II Timôteusemut 2
2
Timôteuse nertornardlune ajoᴋertuiᴋojauvok, ânianartunuttauk sangutitaulugane, ajoᴋertuinerluktut akkerartorlugit.
1Tamanna pivlugo ernîk sôngolerit saimarsaumut Kristûse Jêsusemêtomut.
2Uvamnillo tussartatit unuktut kigligiudsijungnartut tussâtilugit, tamakkoa pitikigit inungnut nalâgôrtunut, assimingnik ajoᴋertuijungnartunut.
3Kappianartunik ᴋununak, Jêsusib Kristûsib sorsuktuksangatut ajungitotut.
4Sorsuktuksat naliat illangiutinasuangilak nunab pinginik, idluarijaujomagame sorsuktuksauᴋojiminut.
5Ajugaunasuartoᴋarangallo (sorsuklune) niaᴋôsertauniangilak, kissiane idluartomik ajugaugune.
6Perorsêvingmik sanajok, perorsianik nerrerᴋârtuksauvok. Kamagikit oᴋautsikka.
7Nâlekable tukkisitiniarpâtit tamainik.
8Jêsuse Kristûse erᴋarniaruk, toᴋungajunit makitok, Dâvidib kinguvânga, oᴋautsit tussarnertut oᴋautigijakka maliklugit.
9Tamakkoa pivlugit kappiasuktitauvunga ᴋelaksugauvlunga aglât, idluitulijotut; Gûdible oᴋausingit ᴋelaksugaungilat.
10Tamanna pivlugo kappianartut tamaita ᴋenuersârutigivakka anerimajut pivlugit; tâpkoatauk piulijaunermik Kristûseme Jêsusemêtomik perᴋovlugit, ânanaunek nâksaungitok illagilugo.
11Tamadja oᴋausek okpernartoksôjok: toᴋoᴋatigiguptigo, inôᴋatigijomârivavuttauk;
12Kenuersârupta, atanioteᴋattaujomârivogut; missiarutigiguptigo, missiarutigijomârivâtiguttauk.
13Uvagut okpingikalloaruptalônêt, tâmna nelâgôtsainarpok; ingminik missiarutigijungnangilak.
14Tamakkoninga erᴋaitikit, kigligiutsilerillo Nâlekab sângane, oᴋausituinait pivlugit akkerartorᴋonagit; tamanna atungimat, tussartulle kigdlormut sâtitsungnarpait.
15Pinasuatsialerille Gûdemut takotilutit idluartomik sanajotut passijaksaungitotut, mikseᴋârnerub oᴋausinginik ingmigôlingatitsijotut idluartomik.
16Anerneliungitut ᴋuksalainerit oᴋâlagalâdlarnerit allakit; angijomik aglivalliatitsingmatta idluitulinermik.
17Taipkoalo oᴋausingit siamarterdlutik sujuktitsivut uviniub ukkisimaningatut; taipkoa illâgik Himenêuselo Filêtuselo.
18Taipkoa mikseᴋârnek tamaivâk, makinermik pijarêrtomik oᴋarlutik; ilangitalo okperningit mumiktilaukpait.
19Gûdible tungavilianga sôngojok aulajungnangerpok, imaitomik nalunaikutalik; Nâlekab pine illitarivait; imaitomiglo: Kristûsib atinganik taisijok idluitulinermik atorungnairle.
20Iglomele angijome iluleᴋuteᴋarpok goldiniglo silberiniglo kissêniungitok, ᴋejungniglole machaniglo; ilangillo nertornartomut, ilangille nachonartomut ilingavut.
21Tagva naliat avikune inungnit tâpkonangat, tâmna iluleᴋutauniarpok ivsornaitok, nertornartok, iglub inuanut atornarlune, ajungitulinernullo tamainut atuinauvlune.
22Inôsuktut ikligunerivaktangit ᴋemangniakit; idluarnerle pinasuaruk, okpernerlo, naglingnerlo, ullapirsainerlo ilûnaita Nâlekamut tuksiartut illagivlugit ômamut ivjornaitomut.
23Apertsûtille silaitut atungitullo allakit, nalunginangne, aivatitsituinarmatta.
24Nâlekable kivganga aivasungutailijuksauvok, tamainulle inôtsiarlune, ajoᴋertuinermik pitsiarlune; ningarosuktunik kamangitsertorungnarlune ᴋenuersârnermut;
25Tapatojullo inerterungnarlugit, (neriuklune,) Gûdib taipkua sukutsiane tunitsiviginiarmangâgit ᴋaᴋialernermik, mikseᴋârnek illitarijungnarlugo;
26Amalo tupalerniarmangâta Sâtanasib niganganit; tâpsomunga napersimagamik, pijomajanganik piniartuksauvlutik.
Currently Selected:
II Timôteusemut 2: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.