1 Reinan 4
4
Gobièrnu di Salomon
1Salomon tabata rei di henter Israel. 2Su funshonarionan mas altu tabata:
Azarías, yu di Sadok, — saserdote;
3Elihorèf i Ahías, e yunan di Shisha, — sekretario;
Yoshafat, yu di Ahilud, — sekretario di estado;
4Benayahu, yu di Yoyada, — komandante di ehérsito;
Sadok i Abyatar — saserdote;
5Azarías, yu di Natan, — hefe di e gobernadornan;
saserdote Zabud, yu di Natan, — konsehero partikular di rei;
6Ahishar, mayordomo di palasio;
i Adoniram, yu di Abda, — kabes di trabounan obligatorio.
7Salomon tabatin diesdos gobernador pa henter Israel. Nan tabatin obligashon di sòru pa e provishonnan di rei i su famia. Kada luna un di nan mester a perkurá pa esei. 8Aki ta sigui nan nòmber:
Bèn-Hur, den e serunan di Efraim;
9Bèn-Dèkèr, na Makas, Shaalbim, Bet-Shèmèsh i Elon-Bet-Hanan;
10Bèn-Hèsèd, na Arubot (Soko i henter pais di Hefèr tabata kai bou di dje);
11Bèn-Abinadab, na e kareda di serunan Dor (su kasá tabata Tafat, yu muhé di Salomon);
12Baana, yu di Ahilud, na Tanak, Megido i henter Bet-Shean, ku ta keda banda di Sartan, bou di Yizreel, for di Bet-Shean te ku Abel-Mehola, te mas ayá di Yokmeam;
13Bèn-Gèbèr, na Ramot di Guilead: e tabatin e pueblonan di Yair, yu di Manase, ku tabata situá den Guilead, na su enkargo, tambe region di Argob, na Bashan, ku su sesenta siudatnan rondoná di muraya i ku rèndunan di bròns;
14Ahinadab, yu di Ido, na Mahanaim;
15Ahimaas, na Naftali. (E tambe a kasa ku un yu muhé di Salomon, yamá Basmat);
16Baana, yu di Hushai, na Asher i Alot;
17Yoshafat, yu di Parúa, na Isakar;
18Shimi, yu di Ela, na Benhamin;
19Guèbèr, yu di Uri, na region di Guilead, e pais kaminda Sihon, rei di amoritanan, i Og, rei di Bashan, a yega di goberná un tempu. Ademas tabatin ún gobernador general riba henter e pais.
Sabiduria i prosperidat di Salomon
20Huda i Israel tabatin un poblashon numeroso manera santu di laman. Tabatin kuminda i bibida na abundansia i tabata reina alegria. 21#4:21 V. 4:21—5:18 ta korespondé ku v. 5:1-32 den teksto hebreo. Salomon tabata goberná tur e reinonan for di riu Eufrat te na pais di e filisteonan i te na frontera ku Egipto.#Génesis 15:18; 2 Krónikanan 9:26 Nan tabata paga belasting i tabata someté na Salomon durante henter su bida.
22Ata loke Salomon tabatin mester na provishon tur dia: 6600 kana di hariña fini, 13.200 kana di hariña gewon, 23dies baka gòrdá, binti baka kriá ku yerba so i shen karné, sin konta biná kòrá, gasela, biná pintá i gansnan gòrdá, 24pasobra Salomon tabata goberná henter e region na wèst di Eufrat, for di Tifsag te Gaza, riba tur e reinan di e region ei. Salomon tabata biba na pas ku tur e paisnan ku tabata rondoná Israel. 25Tanten Salomon tabata na bida, e habitantenan di Huda i Israel for di Dan den nort te na Beer-Shèba den zùit, por a sinta trankil bou di nan matanan di wendrùif i bou di nan palunan di figo.
26Salomon tabatin 4000 #4:26 4000: teksto probabel, kompará 2 Krónikanan 9:25; hebreo tin: 40.000 bòks pa e kabainan di su garoshinan. Tambe e tabatin 12.000 sòldá di kabayeria.#1 Reinan 10:26; 2 Krónikanan 1:14; 9:25 27E gobernadornan ya menshoná, kada unu den e luna ku tabata su bùrt, tabata sòru pa rei i pa esnan ku tabata kome for di su mesa haña e kuminda nesesario; pa nan no tabatin falta di nada. 28Kada unu na su bùrt tabata manda sebada i yerba seku pa e kabainan ku tabata hala garoshi i pa e otro bestianan di hala karga, kaminda nan indik'é.
29Dios a duna Salomon sabiduria, inteligensia, i komprenshon mes abundante ku santu di laman. 30Salomon su sabiduria a surpasá esun di e egipsionan i esun di e hendenan di oriente. 31E tabata mas sabí ku tur hende, mas sabí ku Etan, e ezrahita, i ku Heman, Kalkol i Darda, e yunan di Mahol. Su fama a kore den tur e paisnan den bisindario. 32El a produsí 3000 proverbio i el a skibi 1005 kantika.#Proverbionan 1:1; 10:1; 25:1; E Kanto di tur Kanto 1:1; Sirag 47:16-17 33El a papia di palu i mata, di e seder grandi di Libanon te e hisopo chikitu ku ta krese na muraya. Tambe el a papia di bestia di kria, di para, reptil i piská. 34Di tur nashon tabata bini hende pa skucha sabiduria di Salomon; nan tabata representante di tur e reinan di mundu ku a tende di su sabiduria.
Currently Selected:
1 Reinan 4: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013