Hosiya 1
1
1Fare ge Bage ɗiŋnedin ne jya̰ Hosiya ge Beri vya. Jya̰ na dam ma ge Ozias, Yotam, Ahaz, Ezekiyas ma ne ka gan ge suwal Yuda pal go, ne dam ma ge Yerobowam ge Yowas vya ne ka gan ge suwal Israyela pal go me.
Yàl katɗa ge anabi Hosiya ne ne gwale kaya
2No a fare ge Bage ɗiŋnedin ne e pe jan nà ɓase ma ne Hosiya wak zi ne.
Bage ɗiŋnedin jan Hosiya go:
«Mbo, he gwale ge ne ke kaya ne sḭḭm pe,
vya ma ge mo ne mbo tol ya ne na,
a mbo kat vya ge gwale kaya ne ma.
Ago suwal pet yá̰ mbi ge Bage ɗiŋnedin ya go,
mbo ya ke kaya dok ge ɗogle ma pe ya.»
3Hosiya mbo hé Gomer ge Diblayim vya. Gomer her emel, tol na vya son. 4Bage ɗiŋnedin jan na go: «Tó na dḭl Jizreel#1:4: Jizreel: Jizreel sḭ go, Dok cigi ne, ko ɓarse ne.. Ago ta ŋgeɗo, mbi mbo ke ho̰l ne Yehu hir ma, ne swama ge ne ka̰ na suwal Jizreel go pe. Mbi mbo burmi muluk ge Israyela ne uzi.
5Dam mbo ya go,
mbi mbo hal kajamle ge asagar ge Israyela ne ma uzi
ge baal pul ge suwal Jizreel ne se.»
6Gomer gwan her emel, tol vya gwale. Bage ɗiŋnedin jan Hosiya go:
«Ho̰ na dḭl Lo-Ruhama#1:6 Lo-Ruhama: Sḭ go, Laar wanna to.,
Ago mbi laar mbo gwan wan Israyela vya ma to,
mbi abe mbi tok ya uzi ne nama ta dedet.
7Amma, mbi laar mbo ka gwan wan Yuda ma,
mbi, Bage ɗiŋnedin, Dok ge nama ne, mbi mbo má nama,
mbi mbo má nama dḛ da ne kajamle to,
ko ne kasagar, ko ne pore mballa,
ko ne tisi ma, ko ne naa ge njaŋge tisi ma ta to.»
8Gomer hal Lo-Ruhama, gwan her emel, tol vya son. 9Bage ɗiŋnedin jan Hosiya go:
«Ho̰ na dḭl Lo-Ammi#1:9 Lo-Ammi: Sḭ go, a be mbi ɓase ma ne to, ko mbi ɓase ma ne to..
Ago, aŋ be gwan gá mbi ɓase ma to,
mbi be gwan gá aŋ ne to me.»
Currently Selected:
Hosiya 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.