1 PEDRO 1
1
1Pedro laca na' nu nscua na' quityi re cha' ca̱a̱ slo lcaa cu'ma̱ nu ngusñi ma̱ cha' ji'i̱ Jesús, cu'ma̱ ngu' nu ndi'i̱ tyijyu'. Ntsu'u cu'ma̱ nu ndyalaa ma̱ nde loyuu su cuentya Ponto; xi xa' la tya'a cu'ma̱ ndyalaa ma̱ nde loyuu su cuentya Galacia, jua'a̱ loyuu su cuentya Capadocia, jua'a̱ loyuu su cuentya Asia, jua'a̱ loyuu su cuentya Bitinia cua lye tsa ngañi ma̱. Cña nu nda ycui' Jesucristo 'na, bi' laca cha' tsa'a na' chcui' na' cha' ji'i̱ Ni lo'o xa' la ñati̱. 2Tya clyo la cua jlo ti' ycui' Ndyosi Sti na lcaa ña'a̱ cha' nu caca nde loo la, bi' cha' ngusubi ycui' Ni ji'i̱ ma̱. Lo'o juani ndyu'ni Xtyi'i ycui' Ndyosi cña cha' tyanu lubii cresiya ji'i̱ ma̱, cha' taquiya' ma̱ ji'i̱ ycui' Jesucristo; na cua ngujuii yu lo crusi xqui'ya cu'ma̱, ndyalú tañi yu cha' caja ñi'ya̱ caca lubii cresiya ji'i̱ ma̱. Lo'o juani nti' na' cha' ña'a̱ ti tya cua'ni ycui' Ndyosi cha' tso'o lo'o ma̱, cha' jua'a̱ ti̱ ti tyi'i̱ tyiquee ma̱ lcaa hora.
Ndu̱ ti' na cha' caja chalyuu nu ná nga'a̱ cha' tye ji'na
3Cua'ni tlyu na ji'i̱ ycui' Ndyosi, la cui' bi' laca nu ndu'ni tlyu Jesucristo nu Xu'na na ji'i̱, la cui' Sti Jesucristo nu Xu'na na laca bi'. Tya'na tsa ti' ycui' Ni ña'a̱ Ni ji'na, bi' cha' ngua'ni cucui Ni cresiya ji'na; ntsu'u chalyuu cucui ji'na juani, xqui'ya cha' ndyu'ú ycui' Jesucristo chaca quiya' nu lo'o ngujuii yu. Lo'o nu juani cua ndu̱ ti' na cha' caja chalyuu nu ná nga'a̱ cha' tye ji'na, 4xqui'ya cha' cua ngua'ni lyaá Jesús ji'na. Ná ntsu'u ni sca cha', ni sca ñati̱ nu taca cua'ni ñu'u̱ ji'i̱ cha' nu cua ngujui ji'na; ni sca na tsiya' ti, ná ca cua'ni tye na bi' ji'i̱ cha' tso'o nu tyacua ji'na ca slo ycui' Ndyosi lo'o cua tye ti cha', ná ntsu'u na nu taca cua'ni cuxi ji'i̱ cha' bi'. 5Cua ngusñi ma̱ cha' ji'i̱ ycui' Ndyosi, bi' cha' ndu̱ Ni cua̱ ji'i̱ ma̱ juani cha' ña'a̱si̱i̱ Ni ji'i̱ ma̱. Ná ntsu'u ni sca na nu nguula la juersa ji'i̱, nu taca ji'i̱ tyiji̱loo ji'i̱ ycui' Ndyosi; cua'a Ni ji'i̱ ma̱ ji'i̱ nu cuxi, cha' cua'ni lyaá Ni ji'i̱ ma̱ lo'o tye chalyuu re, cha' cua ndyaa Ni ngua'ni cho'o Ni su tyi'i̱ ma̱ ca slo ycui' Ndyosi.
6Bi' cha' caca chaa ti' ma̱ juani, cha' tso'o tsa ntsu'u tyiquee ma̱, masi ntsu'u quiya' xñi'i̱ ti' ma̱ xqui'ya lcaa lo cha' ti'í nu ndyacua ji'i̱ ma̱; pana xti ti tyempo nu ca xñi'i̱ ti' ma̱. 7Ndyacua cha' ti'í ji'i̱ ma̱ jua'a̱, cha' taca cua'ni cuayá' Ni ji'i̱ ma̱, si chañi cha' ngusñi ma̱ cha' ji'i̱ ycui' Ni. Jlo ti' ma̱ cha' quiña'a̱ tsa nga'a̱ chcua̱ oro; pana hora ti ndu'ni cuayá' ngu' ji'i̱ oro bi' lo'o quii' cha' tyalá bi', cha' ña'a̱ ngu' si chañi cha' xcui' oro laca bi'. Nde loo la quiñu'u̱ chcua̱ oro, tye cha' ji'i̱, masi quiña'a̱ tsa cña ngua'ni ngu' cha' tyubii oro bi' tya clyo; pana nu cha' ji'i̱ Jesús nu cua ngusñi ma̱ ni, ndulo tsa cha' bi' cuentya ji'i̱ ycui' Ndyosi. Masi quiña'a̱ tsa chcua̱ oro caja ji'na, ná stu'ba tsiya' ti cha' ji'i̱ bi' lo'o ycui' Jesús. Lo'o ndye ndalo ma̱ ji'i̱ lcaa cha' ti'í nu ndyacua ji'i̱ ma̱ xqui'ya cha' ngusñi ma̱ cha' ji'i̱ Ni, li' tso'o tsa cha' nu caja ji'i̱ ma̱ lo'o tyu'u tucua ycui' Jesucristo ca̱a̱ chaca quiya'; ta Ni sca su tso'o cha' tyi'i̱ ma̱ slo ycui' Ni laja xee nu ndubi tsa ca su ntucua ycui' Ni.
8Ntsu'u tsa tyiquee ma̱ ña'a̱ ma̱ ji'i̱ Jesús, masi bilya ña'a̱ ma̱ ji'i̱ Ni; hasta juani tya lyiji ña'a̱ ma̱ ji'i̱, pana jlya ti' ma̱ cha' lu'ú Ni. Chañi cha' tso'o tsa ntsu'u tyiquee ma̱ juani xqui'ya Jesús, ni ná tye chca cha' chcui' ma̱ lcaa cha' tso'o nu ntsu'u tyiquee ma̱ cuentya ji'i̱ ycui' Jesús lo'o xa' ñati̱. 9Cua ngusñi ma̱ cha' ji'i̱ Ni, bi' cha' taca ca cuayá' ti' ma̱ cha' chañi laca cha' cua'ni lyaá Ni ji'i̱ ma̱ lo'o cua ndye chalyuu.
10Nu jyo'o cusu' nu ngua tu'ba ji'i̱ ycui' Ndyosi sa'ni la ni, nchcui' tsa jyo'o cusu' bi' ji'i̱ cha' tso'o nu cua'ni ycui' Ndyosi nde loo la, cha' cua'ni lyaá Ni ji'i̱ ñati̱ tya'a ndi'i̱ na chalyuu; xcui' cuentya ji'i̱ ycui' Ndyosi nchcui' ngu' cha' bi', pana ná ngua cuayá' tso'o ti' ycui' ca ngu' bi' ñi'ya̱ nu cua'ni ycui' Ndyosi cha' caca nde loo la, ni jacua' cua'ni Ni cha' bi'. 11Xtyi'i ycui' Cristo ngulu'u lcaa cha' ji'i̱ ngu' bi', ñi'ya̱ nu caca ji'i̱ ycui' Cristo nde loo la, ñi'ya̱ nu chcube' yu nde loyuu chalyuu, ñi'ya̱ nu tlyu tsa cha' tso'o nu caca ji'i̱ yu lo'o tyaa yu ca slo ycui' Ndyosi chaca quiya'. Lo'o li' ngulana tsa nu ngu' jyo'o bi', cha' quije cha' ji'i̱ ngu' tilaca caca nu Cristo bi', ni tsa̱ tyu'u tucua yu nde chalyuu. 12Pana ná nquije cha' bi' ji'i̱ ngu' bi' li'; sca ti cha' nchcui' ycui' Ni lo'o ngu' bi', cha' si'i ycui' ngu' bi' laca nu ca cuayá' tso'o ti' ñi'ya̱ caca cha' bi' tyempo nde loo la. Pana cu'ma̱ ni, nu lijya̱ chalyuu nde loo la ji'i̱ ngu' jyo'o bi', nchca cuayá' ti' ma̱ juani, xqui'ya cha' cua ndyuna ma̱ lcaa cha' tlyu nu ngua'ni Jesucristo. Cua ndacha' liñi ya cha' bi' ji'i̱ ma̱; chacuayá' ji'i̱ Xtyi'i ycui' Ndyosi ngulu'u ya cha' bi' ji'i̱ ma̱, cha' cua nda ycui' Ndyosi Xtyi'i ycui' Ni lijya̱ lo ya nde chalyuu. Lo'o jua'a̱ lcaa xca̱ ji'i̱ ycui' Ni nu ndi'i̱ slo Ni, lcaa ngu' bi' nti' tsa ngu' ca cuayá' ti' ngu' lcaa cha' nu ngua ji'i̱ Cristo lo'o ñaa yu nde chalyuu.
Nti' ycui' Ndyosi cha' caca lubii cresiya ji'na lcaa tsa̱ lo'o tya ndi'i̱ na chalyuu
13Bi' cha' culacua xi ti' ma̱, tii ti' ma̱ tyi'i̱ ma̱ chalyuu, cha' lcaa tsa̱ jatya ma̱ ji'i̱ cha' tso'o nu cua tlyu xi, nu cua'ni Ni lo'o ma̱ lo'o cua'ni lyaá lyiji Ni ji'i̱ ma̱; jua'a̱ caca nu lo'o tyu'u tucua Jesucristo chaca quiya'. 14Taquiya' tso'o ma̱ ji'i̱ cha' nu nchcui' ycui' Ndyosi cha' caca ma̱ sñi' Ni nu tso'o tsa ndu'ni; nga'aa cua'ni ma̱ cua ña'a̱ ca cha' cuxi nu ndiya ti' ma̱ ñi'ya̱ nu ngua'ni ma̱ tya sa'ni la, nu lo'o bilya ca cuayá' ti' ma̱ cha' tso'o ji'i̱ ycui' Ndyosi. 15Xcui' na lubii tsiya' ti laca ycui' Ndyosi, xcui' liñi tsa cha' nu ndu'ni Ni, lo'o jua'a̱ laca Ni nu Xu'na na juani. Bi' cha' nti' Ni cha' xcui' lubii tsa caca cresiya ji'i̱ ma̱, xcui' cha' liñi cua'ni ma̱. 16Ndi'ya̱ nscua cha' lo quityi ji'i̱ ycui' Ndyosi: “Cua'ni ma̱ cha' caca lubii cresiya ji'i̱ ma̱ lcaa hora, cha' xcui' lubii tsa laca na' tsiya' ti”, nacui̱ ycui' Ndyosi.
17Xcui' liñi ti ndu'ni cuayá' Ni ji'i̱ ñati̱, ñi'ya̱ laca cha' tso'o nu ngua'ni scaa ngu', ñi'ya̱ laca cha' cuxi nu ngua'ni scaa ngu' laja lo'o ndi'i̱ ngu' chalyuu. Bi' cha' ntsu'u cha' cutsi̱i̱ ma̱ xi lo'o chcui' ma̱ lo'o ycui' Ndyosi ndi'ya̱: “Sti ya”, ñacui̱ ma̱ ji'i̱ Ni. Ntsu'u cha' taquiya' ma̱ ji'i̱ ycui' Ndyosi Sti na lcaa tsa̱ lo'o tyi'i̱ ma̱ chalyuu, cha' xcui' cha' tso'o cua'ni ma̱ cuentya ji'i̱ Ni. 18Cua ngua'ni lyaá Ni ji'i̱ ma̱ ji'i̱ lcaa cha' cuxi nu ntsu'u ji'i̱ ma̱, bi' cha' nga'aa ntsu'u cha' cube ti' ma̱ ji'i̱ lcaa cha' nu nguxtyanu jyo'o cusu' ji'na cha' cua'ni na. Nda jyo'o cusu' bi' cha' bi' lo'o na, masi jlo ti' ngu' bi' cha' ná caja ñi'ya̱ nu clyaá na ji'i̱ qui'ya nu ntsu'u ji'na lo'o cha' bi'. Pana cua nda ycui' Ndyosi caya' cha' tyu'ú na su lubii juani; si'i cñi plata laca cha' bi', ni si'i cñi oro laca nu nda Ni, cha' si cñi laca bi' ni, quiñu'u̱ bi' masi chalyuu juani ti. 19Nu lo'o ngujuii Cristo lo crusi lo'o ndyalú tañi ycui', li' nda Ni caya' loo qui'ya nu ntsu'u ji'na, cha' ngua Cristo ñi'ya̱ nti' sca msta̱ lu'ú nu xcui' na tso'o, nu xcui' na lubii; lo'o nu tañi ycui' Cristo bi' ni, bi' laca caya' nu ngua'ni lyaá ji'na.
20Tya clyo lo'o bilya cuiñá Ni chalyuu, cua jlo ti' ycui' Ndyosi cha' ntsu'u cha' cua'ni Cristo cña tonu bi'; pana ngujuatya ycui' Ni ni jacua' nu tyalaa tyempo bi'. Li' ñaa Cristo, ngua'ni yu cña bi' cuentya ji'na, cha' tyacua cha' tso'o bi' ji'na. 21Xqui'ya Cristo, bi' cha' jlya ti' ma̱ ji'i̱ ycui' Ndyosi, cha' cua ngua'ni ycui' Ni cha' ndyu'ú Cristo chaca quiya' lo'o cua ngujuii yu. Lo'o li' nda ycui' Ndyosi sca su tso'o su tyi'i̱ Cristo, ca su tlyu su ntucua ycui' Ni. Ngua'ni Cristo cña tonu bi', cha' taca xñi ma̱ cha' ji'i̱ ycui' Ndyosi, lo'o li' taca tyu̱ ti' ma̱ cha' caca lcaa ña'a̱ cha' nu nacui̱ Ni cha' caca.
22Xqui'ya cha' nxtyucua Xtyi'i ycui' Ndyosi ji'i̱ ma̱, na cua ndaquiya' ma̱ ji'i̱ cha' liñi nu nda ycui' Ndyosi lo'o na, bi' cha' ngua lubii cresiya ji'i̱ ma̱; juani taca caca tso'o tyiquee ma̱ ña'a̱ ma̱ ji'i̱ tya'a ñati̱ ma̱. Pana tyucui tyiquee ma̱ ntsu'u cha' caca tso'o tyiquee ma̱ ña'a̱ ma̱ ji'i̱ tya'a ñati̱ ma̱, si'i ñi'ya̱ ndu'ni ngu' nu ntsu'u tucua cha' tyiquee ngu' cua'ni cu'ma̱. 23Laca ma̱ ñi'ya̱ si cua ngula ma̱ chaca quiya', pana si'i ñi'ya̱ nu ngula ti ma̱ ji'i̱ xtya'a̱ ma̱; cua ngua cucui cresiya ji'i̱ ma̱ xqui'ya cha' nduna ma̱ cha' nu nchcui' ycui' Ndyosi nu lu'ú ca, ycui' Ndyosi nu ná nscua cha' cajaa Ni tsiya' ti. 24Ndi'ya̱ nscua cha' lo quityi ji'i̱ ycui' Ndyosi:
Ñi'ya̱ laca quixi̱', jua'a̱ laca ñati̱ chalyuu.
Lcaa na nu tso'o ña'a̱ nu ntsu'u ji'i̱ ñati̱ laca ñi'ya̱ nti' sca queé nu ndyu'ú ne' quixi̱' ti;
ndyanaa quixi̱' bi', li' ndye queé bi', ngüityi tsiya' ti.
Lo'o jua'a̱ laca lo'o ñati̱ lo'o lcaa cha' tso'o nu ntsu'u ji'i̱ ngu' nde chalyuu,
tye cha' tso'o bi' ji'i̱ ngu' stu'ba ti lo'o ycui' ngu'.
25Pana scaa cha' nu nchcui' ycui' Ndyosi ni, tyanu cha' bi';
ná quiñu'u̱ cha' bi' tsiya' ti.
Jua'a̱ nacui̱ quityi bi'. Lo'o jua'a̱ nu cha' tso'o ji'i̱ ycui' Ndyosi nu ngulu'u ya ji'i̱ ma̱, la cui' cha' bi' laca nu ná quiñu'u̱ tsiya' ti.
Currently Selected:
1 PEDRO 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.