Hosiya 2
2
Wak tuli ge giya̰l ne Israyela vya ma pe
1Israyela vya ma mbo zuli ta se ceɗed
dimma ne kafeɗem ne maŋgaɗam ga̰l yuwam wak go go,
na ge ndu ne mbyat ŋgay na ko isi na to.
Ge swaga ge a ne jya̰ nama go:
«Aŋ be gwan gá mbi ɓase ma to» mbe go,
a mbo jan nama go: «Aŋ Dok ge ndwara vya ma ne#Rom 9:26.!»
2Yuda ma ne Israyela mbo ɓan digi,
a mbo e gan ɗu bama pal,
a mbo ŋguy suwal.
Ago a dam ge ɓaŋlaŋ ne ne Jizreel pe.
3Jya̰ me aŋ ná vya ge sonmo ma go: Ammi#2:3 Ammi: Na sḭ go, mbi ɓase ma.!
Jya̰ me aŋ ná vya ge gwale ma go: Ruhama#2:3 Ruhama: Sḭ go, ndu ge laar wanna.!
Israyela gwale kaya ne
4Kaŋge me aŋ ná, kaŋge me na,
ago na sḛ be gwan gá mbi gwale to,
mbi be na obe ne to me.
Na gu galaŋ ge na kaya kerra ne ne na sḭ́ḭ́l go uzi,
na gyá pyalaŋ ge na voɗom ne ne na ko̰o̰l go uzi#Irm 2:20, 3:1, 5:7, 13:27..
5Kadɗa go to, mbi mbo fage ba̰r ne na ta uzi,
mbi ya̰ na swala dimma ne na ne tó ya se go.
Mbi mbo saŋge na dimma ne babur go,
dimma ne suwar ge fiya̰l ɗaŋraŋ go,
mbi mbo hun na ne mam njuwal.
6Mbi laar mbo wan na vya ma to,
ago, a vya ge gwale kaya ne ma ne.
7Ago nama ná gwale kaya ne,
na ge ne tó nama, ke tene saaso.
Ka janna go: «Mbi sya mbi kondore ge laar wanna ma pe ya,
nama ge ne ka hon mbi kaŋzam ma ne mam njotɗa ma,
ne ba̰r tame susu ma ne ba̰r ɓoso lin ma,
ne num ma ne kaŋ njotɗa ma.»
8Ne no pe, mbi mbo tele na viya̰ ne kore ma,
mbi mbo ver na zi ne gulum,
mbo gwan ɓol viya̰ ge mborra to.
9Mbo sya na kondore mbe ma pe ya,
amma mbo det nama ta ya to,
mbo ɓyare nama pe,
mbo ɓol nama to bat.
Go̰r go, mbo jan tene go:
«Mbi gwan mbi obe ge zaŋgal pe ya,
ago mbi ka swaga tuli gḛ waɗe ge ne se no.»
10Be kwa go na mbi ka hon na gḛme ma,
ne oyo̰r-jiya̰l ge giya̰l ma, ne num ma ne to,
ko mbi be ka hon na fool kaal ma, ne dinar ma ne to.
amma saŋge nama tyare bobo hon Baal no.
11Ne pe no, mbi mbo gwan’a ame mbi gḛme na swaga siyal go,
ne mbi oyo̰r jiya̰l na swaga siyal go,
mbi mbo ame mbi tame susu ma, ne mbi ɓoso lin ma,
nama ge ne ka lar na pe ne nama ma.
12Mbi mbo yá̰ na swala ndwara ke na saaso
na kondore ma ndwara go,
ndu ge zur na ne mbi tok go mbo kat to bat.
13Mbi mbo tele na ne na laar saal kerra ma ta,
ne na dam vḛso ma ta, ne na vḛso saba wak ma ta,
ne na dam ɗigliya ma ta, ne na dam vḛso ma ta mwaɗak.
14Mbi mbo burmi na gaaso oyo̰r ma ne na fere ma uzi,
na ge ne ka janna ne nama go:
«No a vaswa ge mbi kondore ma ne pó mbi ne!»
Mbi mbo saŋge na swaga zám ge kavaar ma ne,
kavaar ge ful zi ge ma mbo gá zam zám na zi.
15Mbi mbo e na pot dam ma ge
na sḛ ne ka tyare tuwaleya hon Baal ndwara uware na ma.
ka pare tene ne na kyaɗa ma, ne na ya̰a̰ ma,
ndwara sya mbo na kondore ma pe ya,
amma ka vyale mbi,
ka̰l ge Bage ɗiŋnedin ne.
16Ne pe no, mbi mbo saŋge na ndwara ya mbi ta,
mbi mbo gene na mbo ful pul zi ya,
mbi mbo saŋge na haŋgal ya mbi ta.
17Ne swaga mbe ya go, mbi mbo gwan hon na na gaaso oyo̰r ma,
mbi mbo saŋge baal pul ge Akor#2:17 Baal pul ge Akor ne: Sḭ go, swaga njot yál. viya̰ wak ge máya ne,
ne ya go, mbo gwan za̰ mbi dimma ne na ne ka kale go,
dimma ne dam ge na ne ndage dḛ ne suwal Masar ya go.
18Dam mbe go, ka̰l ge Bage ɗiŋnedin ne,
mbo tol mbi go: «Mbi obe!»
Amma, mbo gwan tol mbi go:
«Mbi Baal» ndwara go «Mbi bageyal» To bat.
19Mbi mbo ndage dḭl ge Baal ma ne ne na wak zi uzi,
ndu mbo gwan dwat nama dḭl ma pal to bat.
20Dam mbe go, mbi mbo ke wak tuli ne nama pe
ɓanna ne kavaar ma, ne njoole ma, ne kaŋ ge ne kḛ ne suwar zi ma.
Mbi mbo hal kajamle ma, ne kasagar ma,
ne kaŋ pore ma pet ne suwal diŋ uzi,
mbi mbo yá̰ mbi ɓase ma fí dam halas.
21Mbi mbo sare mo ne mbi sḛ pe ɗiŋnedin,
mbi mbo sare mo ne mbi sḛ pe.
Mo bware sanna mbo kat:
dosol, ne wak yuwaleya, ne kwa a̰se, ne laar wanna.
22Mbi mbo sare mo fareba zi,
mo mbo gwan kwa go mbi Bage ɗiŋnedin ne.
23Dam mbe go, ka̰l ge Bage ɗiŋnedin ne,
mbi mbo ke laar ɓyareya ge pḭr ne,
pḭr me, mbo ke laar ɓyareya ge suwar ne,
24suwar me mbo hon gḛme ma, ne oyo̰r jiya̰l ge giya̰l, ne num ma,
nama sḛ ma no pet a mbo ke laar ɓyareya ge Jizreel ne pal.
25Mbi mbo gwan zare mbi kaŋ hir suwar pal,
mbi laar mbo gwan wan Lo-Ruhama,
mbi mbo jan Lo-Ammi go: «Mo mbi ɓase ne!»
Na sḛ mbo gwan ne mbi janna go: «Mo mbi Dok ne!»
Currently Selected:
Hosiya 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.