2 Timoteo 2
2
Un bon sòldá di Kristu-Hesus
1P'esei abo, mi yu, sea fuerte pa medio di e grasia ku Kristu-Hesus ta duna. 2Pasa e siñansa ku bo a haña di mi den presensia di hopi testigu pa hende konfiabel, kapasitá pa siña otro hende tambe.
3Mira pa bo tambe karga parti di e sufrimentu, manera ta toka un bon sòldá di Kristu-Hesus. 4Niun sòldá ku ta den servisio militar no ta mete ku asuntu sivil, pasobra e tin ku komplasé su superior. 5Meskos tambe, un atleta no por gana e krans di viktoria, si e no kompetí di akuerdo ku e reglanan. 6E kunukero, ku a kansa kurpa, tin derechi di haña e promé parti di kosecha. 7Reflekshoná riba loke mi ta bisa bo, pasobra Señor mes lo duna bo komprondementu den tur kos.
8Kòrda riba Hesu-Kristu, ku Dios a lanta for di morto i ku ta desendiente di rei David. Esei ta e bon notisia ku mi ta prediká. 9Ta pasobra mi ta prediká e bon notisia akí mes, mi ta sufri asin'akí na man di hende i ta asta na kadena manera un kriminal! Pero no por bui Palabra di Dios sí! 10P'esei mi ta sufri tur kos pa kousa di esnan ku Dios a skohe, ya nan tambe por haña e salbashon ku Kristu-Hesus ta duna i e gloria eterno. 11E palabranan ku ta sigui ta konfiabel:
Si nos a muri huntu ku Kristu, nos lo biba huntu kunÉ.
12Si nos perseverá, nos lo reina huntu kunÉ tambe.#1 Pedro 5:1
Si nos neng'É, E tambe lo nenga nos.#Mateo 10:33; Lukas 12:9
13Si nos no ta fiel n'E, E sí ta keda fiel na nos,
pasobra E no por bai kontra su mes.
E aktitut ku Timoteo mester tin
14Kòrda bo hendenan riba e kosnan akí i atvertí nan seriamente, ku Dios komo testigu, ku nan mester evitá diskushon sin sentido. E tipo di diskushon akí no ta yuda niun hende ku nada, pero ta hasi daño na esnan ku ta skucha. 15Hasi bo máksimo esfuerso pa presentá bo mes na Dios komo un trahadó ku E ta aprobá, un trahadó ku ta siña hende e mensahe di bèrdat korektamente, sin hasi nada pa pone su mes kara na bèrgwensa. 16Evitá kòmbersashon profano i bashí, pasobra esnan ku hiba tipo di kòmbersashon asina, lo sigui alehá mas i mas di Dios. 17I loke nan ta papia, lo plama manera kanser, manera a pasa den kaso di Himeneo i Fileto. 18Nan a desviá di e bèrdat i bisa ku ya e resurekshon di morto a tuma lugá i asina nan a pone fe di otro hende tambaliá.
19Sinembargo e fundeshi sólido ku Dios a pone, ta keda firme i den e fundeshi tin un inskripshon ku ta bisa:
‘Señor konosé esnan ku ta pertenesé n'E’#Numbernan 16:5; Huan 10:14; 1 Korintionan 8:3
i ‘Tur esnan ku invoká nòmber di Señor
mester kita leu for di maldat’.
20Den un kas grandi bo ta haña opheto di oro i di plata, pero tambe di palu i di klei; algun ta di balor i otro no tin balor. 21Siñadó falsu ta manera e kosnan sin balor. Ora un hende deshasí di nan, e ta bira algu di balor. E ora ei e ta spesial i útil pa su doño, prepará pa hasi tur sorto di bon obra.
22Abo kore pa e pashonnan di hubentut i buska hustisia, fe, amor i pas, huntu ku esnan ku ta invoká Señor ku un kurason limpi. 23Rechasá diskushon sin pia sin kabes, pasobra manera bo sa, nan ta kaba na pleitu. 24Un sirbidó di Señor no mester pleita, pero mester trata tur hende ku kariño. E mester por ta un bon maestro, un hende ku pasenshi, 25i e mester koregí esnan ku ta kontra dje ku suavidat. Pasobra tal bes Dios por duna e hendenan ei oportunidat di kombertí i yega na un konosementu real di e bèrdat. 26E ora ei nan por bini bei i skapa di e trampa ku diabel a gara nan aden pa pone nan hasi loke e ke.
Currently Selected:
2 Timoteo 2: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013