Mika Fare pala hageya
Fare pala hageya
Anabi Mika ma ne anabi Isaya a ke temel zaman ge ɗu go, ge suwal ge ɗu go me, ndwara go suwal Yuda go. Ke na temel ne del kikis ɓyalar para wara anda (740) mbo kikis ɓyalar (700) J.K ndwara zḛ.
Del mbe ma zi, Asiriya ma ne ke suwal Israyela ma ne Yuda yál. A burmi suwal Samariya, na ge suwal ga̰l ge Israyela ma ne ge del 722-721 J.K ndwara zḛ go. A go no, Mika waage Yuda ma no go, nama mbo ɓol yál ge Israyela ma ne ɓo na pe, ago suwal Ursalima mbo burmi dimma ca ne Samariya go. Jan nama go no, ndwara go, nama ɓol yál da ne sone kerra ge nama ne pe. Anabi Mika jan fare gḛ naa ga̰l ma pal, ndwara go: gan ma, ne ga̰l ma, ne naa ge kun sarya ma, ne naa ge ke tuwaleya ma, ne anabi ge hale ma. Anabi ge hale ma ka lase ɓase ma lase baŋ (3:13).
Ago suwal Ursalima, suwal ge Dok ne tá na, ga ya suwal ge hun siya (3:5,11), ne pe no, na naa mbo det paal zi, a mbo gá pehir ge ɗogle mo̰r (4:10). Amma gan ge dosol mbo mbo ne hir ge Dawda ne zi ya, mbo tol suwal Betlehem go, ndwara go suwal tolla ge gan Dawda ne go. Ne jo̰ suwal Ursalima ga ya suwal ge sone, ge na gwan saŋge suwal ge Dok ne, ago na ya̰ sone kerra, na gwa̰ ya Dok ta, go no Dok ba gwan ne na ya na byalam go.
Swaga jan nama fare mbe ma no go, Mika ɓyare e naa ge ne za̰ na ma dwat fare, ne da pe nama tá fare ɗu: nama gwa̰ ne nama pala laar ɓyareya ge Dok ne pe se, nama laar wa̰ nama kaam ma me (6:8). Mika waage sarya kunna ge Dok ne ma ne viya̰ ge máya ne. Ago anabi ma pet a waage fare mbe ma no jwak. Swaga ge Dok ne mḛre naa, hon nama viya̰ ge nama kwa sone ge nama ne, nama saŋge ya se ndwara ɓol máya.
Maktub ge anabi Mika ne da ne pool ge varse se pe azi:
- Ge zḛ ge, Dok gace na ɓase ma, ne kun sarya nama pal (1—3, 6:1—7:7),
- Ge azi, Dok ke wak tuli go na mbo má na ɓase ma (4—5, 7:8-20).
Currently Selected:
Mika Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.