JEREMIA 6
6
Liñolo la Jeremia
Le ki liñolo la Jeremia l'a n'a lumezi kwa lihapiwa ze ne li tuha li iswa kwa Babilona ki mulena wa Mababilona, ili la ku ba zibisa litaelo z'a n'a filwe ki Mulimu.
1 #
Jer 29.1
Kabakala libi ze mu ezize fapil'a Mulimu, mu swanezi ku iswa kwa Babilona ki Nebukadenezare mulena wa Mababilona. 2Ha mu se mu il'o fita mwa Babilona, mu ta y'o ina kwateñi lilimo ze ñata, mane ku be ku fite masika a supile. Ku zwa fo, kihona ni ta mi kutiseza kwa hae ka kozo. 3Mwa Babilona mu ta y'o bona milimu ye ezizwe ka silivela, ka gauda, ni ka likota, ye nanulezwi mwahalimu, ili ye sabisa balicaba. 4Mu tokomele. Mu si ke mwa likanyisa bazwahule, mi mu si ke mwa saba milimu ya bona. 5Mu si ke mwa i saba niha mu bona balapeli ba kubukana kwapili ni mwamulaho a yona. Bakeñisa ku i lapela, mina mu bulele mwa lipilu, mu li, “Muñ'a Bupilo, ki wena feela ye lu swanezi ku lapela.” 6Kabakala kuli lingeloi la ka li na ni mina, li ta babalela bupilo bwa mina.
7Niha milimu yeo i apesizwe ka gauda ni silivela, ni malimi a yona a lolekilwe hande ki likwala, ki ya buhata, mi ha i koni ku bulela. 8Bahedeni bao, ba nga gauda ili ku ezeza milimu ya bona likuwani sina musizana ya tabela mikabo. 9Fokuñwi bona baprisita kasibili ba uzwa gauda ni silivela ye fa likuwani za milimu ya bona mi mane ba itusisa yona ka limpo za ku fa mahule ba mwa tempele. 10Milimu yeo ya gauda, silivela, ni ya likota, ba i apesa liapalo sina batu, niha i sa koni ku isileleza kwa mafumi kapa lisupa, nihaike i apesizwe liapalo za bulena. 11Mane nihaili lipata za yona ne li swanezi ku pyemulwa ki baprisita kabakala maluli a mwa tempele a li apesize. 12Mulimu o muñwi niha u sweli mulamu wa bulena sina mubusisi, nihakulicwalo ha u koni ku bulaya mutu ufi ni ufi ya u foseza. 13O muñwi u sweli mukwale ni sibanga mwa lizoho la silyo, kono ha u koni ku itamulela kwa ndwa kapa kwa masholi. 14Taba yeo ki yona ye bonisa kuli ha si milimu. Mu si ke mwa i saba.
15Sina piza ye itusiswa ha i si na tuso ha i se i tubehile, ku cwalo ni ku yona milimu yeo ye tomilwe mwa litempele za yona. 16Meeto a yona a tezi maluli a tukululwa ki mahutu a ba ba kena. 17Sina mutu ya foselize mulena h'a kwalelwa mwa tolongo, a atulezwi lifu, ni bona baprisita ba sileleza cwalo litempele za milimu ye ka likwalo ni lipakiso, kabakala ku sabisa busholi. 18Ba i tumbulela lilampi ze ñata ku fita za bona, konohe milimu yeo ha i koni ku bona nihaili liseli la lampi i liñwi. 19Ba li milimu yeo i swana sina misumo ya tempele ye cilwe ki butwa mwahali, hamohocwalo ni liapalo za yona ze nde. 20Ha i lemuhi kuli lipata za yona li unsufalizwe ki musi o zwa mwa tempele. 21Bo sikampafwa, tumbimbi, ni linyunywani za mifuta li fufa fahalimw'a litoho za yona, mane ni zona likaze li tulaka fahalimw'a yona. 22Kabakala zeo kaufela, mwa kona ku utwisisa kuli ha si milimu. Mu si ke mwa i saba.
23Gauda ye kabisizwe milimu yeo ya buheha, kono ha ku si na mutu ya i fufula maluli, gauda yeo ha i koni ku benya. Milimu yeo ne i sa utwi se siñwi ha ne i eziwa. 24Niha i lekwa ka teko ye tuna, ki lika ze si na bupilo. 25Sina ha i sa koni ku zamaya, i na ni ku lwaliwa ki batu fa maheta, ili nto ye bonisa ku tokwa tuso kwa yona. Hape ki taba ye swabisa hahulu ku ba ba i lapela, ba ba i yemisanga ha i wa. 26Ha i se i yemisizwe, milimu yeo ha i koni ku zamaya ili yona. Ha i bata ku wa, ha i koni ku ikemisa. Limpo ze ba i fa, li swana inge za ku fa batu ba ba shwile. 27Litabelo kaufela ze ba i ezeza, li lekiswa ki baprisita mi ba ikungela se ba fumana. Kamukwaoswana ni basali ba bona ba ikungela kalulo ye ñwi ba sa fi kwateñi babotana ni bakuli. Haili ka litabelo mane li swaliwa ki basali ba ba pepa kamba ba ba keluhile ku si na sabo! 28Sina ha mu bona ka mitala yeo kuli ha si milimu, mu si ke mwa i saba.
29Kaniti, i ka bizwa cwañi kuli ki milimu kakuli milimu yeo ya silivela, gauda, ni likota, i ezezwa litabelo ki basali? 30Baprisita ba ina mwa litempele za milimu yeo, ba apezi liapalo ze pazauhile, ba ikutile kwa litoho ni ku ipeula milelu, mane ba si na ni se ba apezi kwa litoho. 31Ba lila ba nze ba tondokela fapil'a milimu ya bona, sina batu ba ba silisa. 32Baprisita ba nga liapalo za milimu ku tinisa basali ni bana ba bona. 33Milimu yeo niha i ka ezwa maswe, ha i koni ku kutisa bumaswe. Ha i na maata a ku yolisa kamba ku tulula malena. 34Kamukwaoswana ha i koni ku aba bufumu kamba mali. Haiba mutu a palelwa ku peta buitamo bw'a itamile ku yona, ha i koni ku mu zekisa. 35Ha i koni ku pimisa mutu kwa lifu kamba ku lamulela ya fokola ku ya maata. 36Ha i koni ku konisa sibofu ku bona, kapa ku lamulela mutu ya mwa butata. 37Ha i koni ku shwela mbelwa makeke, mane nihaili ku tusa ndiala. 38Milimu ye, ya likota ye kabisizwe ka gauda ni silivela, i swana ni macwe a ketuzwi kwatukw'a lilundu. Ba ba i lapela ba ta zieleha hahulu. 39Cwale mutu a ka hupula cwañi kamba ku bulela kuli ki milimu?
40Ni bona Makalade kasibili, ha ba kuteki milimu. Ha ba fumana mutu wa simumu ba mu isa ku Bele, mulimu wa bona yo mutuma, ku y'o kupela mutu yo wa simumu kuli a bulele, inge mulimu o ba utwa! 41#Isa 46.1 Ha ba koni ku limbulula milimu yeo, mi fo, kihona fo ba si na ngana. 42Basali ba ba itamile tukenge ba inzi mwa mikwakwa ba nze ba cisa muuku sina insense. 43Yo muñwi wa ku bona h'a ikungelwa ki muzamai mi a y'o fosa ni yena, u nyaza wa habo ka ku sa ketiwa ni ku pumehelwa ki kakenge ka hae. 44Lika kaufela ze ezahala kai ni kai fakaufi ni yona milimu yeo, ki za buhata. Mutu a ka kona cwañi ku hupula kamba ku lumela kuli ki milimu?
45Mo ne ba i ezelize babati ni mambuti, ki mo i sa inezi. 46Ba ba i ezize ha ba koni ku pila nako ye telele, cwale ze ba ezize lu ka li biza cwañi kuli ki milimu? 47Ba siyezi feela baikulu ba bona lika ze swabisa za buhata. 48Ha ku taha ndwa kamba ziezi, baprisita ba lelisana koo ba ka y'o ipata hamoho ni yona milimu yeo. 49Mutu a ka palelwa cwañi ku lemuha kuli ha si milimu, ha i sa koni ku itwanela mwa ndwa kamba ku itamulela kwa ziezi?
50Sina ha ku zibahala hande kuli ki milimu ye ezizwe fa likota, i kabisizwe ka gauda ni silivela, ku swanezi ku utwahala, ku mañi ni mañi, kwa macaba ni kwa malena kuli ki ya buhata feela. Ki musebezi o ezizwe ki batu, mi ha ku na maata a Mulimu ku yona. 51Kana ku sa na ni ya si ka utwisisa kuli ha si milimu?
52Ha i koni ku ikezeza mulena kamba ku neliseza batu pula, ku ba tomela milao, kapa ku lamulela mutu kaufela ya mwa butata. 53Ha i na tuso. I swana feela inge mañwalala a mwa mbuyumbyulu. 54Haiba tempele ye ya milimu ya likota ye kabisizwe ka gauda ni silivela ya ca mulilo, baprisita ba yona ba sabela kwahule, kono yona i siyala i ungumani cwalo sina misumo, i t'o cela mwateñi. 55Ha i koni ku itwanela ku mulena kamba kwa lila. 56Cwale mutu a ka hupula kamba ku bulela cwañi kuli ki milimu?
57Milimu ye ya likota ye kabisizwe ka gauda kamba silivela ha i koni ku itamulela kwa masholi kamba malengwami. Batu ba likebenga ba kona ku i uzweza gauda ni silivela, ni ku ikungela liapalo ze i apezi. Nihakulicwalo ha i na maata a ku itamulela. 58Ki ko kunde ku ba mulena ya bonisa maata a hae, kamba piza ye na ni tuso ku muñ'a yona, ku fita ku ba milimu ye ya buhata. Ki ko kunde ku ba sikwalo sa munyako wa ndu se si sileleza libyana ze mwateñi, ku fita ku ba milimu ye ya buhata. Nihaili musumo wa mwa ndu ya bulena, ki o munde ku fita milimu ye ya buhata.
59Lizazi, kweli, ni linaleli ze benya, li eza musebezi o na ni tuso, mi za mamela. 60Kamukwaoswana ni lona lumonyi ha lu benya lu bonahala kuli ki pono ye nde hahulu. Ni ona moya u fuka cwalo mwa linaha kaufela. 61Ni ona malu a latelela taelo ya Mulimu h'a hasanela mwa lifasi kaufela, mane ni ona mulilo, o zwa kwahalimu ku t'o cisa malundu ni mishitu, u latelela s'o laezwi. 62Cwale yona milimu ye ha i likani ni zona, ka bunde kapa ka maata. 63Kabakaleo h'a yo ya ka hupula kamba ku bulela kuli maswaniso ao ki milimu, kakuli ha i na maata a ku atula kamba ku tusa batu. 64Cwale ka ku ziba kuli ha si milimu, mu si ke mwa i saba.
65Ha i koni ku kuta kamba ku fuyaula malena. 66Ha i koni ku ezeza macaba liponiso mwa lihalimu, ku benya sina lizazi, kamba ku benyisa liseli sina kweli. 67Lifolofolo za i fita kakuli li kona ku ipumanela malobalo ni ku ipabalela. 68Kabakaleo ha ku na bupaki ni bo bukana bo bu bonisa kuli maswaniso ao ki milimu. Mu si ke mwa i saba.
69Milimu ya bona ya likota ye kabisizwe ka gauda ni silivela, i swana sina lisusa ze mwa simu ya mahapu, li si na se li eza. 70Hape yona milimu ya bona yeo ya likota, ye kabisizwe ka gauda ni silivela, i swana sina sicacani sa miutwa se si mwa simu, 71se si inwa ki nyunywani ifi ni ifi, kamba situpu se si latezwi mwa lififi. 72Ka ku bona liapalo ze nde ze bolela fahalimw'a yona, mu ta lemuha kuli ha si milimu. Mane kwa mafelelezo ni yona, ha se i cilwe ki butwa, i ta ba taba ye swabisa kwa naha. 73Kikabakaleo kuli bunde ki ku ba mutu ya lukile, ya si na milimu ya maswaniso, kakuli h'a na ku nyazahala.
Currently Selected:
JEREMIA 6: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.