SUZANA 1
1
Baatuli ba babeli ba hapwa ki bunde bwa Suzana
1Mwa Babilona ne ku pila munna ya bizwa Joakimu. 2N'a nyezi Suzana, mwan'a Hilikia, ili musali yo munde hahulu. N'a saba Mulimu. 3Bashemi ba hae n'e li ba ba lukile mi ne ba mu lutile Mulao wa Mushe. 4Joakimu n'e li munna ya n'a fumile hahulu, mi n'a na ni simu ye tuna ya miselo kwatukw'a ndu ya hae. Majuda ne ba t'o mu potelanga kakuli n'a kutekeha hahulu ku fita banna ba bañwi kaufela. 5Ka sona silimo seo, kwa ketwa banna ba bahulu ba babeli ku ba baatuli. Mulimu a bulela ka za ba ba swana ni bona, a li, “Bumaswe bu se bu tile ku Babilona ka banna-bahulu bao be li baatuli, ba ba ne ba lukela ku busa batu.”
6Banna ba, ne ba banga kwa ndu ya Joakimu hañata, mi batu kamukana ba ba ne ba na ni lipilaelo ne ba tahanga ku bona. 7Ka nako ya musihali batu kaufela ha ba se ba ile, Suzana n'a yanga mwa simu ya munn'a hae ku y'o tambala-tambala. 8Cwale banna ba babeli ba, ne ba mu bonanga ha n'a y'o pota-potanga mwa simu mo, mi ba kala ku mu lakaza. 9Ba tuhela ku nahana hande. Ba palelwa ku hupula za lihalimu mi ba libala za bunde bo ne ba lukela ku eza. 10Bubeli bwa bona ba kenelwa ki munahano o swana, kono ne ba si ka bulelelana litakazo za bona. 11Ne ba swaba ku izibahaza kuli ne ba bata ku lobala ni yena. 12Kono ne ba sa lika ku mu bona ka zazi ni zazi.
13Ka zazi le liñwi ba laezana, ba li, “A lu yeñi kwa hae. S'e li nako ya ku ca lico!” Ba funduka mi ba kauhana, yo muñwi ni yo muñwi a izamaela a li nosi. 14Ba ezize cwalo ka ku picukana ni muhabo, ka muhupulo wa ku ya ku musali yo, kono ba y'o katanela hona kwa sibaka seo hape. Ka maswabi ba ipulelela ni ku lumela ka za takazo ya bona ku yena mi ba lelisana mo ba ka fumanela sibaka sa ku mu fumana a li nosi. 15Cwale ba litela ku fumana nako ye lukela.
Baatuli ba lika ku fosisa Suzana
Ka zazi le liñwi Suzana a taha sina kamita, a na ni basizana ba babeli feela ba ne ba zamaya ni yena. Lizazi ne li cisa hahulu mi a lata ku tapa hona mwa simu mo. 16Ne ku si na mutu haisi feela bona banna ba babeli bao ba ne ba mu talimezi ba ipatile. 17Suzana a li kwa basizana ba hae, “Mu ni tiseze mafula ni mulola, mi mu kwale munyako wa simu ha ni sa tapa.” 18Ba eza mo ne ba bulelezwi. Ba kwala munyako wa simu mi ba kutela mwa ndu ka kanzila ka makenelo a kwatuko, ku y'o nga ze ne ba lumilwe, mi hape ne ba sa zibi se siñwi ka za banna ba bahulu bao, ba ba ne ba ipatile.
19Basizana ha ba se ba ile, banna ba babeli ba shokomoka, ba taha ku yena, ba li, 20“Bona, munyako wa simu u kwalilwe, mi ha ku na ya ta kona ku lu bona. Lu bata ku lobala ni wena, cwale lumela kuli lu eze cwalo. 21Haiba u hana, lu ta fa bupaki bo bu li ne ku na ni mucaha y'o n'o inzi ni yena mi kikabakaleo n'o lelekile basizana kuli ba ku sinuhe.”
22 #
Malivi 20.10; Mul 22.22 Suzana a lula moya, a li, “Ni swasehile, niha ni ka eza ka mukwa ufi ni ufi. Haiba ni lumela, fo ki lifu la ka, kono hape niha ni ka hana ha ni koni ku punyuha ku mina. 23Kono ni lata ku bulaiwa ki mina ni si na mulatu ku fita kuli ni foseze Mulena Mulimu.” 24Cwale a huweleza hahulu mw'a n'a konela kaufela. Ni bona banna bao ba ba babeli ba kala ku huweleza ku tameleza musali yo za buhata. 25Yo muñwi wa ku bona a matela ku y'o kwalula munyako wa simu.
26Ba mwa ndu ha ba utwa muhuwo mwa simu ba matela kwande ku y'o bona se ne si ezahala. 27Kono ba bahulu bao ha ba se ba bulezi taba ya bona, babeleki ba swaba hahulu, kakuli ba li ku ba, ba sa utweli Suzana taba ya mufuta o cwalo.
Bupaki bwa buhata bwa baatuli
28Ka le li tatama kwa ezwa mukopano kwa ndu ya Joakimu, munn'a hae. Ba bahulu ba babeli ba fita, ba na ni bupaki bwa bubeteki bwa mulelo wa ku mu bulaisa. 29Ba taluseza batu mi ba kupa kuli Suzana mwan'a Hilikia, yena musal'a Joakimu, a tisiwe. A lumelwa. 30A taha ni bashemi ba hae, bana ba hae, ni banabahabo kaufela. 31Suzana n'e li musali yo munde hahulu luli, ya buheha. 32N'a ikapesize kwa pata kono bona banna bao, ba ba maswe, ba laela kuli a ikapule kwa pata ili kuli ba buhe bunde bwa hae. 33Banabahabo kaufela ni batu ba ba ne ba mu bona kamukana, ba mu lilela.
34Cwale banna ba babeli bao ba yema, ba beilwe ki batu kaufela mwahali, mi ba beya mazoho a bona fa toho ya musali yo, ku bonisa kuli u mulatu. 35Kono yena, ha n'a nz'a cipita mioko cwalo, a talima kwa lihalimu kakuli n'a sepile hahulu Mulimu. 36Cwale ba bahulu bao ba bulela, ba li, “Ha ne lu nze lu izamaela feela kwatukw'a tima, musali yo a taha ni basizana ba babeli. A kwala munyako wa simu mi a lukulula basizana kuli ba kute. 37Mucaha ya n'a ipatile a taha ku yena, mi ba lobalana. 38Ha lu li kwa mafelelezo a simu ko ne lu inzi lwa bona mulatu wo u ezahala, mi lwa akufela ku bona. 39Niha ne lu ba boni sibeli sa bona cwalo, lwa palelwa ku swala mucaha. N'a na ni tata hahulu ku lu fita. A kwalula munyako mi a mata. 40Nihakulicwalo lu konile ku swala kwateñi musali yo ni ku mu buza kuli a lu taluseze ka za munna yo. 41Musali yo u hanile ku lu bulelela. Bo, ki bona bupaki bwa luna.”
Kabakala kuli banna bao n'e li bona ba bahulu ba batu kaufela, mi hape n'e li bona baatuli, batu ba lumela se ne ba ba bulelezi, mi Suzana s'a atulelwa lifu.
Katulo ya Daniele i pilisa Suzana
42Suzana a huweleza hahulu mw'a n'a konela kaufela, a li, “Mulimu ya sa feli wa kamita ni mita, u ziba likunutu kaufela ni linto kamukana li si ka ezahala kale. 43Wa ziba hande kuli ba ni betekile ka ku fa bupaki bwa buhata. Mi cwale, kana na lukela ku shwa, ni si na mulatu, sina ha se ba ni nganganekile mulatu wa lifu ka mulelo wa lunya lwa lipulao za bona?”
44Mulena Mulimu a mu utwa. 45Ha ne ba mu isa koo ne ba ka y'o mu bulaela, Mulimu a kenya moya o munde ku mushimani ya n'a bizwa Daniele. 46Yo a kala ku huweleza, a li, “Na, ha ni na mulatu kwa lifu la musali yo!”
47Mi batu kamukana ba fetuhela ku yena, ba li, “U liñi ka manzwi a?”
48A alaba a nz'a li mwahal'a batu, a li, “Mina bana ba Isilaele, mu likuba cwañi kuli mu atulele mwan'a Maisilaele lifu, mu si ka utwa manzwi a hae, mi mane mu si ka lika ku ikataza ku fumana niti ya taba mo i inezi? 49Mu kute hape, mu y'o kalisa sinca katulo ya taba ye. Batu ba, ba file bupaki bwa buhata ku beteka musali yo.”
50Cwale batu kamukana ba akufela ku kuta, mi ba bahulu ba li ku Daniele, “Taha, u t'o ina ni luna mi u lu bulelele s'o talusa kakuli Mulimu u ku file mpo ya buhulu.”
51Daniele a li, “Mu kauhanye banna ba. Ni bata ku ba buza.” 52Banna bao ha ba se ba kauhanyizwe, Daniele a tisezwa yo muñwi wa bona kuli a t'o mu buza. Daniele a li, “U supalezi mwa bumaswe, mi cwale libi za hao za kwa bunca bwa hao li ku wisize. 53#Mut 23.7 Wena ni likatulo za hao ze si ka luka, ya fa mulatu ku ya lukile mi ya lukulula sifosi, kanti Muñ'a Bupilo u ize, ‘U si ke wa atulela mutu ya lukile ya si na mulatu lifu.’ 54Cwalehe, kakuli wena u ba boni hande luli, ni bulelele, “N'o ba boni mwatas'a kota mañi?”
A alaba, a li, “N'e li mwatas'a kota ya masitete.”
55Daniele a li, “Kihona! Buhata bwa hao bu ku kutezi. Lingeloi la Mulimu li se li amuhezi katulo ya hao ye zwa ku yena, mi li ta ku puma fahali.”
56Daniele a mu zwisa mi a laela kuli yo muñwi a tiswe, mi a li ku yena, “Wena lusika lwa Kanana, isiñi lwa Juda! U pumilwe ki bunde mi u yembuluzwi ki takazo. 57Mukwa wo ki ona o n'o ezanga ka ona kwa basali ba Isilaele mi ne ba sabanga ku ku hana, kono cwale ki yo mwan'a Juda ya hanile bumaswe bwa hao! 58Cwalehe, ni bulelele, n'o ba pundumuzi mwatas'a kota mañi?”
Yo a alaba, a li, “Mwatas'a kota ya oke ye tala.”
59Daniele a li, “Kihona! Buhata bwa hao bu ku kutezi. Lingeloi la Mulimu li ku litezi ni mukwale kuli li ku tabe. Cwale li ka mi timeza hamoho, sibeli sa mina.”
60Batu kaufela ba lumba Mulimu, mupulusi wa ba ba mu sepa. 61Cwale ba fetuhela kwa banna ba bahulu ba babeli bao b'a n'a file Daniele mulatu kabakala ku paka buhata kwa bona. 62#Mul 19.16-21 Ka ku latelela mo ku taluselizwe mwa Mulao wa Mushe ba ba atulela katulo ye swana sina bona mo ne ba hupulezi ku ezeza mwanahabo bona. Ba ba bulaya, mi ba pilisa musali yani, ya n'a si na mulatu, ka lona lizazi leo. 63Hilikia ni musal'a hae ba itumela ku Mulimu bakeñisa mwan'a bona Suzana. Ni yena Joakimu, munn'a hae, a itumela ku Mulimu, mane ni banabahabo kamukana, kakuli n'a zwisizwe mulatu wa nto ye swabisa hahulu.
64Ku zwa ka lona lizazi leo, Daniele a tuma hahulu kwa batu.
Currently Selected:
SUZANA 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.