Nehemia 2
2
Nehemia u ya kwa Jerusalema
1Ka ona mazazi ao, ne ni tokomela za waine ye ne isiwanga kwa tafule ya mulena. Mwa kweli ya Nisani, Aritazerisi h'a nz'a li mulena ka lilimo ze mashumi a mabeli, zazi le liñwi ha n'a nz'a ca, na mu iseza waine. 2Ha li ku ba mutu, n'a si ka ni bona ni swabile. Kiha s'a ni buza, a li, “U swabisizwe kiñi? Ha u kuli, kono feela u swabile!”
Taba yeo ya ni komokisa. 3#2 Male 25.8-10; 2 Lita 36.19; Jer 52.12-14 Na alaba, na li, “U pile kuya kuile, Muñ'a ka! Ni ka tuhela cwañi ku swaba kanti munzi mo ku bulukilwe bo kuku u s'o li matota, mi likwalo za ona li cisizwe ki mulilo?”
4Mulena a buza, a li, “Cwale s'o bata ki sika mañi?”
Ni lapezi ku Mulimu wa lihalimu. 5Kiha ni bulelela mulena, na li, “Haiba ni tabisa muñ'a ka, mi a lata ku amuhela kupo ya ka, a ni lumelele ku ya kwa naha ya Juda, mwa munzi mo ku bulukilwe bo kuku, kuli ni y'o u zusa.”
6Mulena, a nz'a inzi ni mufumahali kwatukw'a hae, a ni buza nako ye ni ka y'o ina kwateñi, ni fo ni ta y'o kutela. Na mu bulelela, mi a lumela kupo ya ka.
7Hape na kupa mulena kuli a ni fe mañolo a ya kwa babusisi ba ba zamaisa naha ye kwa wiko wa Nuka ya Yuferati, ku ba bulelela kuli ni lumelelwe ku fita mwa naha ya bona ku ya kwa Juda. 8Na kupa ni liñolo le li ya ku Asafi, mubabaleli wa mishitu ya bulena, ku mu bulelela kuli a ni fe likota za likwalo za ndu ya balibeleli ba Tempele, za mamota a munzi, ni za ndu mo ni ka ina. Mulena a ni fa ze ne ni kupile kamukana kakuli Mulimu n'a inzi ni na.
9Mulena a luma bazamaisi ba bañwi ba ndwa ni ba ba pahami lipizi ku ya ni na, mi na y'o fita kwa naha ye kwa wiko wa Yuferati. Kwateñi, na y'o fa babusisi mañolo a mulena. 10Kono Sanibalati wa mwa munzi wa Beti-Horoni ni Tobia nduna wa Muamoni, ba utwa kuli ku na ni mutu ya tile ku t'o tusa batu ba Isilaele, mi ba filikana hahulu.
11Na ya kwa Jerusalema, mi na y'o ina kwateñi mazazi a malalu. 12Ne ni si ka bulelela batu s'a n'a beile Mulimu mwa pilu ya ka kuli ni si ezeze Jerusalema. Cwale malungasiku na zuha, mi na ya ni ba bañwi ku be ne ni tile ni bona. Simunanu se ne lu ngile n'e li feela mbongolo ye ne ni pahami. 13Ne sa li busihu ha ni zwa mwa hae ka Munyako wa Musindi, o kwa neku la wiko, mi na liba kwa mboela ku fitelela Liwelu-welu la Sitatu, ku ya kwa Munyako wa Siloko. Ha ne ni nze ni zamaya cwalo, ne ni tatuba mamota a munzi a n'a wile, ni likwalo ze n'e cisizwe ki mulilo. 14Cwale na liba kwa mutulo, mi na ya kwa Munyako wa Liwelu-welu ni kwa Kasa ka Mulena. Mbongolo ye ne ni pahami ya tokwa ko i fita kabakala makwese. 15Cwale busihu na ya kwa musindi, mi na zamaya ni pahami, ni nze ni tatuba limota. Kiha ni kuta ka nzila ye ne ni tile ka yona, mi na kena mwa hae ka Munyako wa Musindi.
16Kwa manduna ba sibaka seo, ne ku si na ya n'a zibile ko ne ni ile, kamba se ne ni ezize. Ni ka yona nako yeo ne ni si ka bulela se siñwi kwa Majuda, baprisita, baeteleli, manduna, kamba ku mutu ufi ni ufi ya na ka ni swalisa kwa musebezi wo. 17Kono cwale na li ku bona, “Mwa bona butata bo lu li ku bona, kakuli Jerusalema s'e li matota, mi minyako ya ona i sinyehile. A lu zuseñi mamota a munzi kuli lu feze maswabi a luna.” 18Mi na ba zibisa mw'a n'a ni ezelize Mulimu, ni ku ni tusa, ni z'a n'a ni bulelezi mulena.
Ba lumela, ba li, “A lu kaleñi ku yaha!” Mi ba itukiseza ku kala musebezi.
19Kono Sanibalati, Tobia, ni Muarabia ya n'a bizwa Geshema, ha ba utwa se ne lu eza, ba lu seha ni ku lu sheununa. Ba li, “Mu hupula kuli mu ezañi? Mu bata ku fetuhela mulena, nji?”
20Na alaba, na li, “Mulimu wa lihalimu u ta lu kondiseza. Lu batanga ba hae, mi lwa kala ku yaha. Kono mina, ha mu na lizoho kwateñi, kamba tukelo ifi kamba ifi mo mwa Jerusalema!”
Currently Selected:
Nehemia 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.