Luka Fare pala hageya
Fare pala hageya
Fare ge kwaɗa ne Luka wak zi a maktub ge zḛ ge ge Luka ne njaŋge na ne, ge azi a maktub Temel kerra ma. Bage ne njaŋge maktub mbe ma be kwa Jeso to, amma hale fare ma pe hale lelet, njaŋge maktub mbe ma hon ndu ga̰l ge ɓaŋlaŋ Tewfilus no (1:1-4). Na sḛ be Yahud ne to, amma a pehir ge ɗogle ne, na kaŋ njaŋgeya da ne wak grek ge ɗermel, siŋli waɗe naa ge may ma. Luka, a bage ke naa jam ne, na sḛ ka an dagre ne Bulus (Kol 4:14, 2Tim 4:11, Flm 24). Naa a̰me ma dwat go Fare ge kwaɗa ne Luka wak zi njaŋge del 59 (wara anuwa̰y para lamaɗo) ko 62 (wara myanaŋgal para azi) go, naa a̰me ma jan go na del 70 (wara ɓyalar) go me.
Luka njaŋge na fare dimma ne Matta ma ne Markus ne go, amma na fare a̰me ma hini ne naa ge azi mbe ma ne. Wa̰ fare ge waageya ge maleka ne waage tolla ge Yohanna ne, ne tolla ge Jeso ne, ne kaŋ mballa ge Maryam ne mbá uware Dok, ne kaŋ mballa ge Zakariya ne, uwareya ge naa ge koy gii ma ne uware Dok. Uwale, Luka wa̰ mborra ge Jeso ne mbo ya Marta ma ne Maryam yadiŋ (10:38-42), ne fare sḭ ge ndu ge kwaɗa ge suwal Samariya ne (10:29-37), ne vya ge ne ba̰ na kaŋ joo ma (15:11-32).
Ne Luka ta, Dok teme Jeso ya ndwara má naa ge ne ame na fare ma. Ago Jeso e na haŋgal naa ge a ne ke nama yál ma pal: naa ge sone ma, ne naa jabso ma, ne naa ge a̰se ma, ne naa ge moy ma, ne naa ge gwasal ma pal. Jeso ka jan fare naa ge ɓol kaŋ ma ne naa ge pool ma pal (12:16-21, 16:1-31). Luka jya̰ fare gḛ ge kaɗeya pal, ne O̰yom ge mbegeya pal, ne temel ge naa zaab ne fare ge Dok ne zi, ne poreya ge Dok ne pore sone ma.
Mborra ge na ne ndwara mbo Ursalima ge ba mbo ya̰ tene suya ne má naa pe (9:51—19:28), Luka njaŋge na fare ma hini nde. Ne swaga mbe no go, Jeso jya̰ fare gḛ waɗe kaŋ ajab ma kerra. Jya̰ fare ge mborra digi ge na ne (9:51), swaga ma mbo ya go, ge na naa ge ame hateya ma mbo kaɗe O̰yom ge mbegeya, a mbo jan kwaya̰l go waŋ go Jeso na bama Bageyal ne (12:1-12), a mbo da̰re gwanna ge na ne ya (12:35-40, 17:22—18:8, 19:11-27), ne dol bama ndwara bama ná vya ma pal (12:41-48).
Ne 19:29—24:53, Jeso ŋgay tene go na gan ge Ursalima diŋ, ya̰ naa ge ke tujar ma ne zok ge Dok ne zi zum no, moɗege naa ne da̰re gwanna ge vya ge ndu ne ya no me. Ago na sḛ wa̰ fare ge siya ge na ne, ne tanna ge na ne pe me.
Vareya ge maktub ge Luka ne
1- Fare pala hageya (1:1-4)
2- Tolla ma ne bool ge Yohanna bage ke naa baptisma ma ne Jeso ne (1:5—2:52)
3- Temel kerra ge Yohanna bage ke naa baptisma ne (3:1-20)
4- Baptisma ma ne pe herra ge Jeso ne (3:21—4:13)
5- Temel kerra ge Jeso ne suwal Galile go (4:14—9:50)
6- Ne suwal Galile go mbo Ursalima (9:51—19:27)
7- Dam ge go̰r dab ge Jeso ne ma (19:28—23:56)
8- Tanna, ne dyanna, ne mbo digi ge Jeso ne (24:1-53)
Currently Selected:
Luka Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.