2 Timoteo 3
3
Tempu difísil ta na kaminda
1Sa ku den e último dianan lo bini temporada difísil, 2pasobra hende lo stima nan mes mas ku tur kos. Nan lo ta golos pa plaka, bromadó i arogante; nan lo blasfemá Dios, desobedesé nan mayornan i nan lo ta malagradesido. Nan lo no respetá loke ta di Dios; 3nan lo no tin kariño i nan lo no ke sera pas ku otro. Nan lo ta hasidó di redu, hende ku no por kontrolá nan mes, hende violento ku ta odia loke ta bon. 4Nan lo traishoná otro i hasi kos pa loko. Nan lo ta hende hinchá di orguyo, ku ta stima plaser mas ku nan ta stima Dios. 5Nan lo hasi manera nan ta mashá ku Dios, kaba nan a nenga e poder real di fe kristian. Keda leu for di hende asina, 6pasobra algun di nan ta slùip drenta kas i manipulá e damsnan débil ku ta hoga den piká i ku ta laga tur sorto di mal deseo lastra nan. 7E muhénan ei ta hende ku ta kana buska kos di siña konstantemente, sin nunka yega na un konosementu real di bèrdat.
8Meskos ku Yanes i Yambre a bai kontra Moises,#Éksodo 7:11 asina e siñadónan falsu akí ta rechasá bèrdat. Nan ta hende mente korumpí ku a frakasá den fe. 9Pero nan lo no yega leu, pasobra tur hende lo nota ku nan ta bobo meskos ku e dosnan ku a bai kontra Moises.
Último enkargo pa Timoteo
10Pero abo sí a sigui loke mi a siña bo, mi manera di biba, mi meta den bida, mi fe, mi pasenshi, mi amor i mi perseveransia. 11Bo a tuma parti den mi persekushon i den e sufrimentunan ku mi mester a wanta na Antiokia,#Echonan 13:14-52 Ikonio#Echonan 14:1-7 i Listra.#Echonan 14:8-20 — Anto esta hopi persekushon mi a haña mi aden! — Pero Señor a liberá mi di tur e kosnan ei! 12Ta asina bèrdè, tur hende ku ke hiba un bida dediká na Dios i den union ku Kristu-Hesus, lo haña nan ku persekushon, 13i hende malbado i gañadó lo bira dia pa dia pió. Nan lo sigui gaña hende i hende lo sigui gaña nan.
14Pero abo, sigui loke bo a siña i ta konvensí di dje, pasobra bo sa ta ken a siña bo. 15Ademas kòrda tambe ku abo konosé Skritura Sagrado fo'i chikí; Skritura por instruí bo i duna bo e sabiduria ku ta hiba na salbashon pa medio di fe den Kristu-Hesus. 16Henter Skritura ta inspirá pa Dios i ta útil pa duna siñansa, refutá, koregí i pa instruí kon biba un bida rekto, 17di manera ku e hende ku ta sirbi Dios, por ta kualifiká i bon prepará pa hasi tur sorto di bon obra.
Currently Selected:
2 Timoteo 3: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013