Ezra 10
10
Mukwa wa ku felisa manyalo a mazwake
1Ezira ha n'a nz'a kubami, a lapela fapil'a Tempele, a lila ni ku inyaza ka libi ze, a t'o kubukanelwa ki sitopa se situna sa Maisilaele, ili sa banna, basali ni banana, ba ba lila ba tomohile. 2Cwale Shekania, mwan'a Jehiele wa mushiku wa Elami, a li ku yena, “Lu sinyize kutwano ya luna ni Mulimu ka ku nyala basali ba mishobo i sili, kono nihakulicwalo, ku sa na ni sepo bakeñisa Isilaele. 3Cwale lu swanezi ku itama ka mukwa o tiile ku Mulimu wa luna kuli lu ta leleka basali bao ni bana ba bona. Lu ta eza s'o ta lu eleza wena ni ba bañwi ba ba saba litaelo za Mulimu. Lu ta eza se si batwa ki Mulao wa Mulimu. 4Ki swanelo ya hao ya ku eza se siñwi. Luna lwa lumelelana ni wena. Kabakaleo zwelapili, mi u kondise.”
5Cwale Ezira a kala ka baeteleli ba baprisita, ba Malivi, ni ba sicaba kamukana, ku itama kuli ba ta eza se ne si kakanyizwe ki Shekania. 6Kiha s'a zwa fapil'a Tempele ku ya mwa mandu mw'a n'a ina Johanani mwan'a Eliashibi. A y'o lobala mwateñi a nz'a liliswa ki ku sa sephala kwa ba ba ne ba zwa mwa butanga. H'a si ka ca kamba ku nwa se siñwi.
7Kwa lumiwa liñusa mwa Jerusalema ni Juda kamukana kuli ba ba kutile kwa butanga kaufela ba t'o kopanela mwa Jerusalema. 8N'e li ka taelo ya babusi ni baeteleli ba sicaba. Haiba ku ka ba ni ya ka palelwa ku fita mwa mazazi a malalu, u ta amuhiwa liluwo la hae kamukana, mi h'a sa na ku balelwa mwa mushobo wa habo. 9Ku ona mazazi ao a malalu, ka lizazi la bumashumi a mabeli mwa kweli ya busupa ka ze peli, banna kamukana ba ba ne ba yahile mwa naha ya Juda ni ya Benjamine ba t'o kopana fa patelo ya Tempele mwa Jerusalema. Pula ne i nela hahulu, mi kabakala yona ni butuna bwa mukopano batu kaufela ne ba ngangama.
10Muprisita Ezira a yema, mi a bulela ni bona, a li, “Ha mu si ka sepahala, mi mu tisize mulatu fahalimw'a Isilaele ka ku nyala basali ba mishobo i sili. 11Cwalehe, mu itumelele libi za mina ku Muñ'a Bupilo, Mulimu wa bo kukw'a mina, mi mu eze ze mu tabisa. Mu ikambuse ku balicaba ba ba yahile mwa naha ya luna, mi mu leleke basali ba mina ba mishobo i sili.”
12Batu ba alaba ka ku huwa, ba li, “Lu ta eza s'o bulela kaufela.” 13Kono ba ekeza, ba li, “Kono batu ki ba bañata hahulu, mi hape pula i nela ka tata. Ha lu koni ku ina fa patelo cwana. Ye ha si nto ye ka eziwa ka lizazi li li liñwi kamba a mabeli feela, kakuli buñata bwa luna bu keni ku sona sibi seo. 14Manduna ba luna ba ine mwa Jerusalema, mi ba talime taba ye. Cwale mutu ufi ni ufi ya mwa minzi ya luna kaufela ya na ni musali wa mushobo u sili a tahe ka nako ye tomilwe, hamoho ni baeteleli ni baatuli ba munzi wa habo. Ka mukwa wo, buhali bwa Mulimu fa taba ye bu ta fela.” 15Ha ku na ya n'a hanile mulelo wo, haisi Jonatani mwan'a Azaele, ni Jahazeya mwan'a Tikiva, ba ba ne ba lumelezwi ki Meshulami ni Shabetai wa Mulivi.
16Batu ba ba ne ba kutile ku zwa kwa butanga ba lumela mulelo wo. Cwale muprisita Ezira a keta batu mwahal'a litoho za mishiku, mi a ñola mabizo a bona. Ka lizazi la pili la kweli ye tatama ba kala ku batisisa taba yeo ya manyalo. 17Mwahal'a likweli ze talu ze tatama ba batisisa litaba kaufela za ba ba ne ba nyezi basali ba mishobo i sili.
Banna ba ba ne ba nyezi basali ba mishobo i sili
18Ki wo mukoloko wa mabizo a batu ba ba ne ba nyezi basali ba mishobo i sili.
Baprisita ba kolokiswa ka mishiku ya bona.
Mwa mushiku wa Jeshua ni banyani ba hae, bana ba Josadaki, n'e li Maaseya, Eliezere, Jaribi ni Gedalia. 19Ba sepisa ku leleka basali ba bona, mane ba tisa poho ya ngu ku eza sitabelo ka libi za bona.
20Mwa mushiku wa Imeri n'e li Hanani ni Zebadia.
21Mwa mushiku wa Harimi n'e li Maaseya, Elia, Shemaya, Jehiele ni Uzia.
22Mwa mushiku wa Pashuri n'e li Elioenai, Maaseya, Ishimaele, Netanele, Jozabadi ni Elasa.
23 Malivi n'e li
Jozabadi, Shimei, Kelaya ya n'a bizwa ka la Kelita, Petahia, Juda ni Eliezere.
24 Baopeli n'e li
Eliashibi.
Balibeleli ba Tempele n'e li
Shalume, Telemi ni Uri.
25 Mwa Maisilaele ba bañwi:
Mwa mushiku wa Paroshi n'e li Ramia, Izia, Malikia, Mijamine, Eliazare, Malikia ni Benaya.
26Mwa mushiku wa Elami n'e li Matania, Zakaria, Jehiele, Abidi, Jeremoti ni Elia.
27Mwa mushiku wa Zatu n'e li Elioenai, Eliashibi, Matania, Jeremoti, Zabadi ni Aziza.
28Mwa mushiku wa Bebai n'e li Jehohanani, Hanania, Zabai ni Atelai.
29Mwa mushiku wa Bani n'e li Meshulami, Maluki, Adaya, Jashubi, Sheali ni Jeremoti.
30Mwa mushiku wa Pakati-Moabi n'e li Adina, Kelali, Benaya, Maaseya, Matina, Bezalele, Binui ni Manase.
31Mwa mushiku wa Harimi n'e li Eliezere, Ishiya, Malikia, Shemaya, Shimioni. 32Mi hape n'e li Benjamine, Maluki ni Shemaria.
33Mwa mushiku wa Hashumi n'e li Matenai, Matata, Zabadi, Elifeleti, Jeremai, Manase ni Shimei.
34Mwa mushiku wa Bani n'e li Maadai, Amirami ni Uele. 35N'e li Benaya, Bedeya ni Keluhi. 36Hape n'e li Vania, Meremoti ni Eliashibi. 37Mi n'e li Matania, Matenai ni Jaasu.
38Mwa mushiku wa Binui n'e li Shimei. 39Hape n'e li Shelemia, Natani ni Adaya. 40N'e li Makinadebai, Shashai ni Sharai. 41Mi n'e li Azarele, Shelemia ni Shemaria. 42Mi hape n'e li Shalume, Amaria ni Josefa.
43Mwa mushiku wa Nebo n'e li Jeiele, Matitia, Zabadi, Zebina, Ido, Joele ni Benaya.
44Banna bao kamukana ne ba nyezi balicaba. Ba kauhana ni bona, mi ba ba kutiseza habobona, hamoho ni bana ba bona.
Currently Selected:
Ezra 10: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.