1 Reinan 2
2
Último òrdunan di David
1Komo David su dianan tabata kontá, el a bisa su yu Salomon: 2‘Mi tambe tin ku bai laga mundu meskos ku tur otro hende. Tene kurashi i komportá bo manera hòmber. 3Kumpli ku tur e òrdunan di SEÑOR bo Dios, sigui su kamindanan i kumpli ku su leinan, su mandamentunan, su dekretonan i su mandatonan, manera ta skibí den Lei di Moises. E ora ei lo bo tin éksito den tur loke bo hasi i unda ku bo bai. 4SEÑOR tambe lo kumpli ku loke El a primintí mi, esta ku si mi yunan sigui riba bon kaminda, keda fiel n'E di henter nan alma i di henter nan kurason, semper un di mi desendientenan lo okupá trono di Israel.#2 Samuel 7:11-16 5Bo sa tambe kiko Yoab, yu di Seruya, a hasi ku mi, esta kiko el a hasi ku e dos komandantenan di ehérsito di Israel: ku Abner,#2 Samuel 3:27 yu di Ner, i ku Amasa,#2 Samuel 20:10 yu di Yètèr. Den tempu di pas el a drama nan sanger komo si fuera tabata tempu di guera. Ku e sanger inosente ei el a mancha e faha rònt di su sintura i e sandalianan na su pia. 6Usa bo inteligensia i no laga Yoab muri trankil, no lag'é muri di behes. 7Enkuanto e yunan di Barzilai di Guilead,#2 Samuel 17:27-29 trata nan bon, kombidá nan bin kome serka bo, pasobra nan tambe a trata mi bon ora mi tabata hui pa bo ruman Absalon. 8Ta keda ainda Shimi, yu di Guera, e benhaminita di Bahurim. T'é a maldishoná mi na un manera teribel dia mi tabata bai Mahanaim.#2 Samuel 16:5-13 Despues el a sali bin kontra mi na riu Yordan i mi mester a hur'é pa Dios ku lo mi no mat'é ku spada.#2 Samuel 19:16-23 9No keda sin kastig'é; bo ta basta inteligente pa sa kiko hasi. Sòru pa dia e bai den reino di morto su kabei blanku ta tur na sanger.’
Morto di David
(1 Krónikanan 29:26-30)
10David a bai sosegá serka su antepasadonan i nan a der'é na Siudat di David. 11E tabata rei di Israel durante kuarenta aña; shete aña na Hebron i trintitres na Herusalèm.#2 Samuel 5:4-5; 1 Krónikanan 3:4 12Despues Salomon a goberná na lugá di su tata David,#1 Krónikanan 29:23 i su reino a bira hopi firme.
Fin di Adonías i su partidarionan
13Un dia Adonías, yu di Haguit, a bai serka Bat-Shèba, mama di Salomon. Bat-Shèba a puntr'é: ‘Bo a bini ku bon intenshon?’ El a kontestá: ‘Sigur no. 14Mi tin algu di papia ku bo.’ Bat-Shèba a kontestá: ‘Papia numa.’ 15E ora ei Adonías a bisa: ‘Bo sa ku t'ami tabatin derecho riba e reino, i ku henter Israel tabata mira ami komo nan futuro rei. Pero e derecho ei a bai pa mi ruman, komo SEÑOR a disidí ku ta Salomon ta hañ'é. 16Awor mi ke pidi bo un fabor so, no nenga mi.’ Bat-Shèba a kontestá: ‘Sigui numa.’ 17Adonías a bisa: ‘Hasi mi e fabor di pidi rei pa e laga mi kasa ku Abishag, e shunamita. Abo lo e no nenga.’ 18‘Ta bon, lo mi papia ku rei pa bo,’ Bat-Shèba a kontestá. 19Ora Bat-Shèba a drenta den kuartu di rei Salomon, pa papia kuné riba e asuntu di Adonías, rei a lanta pa risibí su mama i a bùig su dilanti. Despues el a bolbe bai sinta riba trono i a duna òrdu pa nan trese un stul pa e mama; e mama a kai sinta na su man drechi 20i bis'é: ‘Mi ker a pidi bo un fabor chikí, mi no ta spera ku lo bo nenga mi.’ Rei a kontestá: ‘Mi mama, pidi mi loke bo ke, lo mi no nenga bo.’ 21‘Bo por a laga bo ruman Adonías kasa ku Abishag, e shunamita?’ Bat-Shèba a puntra. 22‘Pakiko bo ta pidi mi pa laga Abishag, e shunamita, kasa ku Adonías?’ rei a puntra su mama. ‘Mihó bo pidi mi dun'é mi reino pasobra t'e ta mi ruman mayó. Si bo boga p'e, bo ta boga tambe pa saserdote Abyatar i pa Yoab, yu di Seruya.’ 23E ora ei rei Salomon a hura pa Dios: ‘Dios kastigá mi mal kastigá, si loke Adonías a pidi no kost'é su bida. 24Mi ta hura pa Dios, ku a konfirmá mi outoridat, ku a pone mi riba trono di David, mi tata, i ku di akuerdo ku su promesa a duna mi un dinastia, ku awe mes Adonías ta muri!’ 25Mesora rei Salomon a manda Benayahu, yu di Yoyada, bai hinka Adonías mata.
26Despues rei a bisa saserdote Abyatar: ‘Bai Anatot, kaminda bo tin bo kunuku! Bo meresé morto, pero mi no ta mata bo awor akí, pasobra bo a yega di karga arka di SEÑOR Dios dilanti di mi tata David#2 Samuel 15:24 i bo a pasa den mesun trastornonan ku el a pasa.’#1 Samuel 22:20-23 27Di e manera akí Salomon a kita e funshon di saserdote di SEÑOR for di Abyatar. Asina a keda kumplí loke SEÑOR a bisa na Silo tokante Eli i su famia.#1 Samuel 2:27-36 28Ora Yoab a tende e notisia — e tabata na fabor di Adonías, no na di Absalon — el a hui bai den tènt di SEÑOR i a kohe e kachunan na skina di altá tene. 29Nan a bai bisa rei Salomon ku Yoab a hui bai tènt di SEÑOR i ku e ta pará na altá. E ora ei Salomon a manda Benayahu, yu di Yoyada, bai aya ku e òrdu pa mata Yoab. 30Benayahu a drenta e tènt i a bisa Yoab: ‘Rei ta ordená pa bo sali pafó.’ Pero Yoab a kontestá: ‘Nò, aki mi ke muri!’
Benayahu a bolbe serka rei i a raportá kiko Yoab a bisa. 31E ora ei rei a kontestá: ‘Hasi loke el a pidi. Hink'é mata i der'é. Asina bo ta kita for di mi i for di e desendientenan di mi tata e mancha di sanger inosente ku Yoab a drama. 32SEÑOR laga kulpa di nan morto kai riba e mes, pasobra sin mi tata tabata sa, Yoab a hinka dos hòmber mata. Tur dos tabata mas honrado i mas bon kuné: Abner, yu di Ner, komandante di ehérsito di Israel i Amasa, yu di Yètèr, komandante di ehérsito di Huda. 33Pa semper Yoab i su desendientenan lo mester paga pa nan morto. Pero pas di SEÑOR lo keda ku David i su desendientenan, ku su dinastia i su trono.’ 34E ora ei Benayahu, yu di Yoyada, a bai hinka Yoab mata. A dera Yoab den su kas den desierto. 35Rei a pone Benayahu, yu di Yoyada, na kabes di ehérsito na lugá di Yoab, i saserdote Sadok na lugá di Abyatar.
36Despues el a manda yama Shimi, i bis'é: ‘Traha un kas na Herusalèm i bai biba den siudat. No sali for di siudat bai ningun kaminda, 37pasobra dia bo sali i bo pasa riu Kidron bo ta sigur ku lo bo muri, ta bo mes falta e ora ei.’ 38Shimi a kontestá rei: ‘Ta bon, lo mi hasi loke shon rei a ordená.’ Shimi a biba hopi tempu na Herusalèm. 39Despues di tres aña dos katibu di dje a hui i nan a bai serka Akish, yu di Maaka, ku tabata rei di Gat. Ora a bisa Shimi ku su katibunan tabata na Gat, 40el a lanta, sia su buriku bai Gat, serka Akish, djis pa e buska e katibunan i bini bèk riba e mesun pia. 41Asina Salomon a tende ku Shimi a sali for di Herusalèm i ku el a bai Gat te bini, 42el a manda yama Shimi i bis'é: ‘Mi no a laga bo hura pa Dios? Mi no a atvertí bo ku dia bo sali bai kualke lugá bo ta muri sigur? Bo no a rospondé mi ku ta bon? Bo no a primintí mi ku lo bo obedesé mi? 43Pakiko bo no a kumpli ku bo huramentu na Dios? Pakiko bo no a hasi loke mi a ordená bo?’ 44Ademas rei a bisa Shimi: ‘Bo sa mashá bon kon malu bo a trata mi tata David. P'esei SEÑOR ta laga tur e maldat ei kai bèk riba bo mes kabes. 45Pero ami, rei Salomon, lo ta bendishoná i trono di David lo para firme pa semper dilanti di SEÑOR.’ 46Despues rei a duna òrdu pa Benayahu, yu di Yoyada, bai hinka Shimi mata. Asina e reinado a keda firme den man di Salomon.
Currently Selected:
1 Reinan 2: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013