Lamentashonnan 4
4
Sufrimentu di pueblo i delaster dianan di Herusalèm
1Aiaiai, esta dòf e oro a bira,
e oro puru a pèrdè tur su brio!
A benta tur piedra presioso afó,
nan ta plamá na tur skina di kaya.
2E yunan balioso di Sion,
ku ta bal nan peso na oro,
awor ta tratá manera poron sin balor,
manera produkto di trahadó di klei.
3Chakal muhé mes ta laga
su yunan bebe lechi,
pero mi pueblo ta kruel
manera abestrus#4:3 abestrus: e abestrus tabatin e reputashon di ta mal mama, pasobra e tabata laga su webunan trankil den solo pa nan brui den sabana.
4Bebinan tin asina tantu set,
ku nan lenga ta pega na nan shel'i boka.
Muchanan ta kana pidi pida pan,
no tin niun hende pa duna nan.
5Hende ku ántes tabata kome solamente kos dushi,
ta bentá den kayanan muriendo di hamber.#2 Reinan 25:3; Yeremías 52:6
Esnan nasé ku kuchara di plata den boka,
awor ta koba den ko'i sushi pa buska kuminda.
6Esta grandi maldat#4:6 maldat; otro posibel tradukshon: kastigu di mi pueblo ta!
Mas grandi ku piká di habitantenan di Sódoma,
ku a mira nan siudat destruí den un fregá di wowo,
sin ku hende a hisa man kontra dje.#4:6 sin…dje; otro posibel tradukshon: sin ku niun hende a haña chèns pa reakshoná#Génesis 19:24
7Semblante di nos prínsipenan#4:7 prínsipenan; literalmente: nazireonan, hende konsagrá tabata bria mas ku sneu,
nan tabata mas blanku ku lechi,
nan brasa- i pianan tabata kòrá manera koral,
nan benanan blou ni safiro.
8Awor nan a bira mas pretu ku breu,
riba kaya niun hende n' ta rekonosé nan mas.
Nan ta kueru riba wesu,
nan a para seka manera pènch'i palu.
9Esnan ku a kai den bataya ta mihó pará
ku esnan ku a muri di hamber,
ku a tisga pokopoko
pa falta 'i fruta di tera.
10Mamanan, tòg semper kurason moli,
awor ta kushiná nan yunan ku nan propio man,
pa nan por tin algu di kome
durante destrukshon di mi pueblo.#Deuteronomio 28:56-57; Lamentashonnan 2:20; Ezekiel 5:10
11SEÑOR a deskargá tur su rabia,
lòs su furia ardiente lag'é bai;
El a sende un kandela na Sion,
ku a destruí tur kos kompletamente.
12Niun di e reinan di mundu,
nò, niun hende na mundu no por a kere nunka
ku un dia un ehérsito enemigu
lo por a drenta portanan di Herusalèm.
13Pero piká di su profetanan ta e kousa,
ta falta di su saserdotenan,
ku a laga sanger drama den siudat,
sanger di hende inosente i hustu.
14Nan a kana dualu den siudat,
fula fula manera hende siegu;
dje sushi na sanger ei nan tabata
ku niun hende no ta'tin mag di mishi ku nan.#Numbernan 19:11-16
15Ora nan yega serka, pueblo tabata grita:
‘Paga tinu! Hende impuru! Hala leu no mishi ku nan!’
E ora ei nan a hui bai, keda dualu.
Pero hende di otro pueblo a bisa: ‘Serka nos nan no por keda!’
16SEÑOR mes a kore ku nan,
pasobra E no ker a mira nan ni pintá.
Hende no tabata respetá saserdotenan mas,
nan no tabatin lei ni ku esnan mas bieu bou di nan.
17Nos a spera i spera yudansa,
pero enbano, e no a bini.
Nos a keda pendiente di binida
di un pueblo ku tòg no por a salba nos.#Yeremías 37:5-10
18E enemigu tabata spioná nos, kada paso ku nos tabata dal,
di manera ku nos no a riska subi kaya mas.
E fin tabata aserkando, nos dianan tabata kontá
i diripiente, at'é fin!
19E enemigu a persiguí nos,
mas rápido ku kinikini.
Nan a persiguí nos te den serunan,
te den desierto nan a drumi lur nos.
20Nos a pensa ku bou di protekshon di nos rei
nos lo por a tuma nos lugá den nashonnan.
Pero e hende akí, di ken nos bida tabata dependé,
e rei, skohí dor di SEÑOR, awor ta changá den nan trampa.#2 Reinan 25:4-6; Yeremías 39:4-6
21Habitantenan di Edom, hari numa,
sinti kontentu numa, hendenan bibá na Us.
Boso tambe mester bebe dje beker di Dios su furia,
i unabes fuma, boso lo kita blo sunú.
22O dushi siudat di Sion, lo yega un fin na bo kastigu,#Isaías 40:2
Señor lo no tene bo mas den eksilio.
Pero abo, Edom, abo sí E ta bai kastigá
i laga tur bo pikánan sali na kla.#Abdías 1-12
Currently Selected:
Lamentashonnan 4: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013