I Timôteusemut 6
6
ᴋaiblaijutiksanik sunatuinarnik.
1Ilûnatik kivgaujut kipalômavlutik nâlegatik naipertugarijaksarivait tamât; Gûdib atinga ajoᴋertûserlo mitautigijaulerᴋonagik.
2Okpertunigle nâlegalit nachogijaksaritsangilait ᴋatangutigêkamik, taimaitulle kivgartuluarlugit, okpertôngmatta naglingnartôngmattalo, pitsiarnermik illangiubveᴋartut. Taimâk ajoᴋertuilutillo ᴋaiblainiarit.
3Taimaingitomik ajoᴋertuijoᴋarpat, Nâlegaptalo Jêsusib Kristûsib oᴋausingit atsuilinartut nâlengikunigit, ajoᴋertûseᴋarunelo Gûdemik nâlengnek issumaginago,
4Tâmna piojorivok nalojoᴋsôvlunelo, akkerartorosukporle apersûteᴋarlarmelo oᴋausetuinait pivlugit; tamattomangat anerutsinerlo, aivanerlo, mitautiksanerlo issumalungnerlo pivut,
5Akiortigêngnerillo piungitut inungne asserorsimajunik issumalingne, mikseᴋârnermiglo aᴋsârtaujune, Gûdemik nâlengnek perᴋutiksarsiorutaunasugilugo pijune. Taimaitut alakit.
6Nâlengnerle Gûdemik, nâmagilugolo tunergutâ, tamanna angijomik nakoksinartok.
7Itertitsinginapta sumik silaksoarmut; taimaimat, anititsijungnanginiarivogut sumik, nalonangilak.
8Nerᴋiksaᴋaruptale annorâᴋarlutalo, nâmagilavut.
9Akluitsomajulle ôktortaulungnermut nikkanullo katangniarput, unuktunullo silainartunut asserornartunullo kajungilârnernut; taimaitut inuit kivitipait kappianartomut erᴋartortaunermullo.
10Pijomatudlarnek amângongmat ajortunut tamainut. Tamanna ilangita ikligilauramitsuk, okpernek tamaigivât, kappianartoksoarniglo ingmingnut pititsivut.
11Igville, Gûdib inuᴋotinga, tamakkoa allakit; idluarnerle, Gûdemiglo nâlengnek, okpernerlo, naglingnerlo, ᴋenuersârnerlo, ningajuinerlo pinasuakit.
12Sorsungniarit ajungitomik okpernerub sorsungninganik, inôsek nâksaungitok tiguniaruk, tamattomunga ᴋaiᴋojaumagavit, nalonaigaumiglo ajungitomik nalonailêmavlutit unuktut tussâtilugit kigligiudsijungnartut.
13Gûdib, tamainik ômartitsijub, Kristûsiblo Jêsusib, Pontiuse Pilatusemut nalonaijaumik ajungitomik kigligiudsilauᴋtub sângane perᴋovagit:
14Nâleᴋovlutit perᴋojanik ivsornailutit, passijaksautaililutillo, Nâlegapta Jêsusib Kristûsib sakᴋerviksanga tikidlugo.
15Tamanna piloriktoksôjub ajugaᴋangitotôjublo, ipsoma atanivît ilûnatik atanerimangata, nâlekallo ilûnatik nâlegarijangata naliunermine sakᴋertitsomârpâ.
16Toᴋosuitotôjok tâmna, ᴋaumajome tikiviksaujungnangitomêtok; inûb atautsiblônêt takolaungitanga takojungnangitangalo, tâmna nertortaunermik pile nâlegauvingmiglo issoᴋangitomik! Amen.
17Akluitut silaksoarme tamattomane oᴋautikit pimariuterᴋonagit, perᴋutimingniglônêt ᴋolarnartunik tatteᴋarᴋonagit, Gûdemigle ômajomik; tâpsoma tamainik angijomik tunitsivigingmatigut atoraksaptingnik;
18Pitsiarnerᴋovlugit, ajungitulinermiglo akluiᴋovlugit, ᴋununatik tunijerᴋovlugit ikajorᴋovlugillo assimingnik;
19Taimailiordlutik ingmingnut tungaviksautsiartunik perᴋutiksarsiniarᴋovlugit naliutuksamut, inôtsemik nâksaungitomik tigusijungnarᴋovlugit.
20Omât! Timôteuse, ilingnut sungertûtigijaumajok ivlerit sainaruk, allakillo oᴋâlagalâdlarnerit anerniliungitut ᴋoksalainerit, inuillo sulinatik nertôtijut ilisimanermik akiortigêngningit.
21Ilangit taimaitoᴋarlutik oᴋarput, okpernek tamaigivlugo. Saimarsautib illagilitit. Amen.
Sivorlit makkoa Timôteusemut aglaktaumavut Laodizêamit iglugasaksônerôjunit Frigiame Pakatianame.
Currently Selected:
I Timôteusemut 6: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.