku bulaya Makalade kaufela ba ba ne ba yemi kwatukw'a ona. 26Kono lingeloi la Mulena la kena mwa mulilo o mutuna wo, la ya ku Azaria ni balikani ba hae. La sutiseza mulilo mwamulaho. 27#Tob 5.4 La ba kenyeza moya o bata. Moya wo ne u bata hande hahulu sina ku bata kwa puka, ili kuli mane mulilo n'o si ka ba cisa, kamba ku ba tiseza kozi kamba butuku.
Pina ya micaha ba balalu
28Cwale mwa bulalu bwa bona ba kala ku opela ka manzwi a, a ku tumisa ni ku lumbeka Mulimu, ba nze ba li mwa mulilo, ba li,
29“U lumbekwe Mulena Mulimu
wa bo kukw'a luna.
U babazwe ni ku tumiswa hahulu
kuya kuile!
Ku lumbekwe libizo la hao
le li kenile hahulu.
Li babazwe ni ku tumiswa hahulu
kuya kuile!
30U lumbekwe mwa Tempele ya kanya
ya hao ye kenile.
U babazwe ni ku tumiswa hahulu
kuya kuile!
31U lumbekwe fa lubona lwa mubuso
wa hao.
U babazwe ni ku tumiswa hahulu
kuya kuile!
32U lumbekwe wena ya fahalimw'a lubona
lwa hao mwahal'a likerubimi,
ya talima ye mwatasi kaufela.
U babazwe ni ku tumiswa hahulu
kuya kuile!
33U lumbekwe wena ya mwa mbyumbyulu
ya mahalimu.
U babazwe ni ku tumiswa hahulu
kuya kuile!
34“Mina linto kamukana z'a ezize
Mulena Mulimu,
mu lumbeke Mulena,
mi mu ise kanya ni litumbo ku yena
kuya kuile!
35Mangeloi a Mulena kaufela,
mu lumbeke Mulena,
mi mu ise kanya ni litumbo ku
yena kuya kuile.
36Mahalimu a mwahalimu,
mu lumbeke Mulena,
mi mu ise kanya ni litumbo ku yena
kuya kuile.
37Mezi a fahalimw'a lihalimu,
mu lumbeke Mulena, mi mu ise kanya
ni litumbo ku yena kuya kuile.
38Maata a makuta a lihalimu kaufela,
mu lumbeke Mulena,
mi mu ise kanya ni litumbo ku yena
kuya kuile.
39Lizazi ni kweli, mu lumbeke Mulena,
mi mu ise kanya ni litumbo ku yena
kuya kuile.
40Linaleli za lihalimu, mu lumbeke
Mulena,
mi mu ise kanya ni litumbo ku yena
kuya kuile.
41“Lufafazani ni puka kaufela,
mu lumbeke Mulena,
mi mu ise kanya ni litumbo ku yena
kuya kuile.
42Mioya ye fuka kaufela,
mu lumbeke Mulena,
mu ise kanya ni litumbo ku yena
kuya kuile.
43Mulilo ni mufutumala,
mu lumbeke Mulena,
mi mu ise kanya ni litumbo ku yena
kuya kuile.
44Ku bata hahulu ni ku cisa hahulu,
mu lumbeke Mulena,
mi mu ise kanya ni litumbo ku yena
kuya kuile.
45Puka ni mbundu, mu lumbeke Mulena,
mi mu ise kanya ni litumbo ku yena
kuya kuile.
46Litwa ni silami, mu lumbeke Mulena,
mi mu ise kanya ni litumbo ku yena
kuya kuile.
47Simbewewe ni litwa,
mu lumbeke Mulena,
mi mu ise kanya ni litumbo ku yena
kuya kuile.
48Busihu ni musihali,
mu lumbeke Mulena,
mi mu ise kanya ni litumbo ku yena
kuya kuile.
49Liseli ni lififi, mu lumbeke Mulena,
mi mu ise kanya ni litumbo ku yena
kuya kuile.
50Lumonyi lwa pula ni malu,
mu lumbeke Mulena,
mi mu ise kanya ni litumbo ku yena
kuya kuile.
51“Ze mwa lifasi kaufela,
mu lumbeke Mulena,
mi mu ise kanya ni litumbo ku yena
kuya kuile.
52Malundu a matuna ni a manyinyani,
mu lumbeke Mulena,
mi mu ise kanya ni litumbo ku yena
kuya kuile.
53Linto kamukana ze hula mwa lifasi,
mu lumbeke Mulena,
mi mu ise kanya ni litumbo ku yena
kuya kuile.
54Mawelu-welu a mezi, mu lumbeke
Mulena,
mi mu ise kanya ni litumbo ku yena
kuya kuile.
55Mawate ni linuka, mu lumbeke Mulena,
mi mu ise kanya ni litumbo ku yena
kuya kuile.
56Libatana za mwa liwate ni ze pila
mwa mezi kamukana,
mu lumbeke Mulena,
mi mu ise kanya ni litumbo ku yena
kuya kuile.
57Linyunywani za mwa mbyumbyulu
kamukana,
mu lumbeke Mulena,
mi mu ise kanya ni litumbo ku yena
kuya kuile.
58Lifolofolo za mwa naheñi
ni za kwa batu kaufela,
mu lumbeke Mulena,
mi mu ise kanya ni litumbo ku yena
kuya kuile.
59Bana ba batu kaufela,
mu lumbeke Mulena,
mu ise kanya ni litumbo ku yena
kuya kuile.
60Batu ba Isilaele, mu lumbeke Mulena,
mi mu ise kanya ni litumbo ku yena
kuya kuile.
61Baprisita ba Mulimu,
mu lumbeke Mulena,
mi mu ise kanya ni litumbo ku yena
kuya kuile.
62Batanga ba Mulena,
mu lumbeke Mulena,
mi mu ise kanya ni litumbo ku yena
kuya kuile.
63Mina lipilu ni mioya ya ba ba lukile,
mu lumbeke Mulena,
mi mu ise kanya ni litumbo ku yena
kuya kuile.
64Mina batu ba ba ineezi ni ba
mombela,
mu lumbeke Mulena,
mi mu ise kanya ni litumbo ku yena
kuya kuile.
65Anania, Azaria ni Mishaele,
mu lumbeke Mulena,
mi mu ise kanya ni litumbo ku yena
kuya kuile.
“U lu pumbuzi kwatas'a lifasi,
mi u lu pilisize kwa lifu.
U lu pimisize kwa buhali bwa
bwa mulilo,
mi u lu zwisize mwahal'a
litumbu-tumbu.
66Mu itumele ku Mulena,
kakuli u lukile,
mi lilato la hae ha li feli kuya kuile.
67Mina kamukana ba ba mu lapela,
mu lumbeke Mulimu wa milimu.
68Mu mu lumbeke mi mu itumele ku yena,
kakuli lilato la hae ki le li sa feli
kuya kuile.”
Currently Selected:
DANIELE 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.