Nehemia 1
1
Pilaelo ya Nehemia bakeñisa Jerusalema
1Ki ye taba ya Nehemia, mwan'a Hakalia.
Mwa kweli ya Kisileu, Aritazerisi ha n'a li mulena yo muhulu ka lilimo ze mashumi a mabeli, na, Nehemia, ne ni li mwa munzi o mutuna wa Shushani. 2Hanani, yo muñwi wa banyani ba ka, a t'o fita ni sitopa sa batu ba bañwi ba kwa Juda, mi na ba buza ka za Majuda ba ba ne ba il'o kuta kwa butanga, ni ka za munzi wa Jerusalema. 3Ba t'o ni bulelela kuli ba ba ne ba bandukile, mi ba kutezi mwa naha ya habo bona, ne ba li mwa butata bo butuna, ni kuli balicaba ba ba ne ba pila ni bona ne ba ba nyaziseza. Ba ni bulelela hape kuli mamota a Jerusalema n'a s'a wile cwalo, ni kuli likwalo ne li si ka lukiswa haisali li cela mulilo. 4Ha ni se ni utwa zeo, na ina fafasi, mi na lila.
Na lila mazazi a mañata ni sa ci. Na lapela ku Mulimu, na li, 5“Oho Muñ'a Bupilo, Mulimu wa lihalimu! U yo mutuna, mi lwa ku saba. Wa sepahala, mi u buluka bulikani bwa hao ni ba ba ku lata, mi ba eza z'o ba laela. 6U ni talime, Muñ'a Bupilo, mi u utwe tapelo ya ka, ha ni nze ni lapelela batanga ba hao musihali ni busihu, ili sona sicaba sa Isilaele. Na lumela kuli luna, sicaba sa Isilaele, lu fosize. Bo kukw'a ka, ni na, lu fosize. 7Lu ku foselize hahulu. Ha lu si ka eza z'o n'o laezi. Ha lu si ka mamela mulao o n'o lu file ka Mushe mutang'a hao. 8#Malivi 26.33 Cwale, u hupule s'o n'o bulelezi Mushe, ha n'o ize, ‘Haiba mina sicaba sa Isilaele mu sa sepahali ku na, ni ta mi hasanyeza mwahal'a macaba a sili. 9#Mul 30.1-5 Kono ha mu kutela ku na, mi mwa eza ze ni mi laezi, ni ta mi kutiseza mwa sibaka se ne ni iketezi kuli mu ni lapelele ku sona, niha mu hasanyelizwe kwahule, mane ku y'o fita kwa mafelelezo a lifasi.’
10“Mulena, ba ki batanga ba hao, ili batu ba hao luli. U ba lamulezi ka maata a hao a matuna. 11Cwale u utwe tapelo ya ka ni litapelo za batanga ba hao kamukana ba ba bata ku kuteka libizo la hao. U ni tuse kacenu. Na, ni y'o kupa mulena kuli a ni utwele butuku.”
Currently Selected:
Nehemia 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.