Ibriniya ma 13
13
Moɗegeya ge ɗogle ma
1Wa̰ me ta laar wanna ge ná vya ma ne zi. 2Vyale me be ge ame gwasal ma to, ago, naa a̰me ma swaga kerra go, a ame maleka ma be ge a wan pe#Pe 18:1-8, 19:1-3.. 3Dwa me ne naa ge ne daŋgay zi ma, dimma ne aŋ sḛ ya daŋgay zi poseya ne nama go. Dwa me ne naa ge a ne ke nama yál ma, dimma ne aŋ sḛ ma za̰ yál mbe aŋ duur ta ne go.
4Sanna na ka kaŋ hormo naa ta pet, na kaage gwale ma ne obe gwan mbo zum to. Ago Dok mbo kun sarya bool ma ne naa ge kat yàl ge ne fi ne ta zum ma pal.
5Laar wan bware na ka aŋ zi to, amma ke me tuli ne kaŋ ge aŋ ne na. Ago Dok jya̰ go: «Mbi mbo ya̰ mo hini to, mbi mbo dol mo uzi to#Dwa 31:6,8, Jus 1:5..» 6Ne da pe no ɗe, nee da ne pool jan fare ne kwarra tyatyat go: «Bageyal a bage ne sya mbi ko̰r ne, mbi sya a̰me vo to, ndu dasana ke ne mbi da ɗaa#Kmb 118:6.?»
7Dwa me ne naa ge ne ɗame aŋ ma, nama ge a ne waage aŋ fare ge Dok ne ma. Ndi me mborra ge nama ne, bole me hon fareba ge nama ne#10:32-33.. 8Jeso Kris a na ne ɗu, dana, ma̰, mbo ɗiŋnedin. 9Ya̰ me ta ya̰meya ge hateya ge daage pet ge ɗogle ma pe go to. A kwaɗa go, ndu biri tene da ne bobo ge Dok ne, be ne kaŋzam ma to, ago nama ge ne koy eya ge kaŋzam ma ne pal ma, a ɓol a̰me ne na zi to#Rom 14:2-23, 1Kor 8:8, Kol 2:16-22, 1Tim 4:3..
10Naa ge ke tuwaleya ge ne tyare tuwaleya ne gur zi ma a ne pool ge zam kaŋzam ge a ne tyare na ne nee twal tuwaleya pal to. 11Ago kavaar ge kep tuwaleya ne ame nama swama mbo cigiya swaga ge mbegeya uzi hini cat zi ne poreya ge sone ne pe ma duur ma a mbo til nama gulum ga̰l go̰r zum ya#Lev 16:27.. 12Da ne pe no me, Jeso sḛ mbo su viya̰ wak pala zum ya no ne mbege ɓase ma pe ne na swama#Yoh 19:17,20.. 13Ne pe no ɗe, mbo me nee mbo ɓol na gulum go̰r zum ya, ne her saaso ge na ne nee pal. 14Ago, ne se go no, nee ne suwal ge ɗiŋnedin to, amma nee ɓyare na ge ne mbo mbo dḛ ya#11:10,16.. 15Ne na ta, tyare me nee tuwaleya ge uwareya ne ɗaɗak hon Dok, ndwara go tuwaleya ge ne ndage ne nee wak ma zi ya ge ne uware dḭl ge na ne. 16Vyala me be ge ker ta kwaɗa to, be ge mbar ta to me, ago a tuwaleya hir ge go mbe ma no ke Dok sḛ tuli ne.
17Za̰ me naa ge ne ɗame aŋ ma wak, gwa̰ me aŋ pala nama pe se lwalwagat. Ago a nama sḛ ma dol bama ndwara ne aŋ pal ne, ne jo̰ a nama sḛ ma mbo gene isiya ya Dok ndwara se ne. E me nama ke nama temel ne laar saal, be ne sun ta to, ne da pe na saŋge haŋle aŋ pal.
18Kaɗe me ne i pe. Ago i da ne kwarra tyatyat go i da ne haŋgal ge kwaɗa, ne da pe i ɓyare go i ka jwap kaŋ ma zi pet. 19Ke me kaɗeya, mbi kaɗe aŋ da ne á tene, ne da pe mbi gwa̰ ya ɓol aŋ avun cap.
Kaɗeya
20Dok ge halas, na ge ne gwa̰ ne nee Bageyal Jeso ne naa ge siya ma buwal zi ya, ge ne saŋge bage koy tame ma ge ga̰l, ne swama ge wak tuli ge ɗiŋnedin ta, 21na ho̰ aŋ pool ge ke kaŋ kwaɗa ge daage pet laar ɓyareya ge na ne zi, na ke kaŋ ge ne e na sḛ ke tuli nee zi ne Jeso Kris ta. Na dḭl ɓo uwareya doŋ pe ma ne doŋ pe ma! A go.
Fare wak aya ne wak sanna
22Ná vya ma, mbi kaɗe aŋ, ame me fare moɗegeya mbe ma no kwaɗa. Mbi njaŋge aŋ na woɗege gwa baŋ. 23Kwa me go a kan nee ná vya Timotawus ya digi. Kadɗa na mbo ja avun, i ne na da pool ɓan mbo ɓol aŋ#Tkm 16:1..
24Sá̰ me aŋ naa ge ne ɗame aŋ ma wak, ne naa ge mbegeya ma mwaɗak me. Naa ge ne suwal Italiya go ma sá̰ aŋ wak.
25Kwa a̰se ge Dok ne na ka poseya ne aŋ!
Currently Selected:
Ibriniya ma 13: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.