2Makabeo 3
3
3. TANTARAN’I HELIODORO
1Raha mbola tao anatin’ny fandriam-pahalemana tanteraka ny mponina tao amin’ny tanàna masina, sady mbola voatandrina tsara ny lalàna, noho ny fitiavam-bavak’i Oniasa#3,1 i Oniasa fahatelo: dia mpisorona lehibe tamin’ny taona 196 talohan’i Jesoa Kristy. Jereo ny filazana azy ao amin’ny toko 4,2; 15,12. mpisorona lehibe sy ny fankahalany ny ratsy, 2na ny tenan’ireo mpanjaka aza nety nanaja ny fitoerana masina, sy nandravaka ny tempoly tamin’ny fanomezana kanto; 3hany ka i Seleokosa#3,3 I Seleokosa: izy no atao hoe: Seleokosa Filôpatora (187-176 talohan’i Jesoa Kristy); zokin’i Antiôkosy Epifana lahy matoa sady mpanjaka nodimbiasany. mpanjakan’i Asia aza no niantoka ny lany rehetra amin’ny fanaovana ny sorona, avy amin’ny zavatra niditra ho azy.
4Nisy Simôna anankiray izay anefa, avy amin’ny firenen’i Benjamina, voatendry ho mpanapaka ny Tempoly#3,4 Mpanapaka ny Tempoly: Tonian’ny fitandremana sy fikarakarana ny Tempoly amin’ny zavatra hafa fa tsy ny momba ny fivavahana; satria izy io dia fokon’i Benjamina; koa tsy mpisorona na Levita akory izy, ka tsy mahazo mikasika momba ny fivavahana, fa ny zavatra eo ivelany ihany no azony iadidiana., rafitra niady tamin’ny mpisorona lehibe, amin’ny momba ny fitandremana ny tsena ao an-tanàna. 5Tsy afa-nandresy an’i Oniasa izy, ka lasa nankany amin’i Apôlôniosa zanak’i Trasea, governoran’i Sele-Siria sy i Fenesia momba ny foloalindahy tamin’izany andro izany. 6Nolazainy tamin’io fa ny andro firaketana ao Jerosalema dia feno vola mihoa-pampana, misy harena tsy hita pesipesenina, tsy mifanentana velively amin’ny lany amin’ny zavatra ilaina hanaovana sorona, ary azo afindra ho eo an-tanan’ny mpanjaka avokoa izany rakitra izany.
7Nony tafaresaka tamin’ny mpanjaka i Apôlôniosa, nampandrenesiny azy izany harena voalaza taminy izany, ka nanendry an’i Heliodoro#3,7 I Heliodoro: Angamba izy io ihany ilay voalaza ho namono an’i Seleokosa faha-4 tatỳ aoriana kely. izay voatendry hitondra ny raharaham-panjakana ny mpanjaka, dia naniraka sy nanome teny an’io haka izany harena voalaza izany. 8Niainga niaraka tamin’izay i Heliodoro mody hoe hizahazaha ny tanànan’i Sele-Siria sy i Fenesia, kanjo ny hanatanteraka ny hevitry ny mpanjaka no tena fotony.
9Nony tonga tao Jerosalema i Heliodoro, nandray azy tamim-pitiavana ny mpisorona lehibe tao an-tanàna; dia notantarainy ny zavatra reny; nasehony ny antony nahatongavany; ary nanontaniany na marina tokoa ny zavatra reny, na tsia. 10Ka nasehon’ny mpisorona lehibe taminy, fa zavatra napetraky ny mpitondratena sy ny kamboty#3,10 Zavatra napetraky ny mpitondratena sy ny kamboty. Afa-tsy ny rakitra izay natokana hikarakarana ny raharaham-pivavahana, dia fomba fanaon’ny Jody ny mahafoy vola ho an’ny tempoly, mba hahazo ny tso-dranon’Andriamanitra. Tadidio ilay mpitondratena noderain’i Jesoa Kristy ao amin’ny Evanjely, fa nanome vola iray denie, nalatsany tao amin’ny vatan-drakitra tao an-Tempoly. no ao amin’ny rakitra; 11ny sasany koa an’i Hikàna zanak’i Tobia, lehilahy manan-kaja indrindra; ary tsy izay nolazain’i Simôna mpanendrikendrika mankahala fivavahana akory no tena toe-javatra, fa ny tontalin’ny harena ao dia talenta volafotsy 400, sy talenta volamena 200; 12sady tsy azo atao velively ny mamabo ny an’ireo natoky noho ny fahamasinan’io fitoerana io, sy noho ny fiambonian’ny tempoly, tsy azo inaikanaikana, hajaina eran’izao tontolo izao.
Taitra ny tanàna
13Nilaza mihitsy anefa izy io, noho ny didy azony tamin’ny mpanjaka, fa tsy maintsy hoentina ho any an-trano firaketan’ny mpanjaka izany vola izany.
14Koa rehefa noferany ny fotoan’andro, dia handeha hiditra izy hizaha izany harena izany, alohan’ny hanapahany izay hanaovany azy; ka tabataba lehibe no velona tao an-tanàna manontolo noho izany. 15Niankohoka teo anoloan’ny ôtely ny mpisorona, nitondra ny akanjony fisoronana, niandrandra ny lanitra, nivavaka amin’Ilay nanao ny lalàna momba ny zavatra napetraka, mba hitahirizany tsy misy afaka izany harena izany ho an’izay nametraka azy. 16Voatsindrona lalina indrindra ny fo, raha nijery ity tarehin’ny mpisorona lehibe, fa niseho tamin’ny endriny sy ny fiovan’ny tarehiny, ny fanahiana nanjò ny fanahiny. 17Ny fahatrotrahana niseho tamin’ny tenany manontolo sy ny fangovitry ny vatany koa dia nampiharihary ny fahorian’ny fony, teo imason’ny olona rehetra. 18Nidodododo nanao andiany ny mponina nivoaka ny tranony, dia niara-nivavaka avokoa, mba tsy hihatra amin’ny fitoerana masina izato fanalam-baraka. 19Ny lalam-be rakotry ny vehivavy, voatafy malailay ny tratrany; izay zazavavy nihiboka#3,19 Izay zazavavy mihiboka: Fomban’ny Tatsinanana ny tsy ivoahan’ny zazavavy eo ivelan’ny trano raha tsy amin’ny asa tsy maintsy ataony ihany. dia nidodododo koa, ny sasany nankeny amin’ny manda, ny sasany kosa nijery teo am-baravarankely, 20samy nanandra-tanana mankany an-danitra nandefa fitarainana. 21Nampangorakoraka ny hareraham-pon’ireto vahoaka nifanjevo, sy ny fanahian’ity mpisorona lehibe feno tebiteby. 22Ny Jody tamin’izany nitaraina tamin’ny Tompo mahefa ny zavatra rehetra, hitahiry tsy hahafahana, sady tsy hisy hahakasika azy, ny zavatra napetraka mba ho an’izay nametraka azy. 23I Heliodoro kosa efa nanatanteraka ny fikasany.
Sazin’i Heliodoro
Tamin’izy mbamin’ny mpanaraka azy efa mby teo akaikin’ny trano firaketana, 24no nanaovan’ny Tompon’ny fanahy sy mpanapaka ambonin’ny fahefana rehetra fampisehoana lehibe, hany ka izay rehetra sahy nankeo, azon’ny herin’Andriamanitra, tsy nanan-kery hahavita na inona na inona, sady nivadi-po avokoa. 25Niseho teo imason’izy ireo ity soavaly taingenan’olona mahatsiravina#3,25 Soavaly taingenan’olona mahatsiravina: Izany dia Anjely maka tarehin’olombelona, mba hampivarahontsana ireo fahavalon’ny Jody., ary voarakotra lamba sarobidy, miezaka mirimorimo, nampitsikaroka ny tongony anoloana, teo ambonin’i Heliodoro; ary toa fiadiana volamena no hita teny amin’ilay mpitaingin-tsoavaly. 26Niaraka tamin’izay koa indreo niseho taminy ny zatovo roa lahy, feno herim-po, namirapira-pahazavana lehibe, nitondra akanjo kanto loatra; teo an-daniny avy izy no nijoro, dia nikapoka azy tsy an-kijanona, nataony vely kary. 27Niankarapoka tampoka tamin’ny tany i Heliodoro sady voahodidin’ny haizim-pito, dia notakonina natao teo amin’ny filanjana anankiray, 28ka ilay lehilahy, vao avy niditra tao amin’ny efitrano nisy ny rakitra voalaza, notronin’ny mpihazakazaka sy ny mpiambina mitam-piadiana rehetra, dia indro nobetaina tsy nahazaka tena, hita maso ho nidonan’ny herin’Andriamanitra. 29Dieny mbola teo ihany izy, nianjeran’ny kapoky ny herin’Andriamanitra, miampatra tsy mahateny, mamoy fo sy tsy manan-kamonjy intsony; 30ny Jody kosa nisaotra ny Tompo, fa nomeny voninahitra ny fitoerana masina, ary ny tempoly izay vao teo no teo no feno fivadiham-po sy fikorontanana, tonga feno hafaliana amam-piravoravoana, noho ny fanehoana nataon’ny Tompo tsitoha.
31Niaraka tamin’izay, ny sasany tamin’ireo naman’i Heliodoro nangataka tamin’i Oniasa hivavaka amin’ny Avo indrindra sy hamelona an’itsy mitsitra eroa#3,31 Itsy mitsitra eroa: I Heliodoro io, izay niankarapoka tsy nahatsiaro tena; satria mpaniratsira ny zavatra masina, ka na dia tsy voasazy teto an-tany aza izy, dia tsy maintsy handray ny valiny any an-koatra., efa tsy misy afa-tsy aina kely foana. 32Ary ny mpisorona lehibe natahotra fandrao ny mpanjaka hihevitra ny Jody ho nitady hamono an’i Heliodoro, ka dia nanolotra sorona ho an’ny ain-dralehilahy. 33Mbola manolotra ny sorona fifonana eo ny mpisorona, dia niseho tamin’i Heliodoro indray ireo zatovo, nitondra ny akanjony teo ihany, ary nitsangana izy no nilaza taminy hoe: «Omeo fisaorana lehibe i Oniasa mpisorona lehibe, fa noho izy ihany no amelan’ny Tompo anao ho velona. 34Fa ianao kosa, rehefa nofaiziny toy izao, torio amin’ny olona rehetra ny fahefan’Andriamanitra lehibe.» Nony voalazany ireo teny ireo, dia lasa tsy hita intsony izy.
Ny nibebahan’i Heliodoro
35Nanatitra sorona ho an’ny Tompo i Heliodoro sy nanao voady lehibe tamin’Ilay namelona ny ainy. Raha efa izany, nanome toky an’i Oniasa fa hihavana aminy izy; dia niverina niaraka tamin’ny miaramilany, ho any amin’ny mpanjaka. 36Ary nataony tsara laza tamin’ny olona rehetra, ny asan’Andriamanitra lehibe hitany maso. 37Nanontanian’ny mpanjaka an’i Heliodoro, izay olona tokony hirahina ho any Jerosalema indray, ka izao no navaliny azy: 38«Raha manana fahavalo na rafilahy amin’ny fanjakana ianao, dia izay irahina any, fa ho kotiky ny kapoka izy, vao ho tafaverina atỳ aminao, raha tahiny ka mba afaka ihany; fa misy hery avy amin’Andriamanitra marina amin’io fitoerana io. 39Ilay manana ny fonenany any an-danitra no miambina io fitoerana io, dia asiany sy ataony levona mihitsy.»
40Izany no zava-nitranga momba an’i Heliodoro, sy ny nahatanana ny rakitra masina.
Currently Selected:
2Makabeo 3: MBC
Highlight
Share
Copy
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.