Ezekiele 1
1
Pono ya lubona lwa Mulimu
1 #
Sin 19.11
Mwa silimo sa bumashumi a malalu, kweli ya bune ha i eza mazazi a ketalizoho, ne ni pila ni Majuda ba ba ne ba hapilwe mi ba yahile kwa Nuka ya Kebare mwa naha ya Babilona. Lihalimu la kwaluluha, mi na bona pono ya Mulimu. 2#2 Male 24.10-16; 2 Lita 36.9-10 I n'e li la buketalizoho la kweli mi hape ili silimo sa buketalizoho Mulena Jojakini haisali a hapelwa. 3Hona mo mwa naha ya Babilona kwatuko a Nuka ya Kebare, na, Ezekiele, mwan'a muprisita Buzi, na utwa Muñ'a Bupilo a bulelela ni na, mi na utwa ni maata a hae.
4Na talima mi na bona liñungwa li zwa kwa mutulo. Ne ku na ni lumonyi lo ne lu benya mwa lilu le lituna, mi lihalimu le ne li potolohile lilu n'e li le lifubelu inge sipi ye mwa mulilo. Fo ne ku benya lumonyi, ne ku na ni nto ye n'e benya sina butale bwa kopa. 5#Sin 4.6 Fahali a liñungwa, na bona ze swana sina lifolofolo ze ne. Ne li na ni sibupeho sa mutu. 6Kono ye ñwi ni ye ñwi ya zona, ne i na ni lipata ze ne ni mafufa a mane. 7Mahutu a zona n'a otolohile, kono a na ni litaku inge za lipoho. Lifolofolo zeo ne li benya sina butale bo bu kenisizwe hande. 8Ku ekeza kwa lipata ze ne ni mafufa a mane ao, ye ñwi ni ye ñwi ne i na ni mazoho a mane a swana sina a mutu kwatas'a mafufa a yona. 9Mafufa a mabeli a ye ñwi ni ye ñwi a pakukile n'a tomahani mi ha li zamaya ne li yelela hamoho, li likanelela mwa sibaka sa maneku kaufela a mane li sa fetauhi.
10 #
Ezek 10.14; Sin 4.7 Folofolo ye ñwi ni ye ñwi ne i na ni lipata ze ne ze sa swani. Kwa pili ne ku na ni pata ya mutu, kwa silyo ne ku na ni pata ya tau, kwa nzohoto ne ku na ni pata ya poho, mi kwamulaho ne ku na ni pata ya mbande. 11Mafufa a mañwi a mabeli n'a putezwi fa mibili ya zona. 12Ye ñwi ni ye ñwi ne i bona mwa maneku a mane, mi ka mukwa wo sitopa se ne si sa fetuhi ha si ya ko si bata ku ya.
13 #
Sin 4.5
Mwahal'a lifolofolo zeo, ne ku na ni se siñwi se ne si bonahala inge lumonyi lo lu tuka, lu nze lu sweli ku nyanganya. Mulilo n'o tuka, mi n'o nze u posa malimi a ona. 14Lifolofolo zona li nze li kutela kwamulaho ni ku ya kwapili ka bubebe bo bu swana sina lumonyi.
15 #
Ezek 10.9-13
Ha ne ni nze ni talimezi lifolofolo zeo, na bona mahutu a koloi a hata fafasi, le liñwi li kwatuko a ye ñwi ni ye ñwi ya zona. 16Kaufel'a ona n'a swana, mi n'a benya inge macwe a butokwa, liwili le liñwi ni le liñwi ne li na ni liwili le li comami ku lona fahali ku eza inge sifapahano. 17Kihona mahutu a te a kone ku ya mwa maneku a mane kaufela. 18#Sin 4.8 Mahutu a koloi n'a tezi meeto. 19Fo li nyanganyeza lifolofolo kaufela, ni mawili n'a nyanganya ni zona, mi haiba lifolofolo li nanuha, ku zwa fafasi, ni ona mawili n'a eza cwalo. 20Lifolofolo ne li ya ko ne li lata kamukana, mi ni ona mawili n'a eza sona se ne si eziwa ki lifolofolo, kakuli n'a zamaiswa ki zona. 21Nako kaufela lifolofolo ha li zamaya, kamba li yema, kamba li nanuhela mwahalimu, ni ona mawili n'a eza cwalo, kakuli n'a zamaiswa ki zona lifolofolo zeo.
22 #
Sin 4.6
Fahalimw'a litoho za lifolofolo ne ku na ni sika se siñwi se ne si swana ni situwa se si yahilwe ka siiponi se si benya. 23Mwatasi a ndu folofolo ye ñwi ni ye ñwi ne i pakuzi mafufa a yona a mabeli ku a namululela ku ye bapani ni yona, mi ne i kwahezi mubili wa yona ka a mañwi a mabeli. 24#Sin 1.15; 19.6 Na utwa lilata le ne li eziwa ki mafufa a zona ha li fufa. A ne a luma sina liwate, inge lilata la ndwa ye tuna, kamba linzwi la Mulimu ya Maata Kaufela. Ha li felize ku fufa, za puta mafufa a zona. 25Kono ne ku na ni mulumo o n'o zwa kwa ndu ye fahalimw'a litoho za zona.
26 #
Ezek 10.1; Sin 4.2-3 Fahalimw'a ndu, ne ku na ni nto ye swana sina lubona lo lu ezizwe ka licwe la safiro, ni sibupeho se ne si swana ni sa mutu ya inzi fateñi. 27#Ezek 8.2 Sibupeho seo se ne si bonahala ku benya inge sipi ya kopa ye mwahal'a mulilo, sa benya mwa sibaka seo kaufela ka liseli le lituna. 28Liseli leo, ne li na ni mibala kaufela ya nambwamutalati h'a li mwa malu.
Ki mona mo ne i bonahalezi kanya ya Muñ'a Bupilo.
Currently Selected:
Ezekiele 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.