SANTIAGO 5
5
Sca cha' nu nchcui' yu lo'o ngu' culiya'
1Juani ni, cua'a̱ jyaca̱ ma̱ xi 'na laja lo'o ta na' sca cha' lo'o cu'ma̱, nu laca ma̱ ngu' culiya'. Tso'o la si xi'ya ma̱ juani, cunaa ma̱ li' xqui'ya cha' ti'í nu cua lijya̱ cha' tyacua ji'i̱ ma̱, 2cha' cua nguliji yu'u cha' culiya' ji'i̱ ma̱ jua'a̱ ti. Cua ngunu'u̱ lyiji lcaa late' tso'o ji'i̱ ma̱, cha' cua ndyacu cuixu̱' ji'i̱. 3Lo'o jua'a̱ cua ntyucua cuayaa' chu̱' lcaa chcua̱ oro ji'i̱ ma̱, lcaa chcua̱ plata ji'i̱ ma̱. Nu lo'o ña'a̱ ngu' ñi'ya̱ ndyaca ji'i̱ yu'ba bi' ji'i̱ ma̱, li' ca cuayá' ti' ngu' cha' ñi'ya̱ lo'o ngunu'u̱ chcua̱ oro chcua̱ plata nu ntsu'u ji'i̱ ma̱, jua'a̱ cua ndye cha' ji'i̱ lcaa ma̱; ñi'ya̱ laca si ndyaqui̱ lyiji ma̱ lo quii', cua ndye cha' ji'i̱ ma̱ li'. Quiña'a̱ tsa cha' tso'o cua nguxco'o ma̱ nquicha', cha' cua'nijo'o ji'i̱ ma̱ nde chalyuu, pana cua ngulala ti tye lcaa cha' nde lo yuu chalyuu. 4Lo'o jua'a̱ ná nda ma̱ xcaya' msu nu ndyaa ne' xña ji'i̱ ma̱, bi' cha' juani cua'a̱ jyaca̱ ma̱ xi ji'i̱ cha' nu nxlyú msu bi' hichu̱' ma̱; ca su ntucua ycui' Ndyosi nu laca Xu'na lcaa chalyuu, ca bi' ndañi nchcui' nu ngu' nu ngua'ni clacua ji'i̱ ma̱. 5Xcui' tso'o tsa laca su ndi'i̱ ma̱ chalyuu; pana bata chcu̱' laca cu'ma̱, cha' xcui' nclyana ma̱ lcaa ña'a̱ cha' tso'o nu caca tyaala' tyiquee ma̱. Lo'o nu juani cua ngulala ti tyalaa tsa̱ cha' cajaa ma̱, cha' li' cua'ni cuayá' ycui' Ni ji'i̱ ma̱. 6Laja lo'o tya ndi'i̱ ma̱ nde chalyuu nsta ma̱ qui'ya ji'i̱ ngu' ti'i nu ná ntsu'u cha' cuxi nu ngua'ni bi'; ndyujuii ma̱ ji'i̱ ngu' bi', masi ná nchca ji'i̱ ngu' bi' cua'ni lyaá ngu' ji'i̱ ycui' ca ngu'.
Talo na tyiquee' cha' xacui̱ ycui' Ni sca cha' ji'na nu ngüijña na ji'i̱
7Cu'ma̱ tya'a ngusñi na cha' ji'i̱ Jesús, talo ma̱ tyiquee' cha' ntajatya ma̱ ji'i̱ ycui' nu Xu'na na, ni jacua' ca̱a̱ Ni chaca quiya' nde chalyuu. Ñati̱ nu cua ndyataa xtya̱ ji'i̱ ni, ndalo tsa tyiquee ngu' ntajatya ngu' ni jacua' tyu'u si'yu nu ndulo tsa cha' caja ji'i̱ ngu'; ndu̱ ti' ngu' bi' cha' ca'ya tyo, masi tyo nu ca'ya yala la, masi tyo nu ca'ya tiya' la. 8Lo'o jua'a̱ cu'ma̱ ni, nga'a̱ cha' talo ma̱ tyiquee'; cua'ni nguula ti' tyiquee ma̱, cha' ná tya'a̱chu̱' ma̱ ji'i̱ ycui' Ndyosi, cha' cua ngulala ti ca̱a̱ ycui' nu Xu'na na chaca quiya' nde chalyuu. 9Cu'ma̱ tya'a ngusñi na cha' ji'i̱ ycui' Ni, ná chcui' ma̱ cha' ti'í ji'i̱ ngu' tya'a ma̱, cha' ná sta Ni qui'ya ji'i̱ ma̱ li'. Cua ngulala ti tyalaa ycui' nu Bese nu laca loo ca su ndi'i̱ na. 10Cu'ma̱ ngu' tya'a na, tyi'u ti' ma̱ ñi'ya̱ ngua ji'i̱ jyo'o cusu' ji'i̱ ma̱ nu ngua tu'ba ji'i̱ ycui' Ndyosi cua sa'ni la; tyiquee' tsa ndalo ñati̱ bi', masi lye tsa nchcube' ycui' ngu'. 11Nacui̱ na cha' tso'o tsa ntsu'u tyiquee jyo'o bi', cha' cua ndalo tsa tyiquee ngu' lo'o nguxcube' ñati̱ ji'i̱ ngu' tyempo bi'. Cua ndyuna ma̱ ñi'ya̱ ngua cha' tyiquee' tsa ndalo jyo'o Job, nu lo'o quiña'a̱ tsa cha' cuxi ngua ji'i̱ yu. Lo'o li' su cua ndye cha', xa' ndya Ni lcaa cha' tso'o ji'i̱ yu chaca quiya'. La cui' jua'a̱, xcui' na tya'na ti' Ni ji'na, xcui' tso'o ntsu'u tyiquee Ni ña'a̱ Ni ji'na.
12Nde laca sca cña nu ná nga'a̱ cha' cua'ni na tsiya' ti, cu'ma̱ tya'a ngusñi na cha' ji'i̱ ycui' Ndyosi: Ná cua'ni ma̱ jura laja ti lo'o xtañi ycui' Ni lo'o cua quiñi ti sca cha' ji'i̱ ma̱ lo'o xa' ñati̱; ná ñacui̱ ma̱: “Chacuayá' ji'i̱ ycui' Ndyosi nu ntucua nde cua̱”, ni ná ñacui̱ ma̱: “Chacuayá' ji'i̱ ndyosi nde lo yuu”. Ná culotu̱ ma̱ ni sca xtañi Ni tsiya' ti, cha' caja ñi'ya̱ nu tyanu tachaa cha' ji'i̱ ma̱ lo'o ñati̱. Tsa bi' ti cha' ñacui̱ ma̱ ji'i̱ ñati̱: “Cua'ni na'”, ñacui̱ ma̱, si taca cua'ni ma̱ ji'i̱; lo'o jua'a̱ “Ná cua'ni na'”, ñacui̱ ma̱, si ná nchca cua'ni ma̱ ji'i̱. Ná caja ñi'ya̱ sta Ni qui'ya ji'i̱ ma̱ li'.
13Nu lo'o lye tsa nchcube' scaa ma̱, xqui'ya cha' ngusñi ma̱ cha' ji'i̱ Jesús, tso'o si chcui' ma̱ lo'o ycui' Ndyosi la cui' hora bi'. Lo'o jua'a̱ si ntsu'u scaa ma̱ nu chaa tsa ti' ma̱, tso'o tsa si cula tu'ba ma̱ sca ji̱i̱ ji'i̱ ycui' Ndyosi li'. 14Lo'o ntsiya sca ngu' tya'a ma̱ nu quicha, li' tso'o cuane ma̱ ji'i̱ ngu' cusu' tya'a ngusñi ma̱ cha' ji'i̱ ycui' Ni, cha' ca̱a̱ ngu' cua'ni ngu' jo'o ji'i̱ nu quicha bi'. Lo'o li' jña ngu' bi' cha' clyu ti' ji'i̱ ycui' Ndyosi, cha' cua'ni Ni cha' tyaca tso'o nu quicha bi'; cuati salú ngu' setye nu ntsu'u taná lo hichu̱' yu quicha bi' chacuayá' ji'i̱ ycui' nu Xu'na na. 15Tyaca tso'o nu ñati̱ quicha bi' li', xqui'ya cha' jlya ti' ma̱ cha' nu cua nchcui' ma̱ lo'o ycui' Ndyosi; tya ta Ni chalyuu ji'i̱ nu quicha bi' chaca quiya', lo'o jua'a̱ cui'ya Ni cha' clyu ti' ji'i̱ yu ji'i̱ qui'ya nu ntsu'u ji'i̱ yu. 16Bi' cha' lacua, ñii ma̱ ji'i̱ ngu' tya'a ma̱ si ntsu'u qui'ya ji'i̱ ma̱, cuati jña ma̱ cha' clyu ti' ji'i̱ ngu' tya'a ma̱ lo'o ycui' Ndyosi, cha' ca tso'o tyucui ña'a̱ ma̱ chaca quiya'. Quiña'a̱ tsa cña caca ji'i̱ sca ñati̱ nu lubii cresiya ji'i̱ cuentya ji'i̱ ycui' Ndyosi, nu lo'o jña yu sca cha' ji'i̱ Ni. 17Ñati̱ chalyuu ti ngua jyo'o Elías; ñi'ya̱ laca na ñati̱ chalyuu, la cui' jua'a̱ ngua yu ñati̱. Pana ngua sca quiya' nu tya'na tsa nchcui' yu lo'o ycui' Ndyosi cha' ná ca'ya tyo chalyuu bi'; lo'o li' chu̱' sna yija̱ cla'be ná ngua'ya tyo tsiya' ti. 18Ña'a̱ cuayá' nu nchcui' yu lo'o Ni chaca quiya', li' xa' ngua'ya tyo tso'o ti; lo'o li' ngua tso'o lcaa na cuiñii ji'i̱ ngu'.
19Cu'ma̱ tya'a ngusñi na cha' ji'i̱ Jesús, nu lo'o ntsu'u sca ngu' tya'a ma̱ nu cua tya'a̱chu̱' ti ji'i̱ cha' tso'o ji'i̱ Jesús bi', tso'o tsa caca cha' si caca ji'i̱ scaa ma̱ chcui' tso'o ma̱ lo'o yu, cha' xñi yu cha' ji'i̱ ycui' Ndyosi chaca quiya'. 20Si ntsu'u cu'ma̱ nu caca ji'i̱ ma̱ cua'a ma̱ ji'i̱ tya'a ñati̱ ma̱ cha' ná cua'ni ngu' cha' cuxi, cha' culu'u ma̱ cha' ji'i̱ ycui' Ndyosi ji'i̱ ngu' bi' chaca quiya', tso'o tsa cña cua'ni ma̱ li'; taca cua'ni lyaá ma̱ ji'i̱ ngu' bi' li', cha' ná chcuna' chalyuu ji'i̱ ngu'. Lo'o jua'a̱ caja ñi'ya̱ nu cui'ya ycui' Ndyosi cha' clyu ti' ji'i̱ ngu' ji'i̱ lcaa qui'ya nu ntsu'u ji'i̱ ngu' bi'.
Currently Selected:
SANTIAGO 5: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.