Lamentashonnan 5
5
Trese nos atrobe serka Bo!
1Kòrda, o SEÑOR, loke a pasa nos.
Wak kon nan ta brongosá nos!#Salmonan 44:9-26; 74; 79
2E pais, ku Bo a duna nos, den man di enemigu e ta,
otro hende ta biba den nos kas.
3Nos tatanan no t'ei mas,
wérfano nos ta, nos mamanan ta biuda.
4Asta p'e awa di bebe nos tin ku paga,
e palu pa sende kandela nos mester kumpra.
5Nos persiguidónan ta konstantemente nos tras,
nos ta morto kansá, pero nan n' ta laga nos na pas.
6Pa nos por tin sufisiente kuminda,
nos a pidi limosna serka Egipto i Asiria.
7Nos grandinan — nan n' t'ei mas — a hasi piká,
i awe ta nos ta karga konsekuensia.
8Awor katibu a bira nos shon
i no tin hende pa ranka nos fo'i nan man.
9Pa buska kuminda nos ta riska nos bida
kontra trupanan armá den desierto.
10Hamber a duna nos kayent'i kurpa,
nos kurpa ta kima di keintura.
11Den Herusalèm i siudatnan di Huda
nan ta violá nos hende muhé- i hobensitanan.
12Ta kologá nos gobernantenan na nan man
i no tin niun klase di rèspèt pa hende grandi mas.
13Yònkumannan mester púluwe na piedra di mulina,
mucha hòmbernan ta kasi desmayá bou di karga di palu.
14Ansianonan no ta duna konseho mas na porta di siudat,
hòmbernan mas hóben no ta toka mas.
15Nos kurason no ta kontentu,
nos no ta balia mas, nos ta blo yora malai.
16No a sobra nada mas ku por ta nos orguyo.
Ai di nos, nos a hasi piká!
17Si nos kurason a bira suak i enfermo,
nos wowo skur di lágrima,
18ta pasobra seru di Sion ta ún solo desolashon,
un lugá pa chakalnan ronkoná.
19Pero Abo, SEÑOR, Abo ta keda rei te den eternidat.
Bo trono ta pará firme tur tempu.#Salmonan 102:12; 145:13; 146:10
20Pakiko lo Bo lubidá nos pa semper
i bandoná nos pa restu di nos bida?#Salmo 74:1
21SEÑOR, trese nos bèk serka Bo, pa nos bolbe di bèrdè.
Laga nos bida bolbe bira manera ántes!#Salmo 80:3-7; Yeremías 31:18
22O akaso Bo a rechasá nos pa semper
i no ta pone un fin na bo rabia?
Currently Selected:
Lamentashonnan 5: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013