1 Huan 4
4
Spiritu di Dios i spiritu di e antikristu
1Keridonan, no kere tur hende ku pretendé ku nan tin Spiritu di Dios, sino mira si e spiritu ku nan tin ta pertenesé na Dios. Pasobra ta hopi profeta falsu a sali bai den mundu. 2Ta na lo siguiente boso por mira si hende tin Spiritu di Dios òf nò: si e rekonosé ku Hesus ta e Kristu ku a bini na mundu komo ser humano. E hende akí tin e Spiritu ku ta pertenesé na Dios. 3Ma esun ku no rekonosé i proklamá ken Hesus ta, no ta pertenesé na Dios. Ta e spiritu di e antikristu ta manifestá su mes den e persona ei. Boso a tende kaba ku e spiritu di e antikristu mester bini; wèl, e ta na mundu kaba!#Mateo 7:15; 2 Huan 7
4Mi yunan, boso ta pertenesé na Dios i boso a vense e profetanan falsu, pasobra Esun ku ta den boso ta mas poderoso ku esun ku ta den mundu. 5E profetanan falsu ta pertenesé na mundu, p'esei nan ta papia fo'i punto di bista di mundu, i hende mundano ta tende di nan.#Huan 15:19 6Ma nos ta pertenesé na Dios; esnan ku konosé Dios ta tende di nos, ma esnan ku no konos'É no ta tende di nos.#Huan 8:47 T'asin'akí anto nos por diserní ken tin e Spiritu di bèrdat i ken tin e spiritu di engaño.
Dios ta amor
7Keridonan, laga nos stima otro, pasobra amor ta bini di Dios. Tur ku ta stima a nase di Dios i konosé Dios. 8Esun ku no ta stima, no konosé Dios, pasobra Dios ta amor. 9Na esaki nos ta mira Dios su amor pa nos:#4:9 Dios su amor pa nos; otro posibel tradukshon: Dios su amor El a manda su úniko Yu na mundu, pa asina nos biba pa medio di djE.#Huan 3:16 10T'esaki ta amor: no ta nos a stima Dios promé, sino t'É a stima nos i a manda su Yu pa E bira e sakrifisio pa pordon di nos pikánan.
11Keridonan, si t'asina Dios a stima nos, nos tambe mester stima otro! 12Nunka niun hende no a yega di mira Dios,#Huan 1:18 ma si nos stima otro, Dios ta biba den nos i su amor ta keda realmente perfekshoná den nos.
13E prueba ku nos ta keda den Dios i ku E ta keda den nos, ta ku El a duna nos su mes Spiritu.#Romanonan 8:9; 1 Huan 3:24 14I nos a mira i ta testiguá ku Dios Tata a manda su Yu komo Salbador di mundu.#Huan 3:17 15Esun ku rekonosé i proklamá ku Hesus ta Yu di Dios, Dios ta keda den dje i e ta keda den Dios. 16Asina nos a haña sa i kere ku Dios ta stima nos. Dios ta amor i esun ku ta biba ku amor ta keda den Dios i Dios ta keda den dje. 17Asin'akí amor ta keda realmente perfekshoná den nos, esta ora nos tin konfiansa riba dia di huisio, pasobra aki na mundu kaba nos ta biba ku amor meskos ku Hesus. 18Kaminda tin amor, no tin miedu, al kontrario, amor realmente perfekshoná ta kore ku miedu. Miedu tin di aber ku kastigu, p'esei amor di un hende ku ainda tin miedu no a yega na perfekshon.
19Nos ta stima, pasobra Dios a stima nos promé! 20Si un hende bisa: ‘Mi ta stima Dios’, pero e no ta stima su ruman, e ta un gañadó! Pues si un hende no por stima su ruman, ku e ta mira, e no por stima Dios, ku e no ta mira, tampoko. 21Esun ku ta stima Dios mester stima su ruman tambe; esei ta e mandamentu ku nos a haña di djE.#Mateo 5:44-45; Marko 12:29-31
Currently Selected:
1 Huan 4: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013