Amos 9
9
Dagiti Panangukom ni Yahweh
1Nakitak ti Apo nga agtaktakder iti abay ti altar. Imbilinna: “Masoem ti tuktok dagita nga adigi ti Templo agingga a magunggon dagiti fondasion. Duprakem ida ket bay-am a matupakan dagiti tattao. Papatayekto iti gubat dagiti natda kadakuada. Awanto ti makalibas. Awanto ti makalisi. 2Uray no agkalida iti dalanda a mapan iti lubong dagiti natay, tiliwekto ida. Uray no umulida sadi langit, ibabakto ida. 3No aglemmengda iti tapaw ti Bantay Carmel, birokekto ida ket tiliwek ida. No ilemmengandak iti lansad ti taaw, bilinekto ti dragon ti taaw#3 Dragon ti taaw: Adda pammati idi nga adda dakkel a dragon nga agnanaed iti baybay. Kas met iti amin a naparsua, iturayan ti Dios daytoy a dragon. a mangalun-on kadakuada. 4No italaw ida a kas balud dagiti kabusorda, papapataykonto ida iti kampilan. Diak tulongan ida, ket inkeddengkon a patayen ida.”
5Ni Apo Dios a Mannakabalin-amin sagidenna ti daga ket agginggined;
agdung-aw ti amin nga agnaed sadiay.
Kas iti Karayan Nile, dumakkel ken ages-es ti entero a lubong.
6Agaramid ni Yahweh iti balayna idiay langit;
ikabilna ti tangatang iti ngatoen ti daga.
Ayabanna dagiti danum iti taaw, ket ibuyatna ida iti rabaw ti daga.
Ni Yahweh ti naganna.
7Kuna ti Apo, “Dakayo nga Israelita, agpada ti pannakilangenko kadakayo ken kadagiti taga-Etiopia. Inruarko dagiti Filisteo idiay Creta ken dagiti taga-Siria idiay Kir, kas iti panangiruarko kadakayo idiay Egipto. 8Siak, ti Apo a Dios, sipsiputak daytoy managbasol a pagarian ti Israel; pukawekto iti rabaw ti daga. Ngem saankonto a dadaelen amin a kaputotan ni Jacob.
9“Ibilinko a mayakayak ti Israel a kas iti bukel. Wen, yakayakekto ida iti ayan dagiti nasion tapno maikkat ti amin nga awan serserbina kadakuada. 10Matayto iti paggugubatan ti amin a managbasol kadagiti tattaok—wen, amin nga agkuna, ‘Dinto ipalubos ti Dios a maan-anotayo.’”
Ti Pannakabangonto manen ti Israel
11Kuna#Ara. 15:16-18. ti Apo, “Umayen ti aldaw a bangonek manen ti pagarian ni David a mayarig iti narba a balay. Tarimaanekto dagiti bakudna, ket patakderekto manen. Bangonekto a kas met la iti kasasaadna idi. 12Tagikuaento dagiti Israelita ti nabati a daga ti Edom ken ti amin a pagilian a kukuak idi.” Kastoy ti sao ti Apo a mangibanagto iti daytoy.
13Kuna ti Apo, “Umayen dagiti aldaw
a madama pay la ti ani,
ngem tiempo manen ti panagarado.
Madama pay laeng ti panagaramid iti arak,
tiempo manen ti panagpurruak.
Agtedtedto dagiti bantay iti nasam-it nga arak
ket agayusto kadagiti turod.
14Isublikto dagiti tattaok iti dagada.
Bangonendanto manen dagiti nadadael a siudadda
ket agnaeddanto sadiay.
Agmuladanto iti ubas,
ket inumendanto ti arakna.
Agmuladanto kadagiti minuyongan,
ket kanendanto ti apitda.
15Ipasdekkonto dagiti tattaok iti daga nga intedko kadakuada,
ket didanto maipanawen.”
Ti Apo a Diosyo ti nagsao iti daytoy.
Currently Selected:
Amos 9: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society