Mika 1
1
1No a fare ge Bage ɗiŋnedin ne jya̰ Mika ndu ge suwal Morechet ne ne. Jya̰ na fare mbe zaman ge gan Yotam, ne Ahaz, ne Ezekiyas, gan ma ge suwal Yuda ne go. No a fare ge Bage ɗiŋnedin ne dya̰ na Mika ta daalam zi ne suwal Samariya ma ne Ursalima pe ne:
Bage ɗiŋnedin kaŋge na ɓase ma
2Za̰ me, ɓase ma pet!
O suwar, ne naa ge ne mo pal ma mwaɗak,
só me aŋ togor.
Bageyal, Bage ɗiŋnedin,
mbo mbo ne na zok ge mbegeya zi ya kaŋge aŋ.
3Ndi, Bage ɗiŋnedin wat ja ne na swaga katɗa zi ya,
kan na koo ja se,
mbo ya suwar swaga ge haal ma digi.
4Ge na koo pul ma se, njal ma ka ɗese se,
baal pul ma ka wage ta se,
dimma ne daaram fegem ne ɗese ol zi go,
dimma ne mam ne ɓul ne swaga ge pa̰sol digi ya se go.
5Kaŋ mbe ma no pet a mbo ya
da ne wak kuriya ge Yakub vya ma ne pe,
ne sone kerra ma ge Israyela vya ma ne pe.
A wuɗi é Yakub vya ma ke sone ne ɗaa?
Te be Samariya to’a?
A wuɗi é suwal Yuda wat sḭḭm zi ne ɗaa?
Te be Ursalima to’a?
6Mbi mbo burmi suwal Samariya se,
mbo ga swaga ɗḭ oyo̰r.
Mbi mbo viŋgri na njal ma mbo kan baal pul se ya,
mbi mbo gul na ɗiŋ mbo á na pe ge ndegɗe se ya.
7Na kaŋ sḭḭm ma pet a mbo gul nama uzi,
na kaŋ ge ne ɓó ne na sḭḭm mbe ma ta, a mbo til nama uzi.
Mbi mbo ɓá na kḭḭm ɗeereya ma uzi pet,
na kaŋ ma ge ne ɓó ne kaya kerra ge na sḭḭm ne zi ma,
a mbo saŋge pot naa ge ke kaya ge ɗogle ma ne na.
Sun tene ge anabi ne Yuda suwal ma pal
8Ne no pe, mbi mbo ka sun tene, ne fyaso,
mbi mbo ka anna koo suwar zi, swala baŋ,
mbi mbo ka fyalla dimma ne ha̰na go,
mbi mbo ka sun tene dimma ne gugusu go.
9Ago jwaŋ ge suwal Samariya ne na zonna to,
zam ja ɗiŋ suwal Yuda go,
det ja ɗiŋ viya̰ wak ga̰l ge Ursalima ne ma go,
suwal ge mbi naa ma ne ka ne na diŋ go.
10Waage me fare mbe no suwal Gat go to,
fya me to.
Aŋ ge ne suwal Bet-Leyafra go ma,
bugi me ta ne sḭḭm ndwara ke kḭḭmi
11Aŋ ge ne suwal Safir go ma,
he me viya̰ mbo mo̰r zi swala, ne saaso zi.
Naa ge ne suwal Saanan go ma be vin wat ya zum to.
Naa ge ne suwal Bet-Esel go ma ya kḭḭmi kerra zi,
ne da pe, nama ndu ge mbar nama be gwan ga to.
12Naa ge ne suwal Marot go ma,
da ne vo ne tuli ge bama ne pe.
Ago yál ge Bage ɗiŋnedin ne teme na ya,
det ja ɗiŋ viya̰ wak ma ge Ursalima ne go.
13Naa ge ne suwal Lakis go ma,
Vwa me aŋ pus ma, aŋ tisi ma pe go.
Aŋ ke sone dimma ca ne Israyela vya ma ne ke go,
Aŋ é naa ge ne suwal Ursalima go ma bole aŋ kaŋ kerra ge sone ma.
14Ne pe no, varse me ta uzi ne suwal Morechet-Gat.
Suwal Akzib mbo gá kaŋ lase gan ge Israyela ne ma.
15Aŋ ge ne suwal Marecha go ma,
Mbi mbo gwan teme naa ge ɗogle ma ya ame aŋ suwal,
ndu ga̰l ge hormo ge Israyela ne mbo sya ɗiŋ mbo woy tene
njal pṵṵl ge Adullam ne zi ya.
16Zó me aŋ pala susu ma,
só me aŋ pala ma ndwara ke kḭḭmi,
ne aŋ vya ma ge aŋ laar ne wa̰ nama ma pe.
Há me aŋ pala ma saal dimma ne boge pala go,
ne da pe, a pál aŋ nama ya mbo uzi ya kaal ne aŋ ta.
Currently Selected:
Mika 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.