Sililo 5
5
Tapelo ya ku ikupela musa
1Muñ'a Bupilo,
hupula se si ezahlile ku luna.
Lu talime, mi u bone maswabi a luna.
2Liluwo la luna li mwa mazoho
a balicaba.
Bazwahule ba pila mwa minzi ya luna.
3Bo ndat'a luna ba bulailwe ki sila.
Bo m'a luna cwale s'e li limbelwa.
4Lu swanezi ku lifela mezi o lu nwa.
Lu swanezi ku leka likota za ku ola.
5Lu zamaiswa ka tata
sina limbongolo kamba likamele,
mi ha lu katezi ha lu lumelelwi
ku pumula.
6Kuli lu fumane lico ze ka lu pilisa,
konji kuli lu y'o kupa kwa Asiria
ni Egepita.
7Bo kukw'a luna ba ezize sibi
mi ba shwile,
mi luna lu nyandela sibi sa bona.
8Lu buswa ki batu ba ba sa fiti
batanga,
mi ha ku na ya ka lu pilisa
kwa maata a bona.
9Babulai ba filika mwa naha kaufela.
Lu itombola moyo
ha lu y'o bata lico.
10Tala i se i lu yongisize
sina butuku,
mane matalo a luna s'a cisa
sina liiso la mulilo.
11Basali ba luna ba swelwi likalala
hona fa Lilundu la Sione kasibili.
Mwa minzi kaufela ya Juda
bana ba luna ba basizana
ba hapelelizwe ku lumela.
12Baeteleli ba luna ba ngilwe
mi ba bulailwe.
Macembele ba luna ha ba kutekiwi.
13Micaha ya luna ba hapelezwa
ku sita lico sina batanga.
Bashimani ba tantalikiswa
ki mañata-tuna a likota.
14Batu ba bahulu ha ba sa ina
kwa minyako ya munzi,
ni ba banca ha ba sa eza lipina.
15Tabo i felile mwa bupilo bwa luna.
Maswabi a ngile sibaka sa lipina
za luna.
16Ku ze ne lu ikuhumusa ka zona
ha ku na se si siyezi.
Lu ezize sibi, mi cwale lu maibile.
17Lipilu za luna li butuku luli,
mane mioko ya luna i lu paleliswa
ku bona.
18Kakuli Lilundu la Sione
li inzi li li nosi mi li sabezwi,
mane mawawa a izamaela mwa matota
a lona.
19Kono wena, Muñ'a Bupilo, u mulena
kuya kuile
mi u ta busa kamita ni mita.
20U lu siyeziñi cwana nako ye telele?
Kana u ta lu hupula hape, nji?
21Lu kutiseze ku wena, Muñ'a Bupilo!
Lu kutise!
U eze lika kamukana
mo ne li inezi pili.
22Kamba u lu hanile ku hanelela?
Kikuli buhali bwa hao
ha bu na mafelelezo, naa?
Currently Selected:
Sililo 5: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.