II Timôteusemut 1
1
Timôteuse sokᴋosijuirᴋojauvok. Paulusib Rômame parngnanairsorsimajub ilinganinganik.
1Pauluse Jêsusib Kristûsib Apostelinga, Gûdib pijomajanganut, angersimanek inôgutilik Kristûse Jêsusemêtok maliklugo,
2Timôteusemut ernimnut nagligijamnut: Gûdib Atâtab, Kristûsiblo Jêsusib Nâlegapta saimarsautiminut nâpkigosungnerminullo, ullapirsautiminullo illagilitittok.
3ᴋujagivara Gûde, kivgartortara sivorlerijakka maliklugit issumamut ivsornaitomut, sorairnanga erᴋatsainarapkit tuksiarnimne uvlôtilugolo unnuamelo.
4Kugviornît erᴋarangapko, angijomik kipilerpunga takojomavlutit, ᴋuviasungnermik ilumertaujomavlunga.
5Erᴋarangapkolo okperneᴋ ilungnêtoᴋ takkormôjuitok, sivorlermik anânatsiarne Loidame ineᴋalauᴋtok anânangnelo Eunikeme; ᴋolangilangale ilingnêninganiktauk.
6Tamanna pivlugo erᴋaitipagit, omartitseᴋovlutit Gûdib tunergutânik ilungnêlertomik, aggamnut patingmilaurapkit.
7Anernermik sivôrajomik Gûdib tunitsivigilaungimatigut, pitsartunelingmigle, naglingniktomiglo, idluartomiglo.
8Taimaimat kangusungniarnak kigligiutsinek Nâlegaptingnik pivlugo, pivlungalônêt ᴋelaksugaujunga tâmna pivlugo; uvaptulle kappiasuktitauneᴋ oᴋautsit tussarnertut pivlugit ᴋunuginago pît Gûdib pitsartuninganut.
9Tâpsoma piulilaungmatigut, ᴋaiᴋolutalo ᴋaiᴋojinermut ivsornaitomut, piniarnivut pitjutiginagit, issumasimanerminulle saimanerminullo tunitsivioniptingnut Kristûseme Jêsuseme silaksoak pigiarᴋârtinago;
10Mânale nalonairtisimavok piulijipta Jêsusib Kristûsib sakᴋijârninganut; tâpsoma toᴋo nukkingerutingmago, inôtsemiglo asserojuinermiglo ᴋaumajomut pititsingmat oᴋautsinut tussarnertunut;
11Tamattominga perᴋojauvunga oᴋâlajuksaulunga, Aposteleojuksaulungalo, nalojunullo ajoᴋertuijôjuksaulunga.
12Tamannatauk pivlugo taimâk kappiasuktitauvunga; kangusûtigingilarale tamanna; okpervigijara ᴋaujimagapko, nalutsanginivaralo, tâpsoma pigumitâk piksara saputijungnarmago uvluksak imna tikidlugo.
13Ajoᴋertûsek atsuilinartok, uvamnit tussâjat, okpernermiglo naglingnermiglo Kristûse Jêsuseme, igjaraksarivlugo ajoᴋertûtigitsainaruk.
14Pigumitâksak (tunergusiarijat) ajungitok tamanna torᴋoruk Anernermut ajunginermut uvaptingnik ineᴋartomut.
15Tamanna ᴋaujimavat, Asiamiut ilûnatik tunungmanga; taipkoa illâgik Figelluselo Hermôgeneselo.
16Onesiforusikut Nâlekab nâpkigiligittôk: tapsoma nakoksiteᴋattalaungmanga, kangusûtigilaurnagillo ᴋelaumgujarijakka;
17Rômamulle pigame, ataruilivlune ᴋenilaukpânga, nennivlungalo.
18Nâlekable tunitsivigiliuk nâpkigijaunermik, nagvârᴋovlugo Nâlekame uvluksab neliuniksangane. ᴋanorlo angijomik pitsiarvigilaungmanga Efêsuseme, ᴋaujimavotit.
Currently Selected:
II Timôteusemut 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.