Amos 8
8
Ti Parmata maipapan iti Sangabasket a Frutas
1Daytoy ti parmata nga impakita kaniak ti Apo a Dios: Nakitak ti maysa a basket a napno iti frutas. 2Sinaludsod ti Apo, “Amos, ania ti makitam?”
“Sangabasket a frutas,” insungbatko.
Kinuna ti Apo, “Dimtengen ti panungpalan#2 Agpadpada ti pannakabalikas ti frutas ken panungpalan iti pagsasao a Hebreo. dagiti tattaok nga Israelita. Dusaekon ida. Saankon a baliwan ti pangngeddengko. 3Iti dayta nga aldaw, agbalinto a dung-aw dagiti kankanta iti palasio. Agkaiwaranto dagiti bangkay. Maibellengdanto iti ruar nga awan arimekmek.”#3 iti ruar nga awan arimekmek; wenno iti ruar. Ulimek!
Ti Pannakadusa ti Israel
4Denggenyo daytoy, dakayo a mangilupitlupit kadagiti marigrigat ken agpanggep a mangdadael kadagiti napanglaw iti pagilian. 5Kunayo iti bagiyo, “Kaano nga agtapos ti luttuad tapno mailakomi dagiti bukbukel? Kaanonto ti panaggibus ti Aldaw a Panaginana tapno mailakomi dagiti trigomi? Nanginanto ti panagilakomi. Usarenminto dagiti saan a husto a pagsukatan, ket padagsenanminto dagiti timbangan tapno masaur dagiti aggatgatang. 6Nanginanto ti pangilakoanmi iti awan serserbina a trigo. Agbirokkaminto iti napanglaw a tao, daydiay saan a makabayad iti utangna, uray gatad la ti sangaparis a sapatos, ket gatangenmi a kas tagabu.”
7Insapata ti Apo a Dios ti Israel, “Pulos a diakto malipatan dagiti dakes nga aramidda. 8Iti kasta, aggingginedto, ket agdanagto ti amin a tattao iti pagilian. Agkintayegto ti entero a pagilian; ngumato ken bumaba a kas iti Karayan Nile. 9Iti dayta nga aldaw, palnekekto ti init iti agmatuon, ket agsipngetto ti daga iti aldaw. Siak, ti Apo a Dios, ti nangibaga iti daytoy. 10Pagbalinekto a pagdudung-awan dagiti pagrarambakanyo. Pagbalinekto met a sangsangit dagiti naragsak a kankantayo. Pagkawesenkayto iti nakersang a lupot ket kuskosanyonto dagiti uloyo. Mayarigkayto kadagiti nagannak a mangdungdung-aw iti kakaisuna nga anakda. Nasaemto dayta nga aldaw agingga iti kamaudianan.
11“Umayen ti tiempo a panangyegko iti bisin iti daga. Saanto a tinapay ti pakabisinan dagiti tattao. Saanto a danum ti pakawawanda. Mabisin ken mawawdanto iti mensahe nga aggapu ken ni Yahweh. Siak, ti Apo a Dios ti nangibaga iti daytoy. 12Agkalkallautangto dagiti tattao manipud iti Natay a Baybay agingga iti Taaw Mediterranean, sa aglikmut manipud iti daya agingga iti laud. Sapulendanto a sipapasnek ti sao ni Yahweh, ngem didanto masarakan. 13Iti dayta nga aldaw, matalimudawto iti waw uray pay dagiti napipintas a babbalasang ken napipigsa a babbaro. 14Dagiti agsapata iti sangoanan dagiti didiosen ti Samaria, isuda nga agkuna, ‘Iti nagan ti dios ti Dan’ ken ‘Iti nagan ti dios ti Beerseba’—matumbanto dagitoy a tattao ket saandanton a makabangon.”
Currently Selected:
Amos 8: RIPV
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
© 1996 Philippine Bible Society