1 Huan 3
3
Yunan di Dios
1Mira kuantu Dios Tata ta stima nos: E ta pèrmití nos karga e nòmber ‘yu di Dios’!#Huan 1:12 Anto enberdat esei nos ta tambe! Ta p'esei mes esnan ku ta sigui mundu no sa ken nos ta, pasobra nan no a siña konosé Dios. 2Keridonan, awor akí nos ta yu di Dios i ounke te ainda no ta revelá loke nos lo bira, nos sa ku ora Kristu bini nos lo ta manera E, pasobra nos lo mir'É manera E ta en realidat. 3Anto esun ku ta karga e speransa akí den Kristu, ta mantené su mes puru, meskos ku Kristu mes tambe ta puru!
4Ken ku sigui den piká ta promové anarkia, pasobra piká ta rebeldia kontra Dios. 5I boso sa ku ta pa kita piká Kristu a bini#Huan 1:29 i ku den djE no tin piká. 6P'esei es ku keda den djE, no ta sigui den piká. Ma ken ku sigui hasi piká no a konos'É ni sa ken E ta.
7Mi yunan stimá, no laga niun hende pone boso desviá. Ta e hende ku hasi loke ta agradabel den Dios su bista ta hustu, meskos ku Kristu ta hustu. 8Esun ku sigui den piká ta pertenesé na diabel, pasobra ta for di kuminsamentu di mundu kaba diabel a bini ta peka. Anto ta pa destruí diabel su obranan mes Hesus a bini.#Hebreonan 2:14-15
9Es ku a bira yu di Dios no ta sigui den piká, pasobra e poder dibino ku ta duna bida ta biba den dje, i komo Dios ta su Tata, e no por sigui den piká. 10Na esaki nos ta rekonosé ken ta yu di Dios i ken ta yu di diabel: esun ku no ta hasi loke ta hustu den bista di Dios, no ta pertenesé na Dios, i spesialmente esun ku no ta stima su ruman.
Stima otro
11Ta e mensahe akí mes boso a tende for di kuminsamentu: ku nos mester stima otro.#Huan 13:34; 15:12 12Nos no mester hasi manera Kain, ku tabata pertenesé na e malbado i a asesiná su mes ruman Abel!#Génesis 4:8 Anto pakiko el a asesin'é? Pasobra Kain mes tabata hasi maldat, ma su ruman sí tabata hasi loke ta hustu. 13Ke men anto, rumannan, no keda sorprendí ku mundu ta odia boso. 14Pasobra nos ta stima nos rumannan, nos sa ku nos sí a pasa di morto pa bida.#Huan 5:24 Esun ku no ta stima, ta sigui den gara di morto. 15Ken ku odia su ruman ta igual na un asesino i nos sa ku un asesino no por keda ku bida eterno den dje. 16Ata kon Hesus a siña nos kiko ta amor: El a entregá su bida pa nos.#Huan 15:13 Asina nos tambe ta obligá di entregá nos bida pa nos rumannan. 17Un hende ku ta poseé hopi kos di mundu i ta sera su kurason pa su ruman ku e ta mira den nesesidat, kon un hende asina por tin amor di Dios den dje? 18Mi yunan stimá, no laga nos stima ku boka i palabra so, ma laga nos stima di bèrdè mes, ku echo!
Konfiansa dilanti di Dios
19Ta asin'ei nos lo haña sa si nos ta pertenesé na e Dios berdadero i tambe si nos por keda ku un kurason trankil dilanti di Dios, 20ki ora#3:20 ki ora ku; otro posibel tradukshon: maske ku nos kurason ta kondená nos. Pasobra nos sa ku Dios ta mas grandi ku nos mes kurason, i E sa tur kos. 21Keridonan, si nos kurason no kondená nos, esei ta nifiká ku nos por bai serka Dios ku konfiansa, 22i nos ta haña tur kos ku nos pidiÉ, pasobra nos ta obedesé su mandamentunan i ta hasi loke ta agrad'É. 23Anto Dios su mandamentu ta: kere den e persona di su Yu Hesu-Kristu i stima otro manera El a manda nos.#Huan 13:34; 15:12,17 24Esun ku obedesé Dios su mandamentunan ta keda den Dios i Dios ta keda den dje. Anto ku E ta keda den Dios, nos sa pasobra nos tin e Spiritu ku El a duna nos.
Currently Selected:
1 Huan 3: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013