Markus 16
16
Tanna ge Jeso Kris ne
(Mat 28:1-8, Luk 24:1-12, Yoh 20:1-10)
1Swaga ge dam ɗigliya ne kale, Maryam ge suwal Magdala ne, ne Maryam ge Yakub ná, ne Salome, a yat idir mbo kan na Jeso duur ta. 2Dumas cya̰wak vḛ, a mbo táál wak ya, gyala gale ne ndwarra ya. 3A ka ele ta go: «A wuɗi viŋgri nee njal ma̰ ne táál wak go uzi ne ɗaa?» 4Swaga ge a ne ndi, a kwa njal viŋgri ya uzi ya. Njal mbe ka ga̰l ge be to. 5Swaga ge a ne wá táál zi ya, a kwa vya dore a̰me ne katɗa tok matoson pal ne ba̰r saal. Vo wan nama. 6Na sḛ jan nama go: «Sya me vo to! Aŋ ɓyare Jeso ge Nazaret ne, na ge a ne pé na kaŋgre pal, tanna ya, ne go go to. Ndi me swaga ge a ne dó na go no! 7Mbo me jan na naa ge ame hateya ma, ne Bitrus me go, na mbo ya Galile ya, aŋ ndwara zḛ ya, aŋ mbo kwa na ya go, dimma ne na sḛ ne jya̰ aŋ go#Mar 14:28..» 8A wat ya zum, a syat bama pe so ne táál wak ya uzi, a ka ndatɗa, nama kḭḭm ma ndage cwat, amma a jan ndu a̰me fare to, ne da pe, a ka sya vo.
Jeso dyan tene Maryam ge suwal Magdala ne ta
(Mat 28:9-10, Yoh 20:11-18)
[9#16:9 Ne Mar 16:9-20 ne maktub ge zaŋgal a̰me ma zi to.Swaga ge Jeso ne ta̰ ne siya se Dumas cya̰wak, e pe dyan tene Maryam ge suwal Magdala ne, na ge ne ya̰ o̰yom ge seŋgre ma ɓyalar ne na zi uzi ta. 10Na sḛ mbo waage nama ge a ne ka poseya ne na ma, nama ge ne ka kḭḭmi ma ne fyaso zi ma. 11Swaga ge a ne za̰ go na da ne ndwara, nà kwa na me ɗe, a hon fareba na fare janna pal to.
Jeso dyan tene naa ge ame hateya ma azi ta
(Luk 24:13-35)
12Ne go̰r go uwale, Jeso gwan dyan tene ne dir ge ɗogle ge naa azi ne na naa ge ame hateya ma buwal zi ta, a ne mbo ful zi. 13Nama sḛ ma gwan’a waage naa ge may ma. No uwale, a gwan hon fareba nama fare janna pal to.
Jeso dyan tene naa ge ame hateya ge wol para ɗu ma ta
(Mat 28:16-20, Luk 24:36-49, Yoh 20:19-23, Tkm 1:6-8)
14Go̰r go uwale, gwan dyan tene ge wol para ɗu ma ta, a ne kaŋzam wak go. Mḛre nama ne hon fareba to ge nama ne pe, ne dulwak togreya ge nama ne pe me, ne da pe, a be hon fareba fare janna ge naa ge a ne kwa na tanna ma pal to. 15Jan nama go: «Mbo me dunya zi pet, oy me fare ge kwaɗa naa ta pet#Tkm 1:8.. 16Ndu ge ne mbo hon fareba ya, ge ne mbo ke baptisma ya, mbo má. Amma ndu ge ne mbo hon fareba ya to, a mbo kun sarya na pal. 17Kaŋ ŋgayya ge ne e naa kwarra go naa mbe ma ho̰ fareba ma no: a mbo yan o̰yom ge seŋgre ma dḭl ge mbi ne zi, a mbo far wak ge ɗogle ma, 18a mbo abe bom ma, ko a njó jam ge hun naa ma puy, a̰me mbo ke nama to, a mbo e bama tok moy ma pal, a mbo ɓol zonna.»
Mborra digi ge Jeso ne
(Luk 24:50-53, Tkm 1:9-11)
19Go̰r ge Bageyal Jeso ne jya̰ nama fare mbe ma no, a her na pḭr zi ya, mbo kat Dok tok matoson pal#Tkm 1:9-11.. 20Amma nama sḛ ma mbo waage fare swaga ge daage go pet, Bageyal ka ker temel ne nama, ka wi nama fare ma wak ne kaŋ ŋgayya ma.]
Currently Selected:
Markus 16: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.