Ezekiele 2
2
Mulimu u biza Ezekiele ku ba mupolofita
1H'a se ni si bona seo, na wela fafasi ka pata. Kiha ni se ni utwa linzwi li li, “Mwan'a mutu, yema. Ni bata ku bulela ni wena.” 2Linzwi ha ne li sa bulela, na kenwa ki moya wa Mulimu, mi wa ni yemisa ka mahutu. Kiha ni utwa linzwi li zwelapili, li li, 3“Mwan'a mutu, ni ku luma kwa sicaba sa Isilaele, ba ba se ba ni fetuhezi. Ni nako ye ba sa ni lwanisa, sina mo ne ba inezi bo kukw'a bona. 4Ba na ni mahanyi mi ha ba ni kuteki. Ni ku luma ku y'o ba bulelela se ni ba bulelela, na, Muñ'a Bupilo ya Pahami. 5Ko ba ku utwa, ni ko ba sa ku utwi, ba ta ziba kuli ku na ni mupolofita mwahal'a bona.
6“Kono wena, mwan'a mutu, u si ke wa ba saba kamba ku saba se ba bulelela. Ba ta ku beya mwahali sina miutwa. Ku ta swana ni ku pila mwahal'a tubanze. Nihakulicwalo u si ke wa saba bafetuheli bao, kamba sifi ni sifi se ba bulela. 7U ta ba bulelela se ni ku bulelela, i ka ba kuli ba utwa kamba ha ba utwi. Hupula mo ba inezi bafetuheli bao.
8“Mwan'a mutu, u utwe ze ni ku bulelela. U si ke wa ba mufetuheli sina bona. Atama, mi u ce se ni ka ku fa.” 9#Sin 5.1 Kiha ni bona lizoho li otolohela ku na, mi ne li sweli buka. 10La putulula buka, mi na bona kuli kafa ni kafa, ne ku ñozwi za sililo ni maswabi, za mihuwo ni sitongo.
Currently Selected:
Ezekiele 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.