Amos 8
8
Vishon di e makutu
1Esaki ta un otro vishon ku SEÑOR Dios a laga mi haña: Un makutu ku fruta hechu. 2I SEÑOR a puntra mi: ‘Kiko bo ta mira, Amos?’ Mi a rospondé: ‘Un makutu ku fruta hechu.’ E ora ei SEÑOR a bisa mi: ‘Tempu ta hechu pa Israel, mi pueblo. Lo Mi no spar e mas.’
3‘E dia ei,’ SEÑOR Dios ta bisa,
‘kantamentu na palasio lo kambia den lamento.
Lo tin kantidat di kadaver
tur kaminda bentá.
Lo reina un silensio mortal.’
Kontra inhustisia i eksplotashon
4P'esei boso,
ku ta trapa hende den nesesidat
i ta eliminá e hòmber chikí dje pais, skucha!
5Boso ta bisa:
‘Ki ora fiesta di luna nobo ta pasa pa kaba,
ki ora sabat ta yega na su fin
pa nos habri mangasina atrobe
i bende nos maishi;
pa nos hasi e baki di un kana mas chikí,
oumentá e peso di pisa plaka,
kònkel ku e balansa#Levítiko 19:35-36; Deuteronomio 25:13-16; Proverbionan 11:1; 20:10,13; Mikéas 6:10-11
i bende asta bagas na un bon preis?
6Nos ta kumpra un hòmber ku n' tin ni moda di muri komo katibu,
ora e no por paga su debe,
ounke e no debe mas ku loke un par di sandalia ta kosta.’
Kon SEÑOR ta bai kastigá
7SEÑOR, gran orguyo di pueblo di Yakob, a hura:
‘Nunka lo Mi no lubidá loke nan a hasi.
8P'esei, ken lo keda straño si mundu tembla,
si su habitantenan kai den tristesa,
si henter mundu sakudí
i subi baha manera Riu Nilo di Egipto?
9E dia ei
lo Mi laga solo baha mèrdia
i lo Mi tapa mundu ku skuridat den pleno dia.#Yoel 2:10
10Boso fiestanan lo Mi kambia den belorio,
boso kantamentu lo kambia den lamento.
Paña di rou lo tapa boso kurpa,
boso kabes lo ta pelá chinu
pa demostrá boso tristesa.
Boso lo keda manera mayornan,
ku ta yora pèrdida di nan úniko yu.
E dia ei
tur kos lo kaba na amargura.#Tobit 2:6
Ami, SEÑOR Dios, a papia.’
11SEÑOR Dios ta bisa:
‘E tempu lo yega
ku hende ta sinti hamber,
ma no di pan;
ku hende tin set,
ma no di awa;
hamber i set di un palabra for di boka di SEÑOR.
12Nan lo kana dualu
di Laman Morto te Mediteráneo
i sigui di nort te ost,
buskando palabra di SEÑOR
sin hañ'é.
13E dia ei
mucha hòmber i muhé den flor di nan hubentut
lo muri di set.
14Tur esnan
ku ta hura pa e piká di Samaria#8:14 piká di Samaria: esaki por ta un referensia na e dios falsu Ashera (2 Krónikanan 24:18) òf e imágen di toro den e santuario na Betel (Hos 8:6; 10:8)., bisando:
“Pa bida di bo dios, o tribu di Dan,”
“Pa bida di e dios#8:14 dios: segun vershon griego; hebreo tin: ruta di peregrinashon di Beer-Shèba,”
lo kai sin lanta mas.’
Currently Selected:
Amos 8: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013