Takotitaunermik 2
2
Aglangnik illagêktotalingnut 7 inut ilingajunik: illagênut Efêsusemêtunut. Smirnamêtunut, Pergamusemêtunut, Tiatîramêtunut.
1Illagêt Efêsusemiut Engelingat aglagvigiuk: Uvloritjanik 7 inik talerpingminut tigumiartok, nennergoarvît 7 it goldit akorngane arvertartok imâk oᴋarpok:
2Piniarnitit senanîllo ᴋenuersârnîllo ᴋaujimavakka, idluitulijullo ᴋenuersârvigijungnanginangne, Apostelionermingniglo oᴋartut, taimainatiglo ôktulaurangne, nagvârlutillo saglotojoksôngmatta.
3Kunutuidlutit ᴋenuersârlutillo atera pivlugo senavotit, merngortulaunaglo.
4Erᴋartuijutiksaᴋarpungale ilingnut; nagligosungnek sivorlek sorairtinangne.
5Erᴋailerit, sunamit katangneravit, ᴋaᴋialerillo, piniarnerit sivorlît piniarlugit. Pingikuville, tikisârniarpagit, nennergoarvît ininganit pinguvlugo nûtsomârpara, ᴋaᴋialingikuvit.
6Mattomingale peᴋarpotit ômisûtigigangne Nikolaitit piniarningit, tâpkoa uvangatauk ômisûtigivakka.
7Siutiliub tussarligit Anernerub oᴋausingit illagênut: Sâlaᴋartok nerrititsomavara napârtomit ômanartomit, Gûdib Paradîsinganêtomit.
8Illagêt Smirnamiut Engelingat aglagvigiuk: Sivorliovlunelo kingorliojok toᴋolauklunelo ômarmijok imâk oᴋarpok:
9Piniarnitit ᴋaujimavakka, kappiasungnîllo aklunîllo (akluigalloartotit), mitautaunîllo oᴋartunut Jûdionermingnik taimainatiglo, Sâtanasible ajoᴋertuivinganut ilingavut.
10Sivôraginiarnagit nelîllônêt kappianartut ilingnut neliutuksat. Ahâk Sâtanasib illapse illangit parngnanairsimavingmut pititsomârpait, ôktortauᴋovluse kappiasuktitauᴋovluselo uvlunik 10 nik. Soᴋosijuilerille toᴋo tikidlugo, tagva niaᴋôtemik ômanartomik tunitjivigijomagapkit.
11Siutiliub tussarligit Anernerub oᴋausingit illagênut: Sâlaᴋalertok toᴋub aipanganut pijauniangilak.
12Illagêt Pergamusemiut Engelingat aglagvigiuk: Ipiktomik igluktut kênalingmik saviksoalik imâk oᴋarpok:
13Sulijatit ᴋaujimavakka, nunaᴋarnîllo nane, Sâtanasib iksivautaᴋsoangata ininganek ateralo atavigigangne, okpernerlo uvamnut misiarutiginago uvlune ipkonane aglât, Antipase ataruilivlune uvamnik kigligiutsijok toᴋotaungmat ilipsingne, Sâtanasib ineᴋarviane.
14Mikijomigle erᴋartuijutiksaᴋarpunga ilingnut, tagvane inuᴋoteᴋaravit Balaamib ajoᴋertûtânik nâlektunik; tâpsoma Balake ajoᴋertormago, Israêlib ᴋitornganginut aporviksarsiorᴋovlugo, nerrerᴋovlugit Gûdeungitunut tunergutinik, assiniarᴋovlugillo.
15Taimaktauk inuᴋoteᴋarmigavit, Nikolaitit ajoᴋertûsinginik nâlektunik, tamanna ômisûtigivara.
16ᴋaᴋialerit! pingikuville tikisârniarpagit, sorsugiartorlugit ᴋanerma saviksoanganut.
17Siutiliub tussarligit Anernerub oᴋausingit illagênut: Sâlaᴋartok nerrititsomavara Mannanik ijersimajunik; tunitjivigijomavaralo ujarᴋamik ᴋaᴋortamik, atermiglo nutâmik ujarᴋamut aglaksimajomik, kimut illitarijaungitomik, inuata kisime (illitarivâ).
18Ilagêt Tiatîramiut Engelingat aglagvigiuk: Gûdib erninga ikomatut ikoalajotut ijeᴋartok, itigaliglo ᴋaᴋᴋorlertun-itunik, imâk oᴋarpok:
19Piniarnitit ᴋaujimavakka, nagligosungnîllo, kivgartornîllo, okpernîllo, ᴋenuersârnîllo, sulidlaravillo kingorlît pivalliatilugit sivorlinit.
20Mikijomigle erᴋartuijutiksaᴋarpunga ilingnut, arnâluk Jesabele nelautaijôvlune oᴋartok, inertinginangne, ajoᴋertuinerlugangat kivgakka uivêrivlugit assiniarᴋovlugit, nerritiniarlugillo tunergutinik Gûdeungitunut.
21Piviksaᴋartilaukparalo ᴋaᴋialerᴋovlugo anguniarnerminik, ᴋaᴋialingilarle.
22Ahâk, innangavingmut egipara, kappianartoksoarmullo pitilugit tâpsominga arnarnialauktut, ᴋaᴋialingipatta piniarnermingnik.
23ᴋitorngangillo anauvlugit toᴋotsomavakka. Illagêllo ilûnatik nelojungnainiarpânga, taᴋtuniglo ômatiniglo kiglisiniartok uvangaugama, ilûnaselo atunit piniarvigijomârpapse iliornerijase maliklugit.
24Ilipsele oᴋarvigivapse, Tiatîrame amiakôjose, tamattominga ajoᴋertûseᴋangitose, itijuniglo Sâtanasib issumanginik ᴋaujimangitose (taimak ipkoa oᴋarmatta): assianik oᴋumainartomik ilijivigijomangilapse.
25Pigijase sapkuniarasigik tikitsiarivlunga.
26Sâlaᴋartok perᴋojamniglo ataruilijok naggatiksamut, tâmna nâlegangortitsomavara nelojunut;
27Mianeriniarpaillo ajaupiamut kikiangmut, machaliortiblo iluleᴋutingititut serᴋomitsomârpait, sôrlo uvangatauk Atâtamnut perᴋojaugama;
28Uvloriamiglo ᴋausiumik tunitjivigijomavara.
29Siutiliub tussarligit Anernerub oᴋausingit illagênut.
Currently Selected:
Takotitaunermik 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.