2 Tesalonisensenan 3
3
Petishon pa orashon
1Pa terminá, rumannan, resa pa nos, pa meskos ku serka boso, e palabra di Señor sigui plama lihé i pa e hendenan risibié ku honor. 2Resa tambe pa Dios libra nos di hende perverso i malbado, pasobra no ta tur hende tin fe.
3Pero Señor ta fiel, lo E fortalesé boso i warda boso di e malbado. 4Nos ta konvensí ku Señor ta laga boso hasi loke nos a manda boso i ku boso ta sigui hasié.
5Señor dirigí boso kurason pa boso por komprondé e amor ku Dios tin pa boso i pa boso por tin konstansia manera Kristu.
No anda ku rumannan ku ta biba un bida indisipliná
6Rumannan, den nòmber di nos Señor Hesu-Kristu, nos ta ordená boso pa no anda ku niun ruman ku ta hiba un bida indisipliná i no di akuerdo ku e instrukshonnan ku nos a duna nan. 7Pasobra boso mes ta konsiente kon boso mester sigui nos ehèmpel: nos no a hiba un bida indisipliná tempu nos tabata huntu ku boso, 8ni nos no a kome pan di niun hende sin paga. Al kontrario, di dia i anochi nos a traha duru i púluwe pa nos no ta un peso pa niun di boso.#Echonan 18:3; 1 Tesalonisensenan 2:9 9No ku nos no tabatin derecho di pidi boso yuda nos, pero nos a traha pa duna boso e ehèmpel ku boso mester sigui.
10En bèrdat, tempu nos tabata huntu ku boso nos a duna boso e siguiente regla: Es ku no ke traha no ta kome! 11A yega na nos orea ku tin algun hende serka boso ku ta hiba un bida indisipliná; nan no ta buska trabou pa hasi, pero ta traha trabou di otro hende! 12Den nòmber di Señor Hesu-Kristu, nos ta ordená i enkargá e rumannan ku ta biba asina pa traha pa nan pan den tur trankilidat.
13Pero rumannan, boso sí no mester kansa di hasi bon.#Galatanan 6:9 14Wak ken no ke obedesé loke nos a bisa den e karta akí. No asosiá kuné, ya esei ta brongos'é. 15Ma no trat'é manera enemigu sí; hala su atenshon manera ta hasi ku un ruman.
Saludo final
16Señor ku ta duna pas, duna boso e pas ei tur ora i bou di tur sirkunstansia. Señor sea ku boso tur! 17Awor ta mi mes ta skibi esaki:
Kumindamentu di Pablo! Ta asin'akí mi ta firma tur mi kartanan; ta asin'akí mi ta skibi.
18Grasia di nos Señor Hesu-Kristu sea ku boso tur.
Currently Selected:
2 Tesalonisensenan 3: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013