2 Samuel 24
24
David ta tene un senso
(1 Krónikanan 21:1-17)
1SEÑOR su rabia a bolbe lanta kontra Israel; El a pone David kontra nan i bisa: ‘Bai tene senso na Israel i Huda.’ 2E ora ei rei a ordená Yoab, hefe di e ehérsito, ku tabata serka dje: ‘Pasa den tur e tribunan di Israel, for di Dan den nort te Beer-Shèba den zùit; konta e pueblo; registrá esnan ku tin edat di bringa den guera pa mi sa kuantu tin.’ 3Yoab a bisa rei: ‘Mare SEÑOR, bo Dios, hasi pueblo shen bia mas tantu ku e ta awor akí, i mare mahestat ta na bida e tempu ei pa mira nan; ma ta kiko ta e motibu ku mahestat ke hasi e kos ei?’ 4Sinembargo Yoab i e otro komandantenan mester a tuma aden pa kumpli ku e òrdu di rei. Asina ta ku Yoab ku e komandantenan di e ehérsito real a kohe kaminda pa bai registrá e israelitanan ku por a bringa den guera. 5Nan a krusa Yordan i kuminsá na e parti zùit di Aroer, e siudat ku ta keda meimei di e vaye di e riu Arnon; for di ei nan a krusa teritorio di Gad bai Yazer. 6Despues nan a bai Guilead i e tera di e hetitanan, es desir Kadesh.#24:6 e hetitanan…Kadesh: segun vershon griego; hebreo no ta kla Despues nan a yega Dan-Yaan i pasa rònt bai Sidon. 7Despues nan a bira pa zùit pa yega Fòrti-di-Tiro i tur e siudatnan di e hiwita- i kanaanitanan; finalmente nan a sali na e siudat Beer-Shèba, na zùit di Huda. 8Despues ku nan a pasa dor di henter e pais durante nuebe luna i binti dia, nan a yega Herusalèm bèk. 9Yoab a partisipá rei resultado di e senso. Israel tabatin 800.000 sòldá ku por a bringa den guera, Huda 500.000. 10Despues di a konta e trupanan, David su kurason a kuminsá bati te den su boka i el a bisa SEÑOR: ‘Ta un piká grandi mi a hasi, SEÑOR. Mi ta roga Bo, kita e fayo akí for di bo sirbidó, mi a aktua manera un hende sin sintí.’
11Su manisé, promé ku David a lanta, e profeta Gad, vidente den servisio di David, a risibí un mensahe di SEÑOR: 12‘Bai bisa David lo siguiente: “Asina SEÑOR ta bisa: Mi ta proponé bo tres kos. Skohe un di nan i esei lo Mi laga pasa ku bo.” ’ 13Despues di esei Gad a bai serka David, kont'é tur kos i puntr'é: ‘Kiko bo ta preferá: shete aña di hamber grandi den bo pais? Òf bo ke keda ta hui tres luna pa bo enemigunan, ku ta keda persiguí bo? Òf bo ta preferá tres dia di pèster den bo pais? Pensa i bolbe pensa, kiko mi mester kontestá Esun ku a manda mi.’ 14David a kontestá Gad: ‘Mi ta haña mi den un pèrtá grandi. Mihó nos kai den man di SEÑOR, pasobra su mizerikòrdia ta mashá grandi, pero no laga nos kai den man di hende.’
15Asina a sosodé ku SEÑOR a manda pèster riba Israel, for di e mes mainta ei te e ora ku SEÑOR mes a indiká. For di Dan den nort te Beer-Shèba den zùit a muri 70.000 hende di e poblashon. 16Ora e angel a rèk su man pa destruí Herusalèm, SEÑOR a sinti duele di e daño ku El a okashoná. P'esei El a bisa e angel ku tabata kastigá e pueblo: ‘Basta! Baha bo man.’ E momento ei e angel di SEÑOR tabata banda di e plenchi di bati maishi di Arouna, e yebusita. 17Ora David a mira e angel ku tabata pasa kastigá e pueblo, el a bisa SEÑOR: ‘Pero t'ami a peka, t'ami a hasi malu; e pober karnénan akí, kiko nan a hasi? Laga bo kastigu kai riba ami i mi famia!’
David ta traha un altá
(1 Krónikanan 21:18-27)
18E dia ei profeta Gad a bini serka David i bis'é: ‘Lanta un altá pa SEÑOR riba e plenchi kaminda Arouna, e yebusita, ta bati trigo.’ 19I David a bai hasi loke Gad a bis'é riba òrdu di SEÑOR. 20Ora Arouna a hisa kara, el a mira rei i su sirbidónan ta bini serka dje. El a bai pafó i el a bùig te na suela pa demostrá rèspèt. 21Arouna a puntra: ‘Di kon mi shon rei ta bini serka su sirbidó?’ David a kontestá: ‘Pa mi kumpra e plenchi i traha un altá pa SEÑOR, ya asina e pèster por laga e pueblo.’ 22E ora ei Arouna a bisa David: ‘Mi shon rei por kohe pa e sakrifisio loke e ke; ata e bakanan pa kima riba altá, e trapiesa i e yugonan di e bakanan por sirbi pa palu di kandela. 23Tur e kosnan akí Arouna ta ofresé shon rei humildemente.’ Tambe Arouna a sklama: ‘Mare SEÑOR bo Dios ke aseptá bo sakrifisio.’ 24Pero rei a bis'é: ‘Nò, Arouna, mi ke kumpr'é en todo kaso pa loke e ta bal, pasobra mi no ke ofresé SEÑOR, mi Dios, sakrifisionan di kandela ku no a kosta mi nada.’ E ora ei David a kumpra e plenchi di bati maishi i e bakanan pa 50 kilo di plata. 25David a lanta un altá einan pa SEÑOR i a ofresé sakrifisionan di kandela i sakrifisionan di pas. E ora ei SEÑOR a aseptá e orashon na fabor di e pais i e pèster a kita for di Israel.
Currently Selected:
2 Samuel 24: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013