Hosiya Fare pala hageya
Fare pala hageya
Dok tó anabi Hosiya ne na temel pe ge del kikis ɓyalar para wara anuwa̰y (750) J.K ndwara zḛ go. Na sḛ waage fare ge Bage ɗiŋnedin ne ge muluk ge kuu ge go, ndwara go muluk ge Israyela ne go. Na sḛ saŋge anabi ge anabi Amos go̰r go, mbo kaŋ ge del wol go na go̰r go. A swaga ge Israyela ma ne saŋge Dok bama go̰r, a ne ga ke dok ge Kanan ma ne temel mo̰r go. Swaga mbe go uwale, muluk ge Israyela ne ka iigiya zi, gan ma ka er ta hool gan pal (2Gan 14:23—17:23), fare ge dosol be gwan ga to: naa ge gan ma ka gwan hat gan waɗeya, naa ge a̰se ma ka gwan hat a̰se waɗeya, laar wanna be gwan ga to.
A go no Maktub ge anabi Hosiya ne gace nama ne nama kaŋ kerra ge sone ma pe no. Hosiya sa̰ gwala kaya. Gwale mbe tó na vya ma no ataa. Ne go̰r go, na gwale mbe ya̰ na no. No ŋgay laar wanna ge Dok ne ge na ɓase ma ta. Ne jo̰ Dok laar wa̰ nama wan puy ɗe, a ka ya̰ bama Dok, a ka gwan mbo ke dok ge ɗogle ma temel mo̰r. Na fare ná ya 11:8 zi, ge ne jan go: «Efrayim, mbi ke ne mo gyana ɗaa? Israyela, mbi ɓya̰ mo uzi ya’a? Mbi ke mo dimma ne suwal Adma ma ne Seboyim go’a? Mbi da ne iigiya ne mbi zi, dwatɗa e mbi sḛ ya tinna.»
Maktub ge anabi Hosiya ne da ne pool varse se pe azi:
Ne Hos 1—3, Dok laar wa̰ na ɓase ma, ko nama saŋge na bama go̰r, Dok ya̰ na laar wanna to. Na fare janna mbe ma da ne mḛreya ma me.
Ne Hos 4—14 Gwan jan fare ge laar wanna ge Dok ne, amma na laar wanna mbe zi ɓyare go na ɓase ma ke fare ge bataraŋ ma to. Uwale mḛreya ma ya zi, ɓanna ne wak tuli me.
Hosiya ŋgay go laar wanna ge Dok ne na aya to, ko na naa kuri na puy ɗe, na sḛ a Dok ge laar wanna ne.
Varseya ge maktub ge Hosiya ne
1- Yàl katɗa ge Hosiya ne (1:1—3:5)
2- Fare waageya Israyela ma ta (4:1—13:15)
3- Tolla ne gwanna ya Dok ta pe, ne wak tuli (14:1-10)
Currently Selected:
Hosiya Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.