1 PEDRO 2
2
1Lo'o cu'ma̱ ni, nga'a̱ cha' xtyanu ma̱ ji'i̱ lcaa cha' cuxi nu ntsu'u tyiquee ma̱ ña'a̱ ma̱ ji'i̱ tya'a ñati̱ ma̱: nga'aa cñilo'o ma̱ ji'i̱ tya'a ma̱, nga'aa si'i tucua cha' tyu'u tyiquee ma̱, nga'aa tyacui ti' ma̱ ji'i̱ sca na nu ntsu'u ji'i̱ tya'a ñati̱ ma̱, nga'aa chcui' ma̱ cuentyu ji'i̱ tya'a ñati̱ ma̱. 2Ñi'ya̱ laca sca cubi' cuañi' nu ngula ca ti, jua'a̱ laca cu'ma̱ cuentya ji'i̱ ycui' Ndyosi, cha' tsubi' ti ngusñi ma̱ cha' ji'i̱ ycui' Ni. Lu'ba ti ntyi' cubi' cuañi' cha' ntyute' tsa; si ná cati' lu'ba ti, ná caluu cubi' tsiya' ti. Lo'o jua'a̱ cu'ma̱ ni, tso'o la si cua'ni cña ti' ma̱ cha' ca tsa'a̱ la ma̱ cha' ji'i̱ ycui' Ndyosi, cha' ñi'ya̱ nti' styi', jua'a̱ laca cha' ji'i̱ ycui' Ndyosi cuentya ji'i̱ ma̱. Cua'ni bi' cha' caca nguula la ti' tyiquee ma̱ cuentya ji'i̱ ycui' Ndyosi, cha' taca clyaá ma̱ ji'i̱ cha' cuxi. 3Cua ndyo'o cuayá' ma̱ xi styi' bi', bi' cha' ngua cuayá' ti' ma̱ cha' tso'o tsa ntsu'u tyiquee nu Xu'na na ña'a̱ Ni ji'na.
Laca Cristo ñi'ya̱ nti' sca quee nu ntucua quiya' ni'i̱
4Ycui' Cristo nu Xu'na na ni, ñi'ya̱ nti' sca quee nu ntucua quiya' ni'i̱, jua'a̱ laca yu, masi na lu'ú ycui'. Nacui̱ ñati̱ chalyuu nu nti' cuiñá ni'i̱ cha' ná tso'o quee bi'; ná ca cua'ni ngu' cña tso'o lo'o bi', nacui̱ ngu'. Pana la cui' Jesús laca nu cua ngusubi ycui' Ndyosi ji'i̱ cha' caca cña ji'i̱ Ni, cha' tyucua yu ca su ntucua quiya' cha', lcaa cha' nu ntsu'u ji'i̱ ycui' Ndyosi.
Bi' cha' nga'a̱ cha' tyatí̱ tso'o tyiquee ma̱ cha' ji'i̱ Cristo bi', 5cha' lo'o cu'ma̱ caca ma̱ ñi'ya̱ si laca ma̱ tyuu cha' tya' sca ni'i̱ ji'i̱ ycui' Ndyosi, masi ña'a̱ lu'ú ti ma̱. Li' xñi ycui' Ni tyuu bi', cha' cuiñá Ni sca ni'i̱ nu tacati tsa cuentya ji'i̱ ycui' Ni. Chaca cha' ni, ñi'ya̱ nti' sti jo'ó nu lubii cresiya ji'i̱ tsiya' ti, jua'a̱ caca lcaa cu'ma̱, cha' taca ji'i̱ ma̱ sta ma̱ msta̱ slo ycui' Ndyosi juani xqui'ya Jesucristo; nu msta̱ bi' laca ycui' ca ma̱, si chañi cha' tyucui tyiquee ma̱ nti' ma̱ taquiya' ma̱ ji'i̱ cha' nu nchcui' ycui' Ndyosi. 6Ndi'ya̱ nscua cha' lo quityi ji'i̱ ycui' Ndyosi:
Ña'a̱ ma̱ yi'a̱. Cua ngusubi na' ji'i̱ sca ñati̱ nu ndulo tsa cha' ji'i̱, ñi'ya̱ nti' sca quee tonu nu quiña'a̱ tsa nga'a̱, nacui̱ ycui' Ndyosi.
Sta na' ji'i̱ ñati̱ bi' cha' caca quee nu nscua quiya' ni'i̱ 'na nde quichi̱ Sión.
Lcaa ngu' nu xñi cha' nu nchcui' nu ñati̱ bi', caca tso'o tyiquee ngu' li';
cha' liñi tsiya' ti laca cha' nu nchcui' ñati̱ bi'.
Jua'a̱ laca cha' nu nscua lo quityi bi'.
7Lo'o cu'ma̱ ni, ndulo tsa cha' ji'i̱ quee bi' cuentya ji'i̱ ma̱, cu'ma̱ nu ngusñi ma̱ cha' ji'i̱ ycui' Ndyosi; pana cuxi tsa cha' caca ji'i̱ ñati̱ nu ná jlya ti' ji'i̱ ycui' Ndyosi tsiya' ti. Ndi'ya̱ nscua cha' lo quityi cha' ji'i̱ quee bi':
Cua nguxcua̱a̱ cuityi ni'i̱ quee tonu bi' clyo, cha' ná tso'o ña'a̱ quee bi' ngua ti' ngu';
pana juani cua ngujui cña nu cua'ni quee bi', cha' ndu̱ su ndulo la cha' ji'i̱ cuentya ji'i̱ ycui' Ndyosi.
8Ndi'ya̱ nscua chaca cha' nu nchcui' ji'i̱ quee bi' chaca se'i̱ lo quityi:
Tyeje sna quiya' ngu' chu̱' quee bi', clyú ngu' tyucui̱i̱ su lijya̱ ngu' lo'o tyucua quee bi' quiya' ngu'.
Jua'a̱ nscua cha' lo quityi bi'; na nclyú ngu' tyucui̱i̱ cha' ná ndaquiya' ngu' ji'i̱ cha' nu nchcui' ycui' Ndyosi. Ngua'ni ycui' Ndyosi jua'a̱ cha' ná taca tya'a̱ ngu' tyucui̱i̱ ji'i̱ Ni si ná xñi ngu' cha' ji'i̱ ycui' Ni.
Ñati̱ nu ntsu'u cha' ji'i̱ lo'o ycui' Ndyosi
9Pana cu'ma̱ ni, cua ngusubi ycui' Ndyosi ji'i̱ cu'ma̱ cha' caca ma̱ ña'a̱ tsaca taju ñati̱ nu ndyu'ni tlyu ji'i̱ ycui' Ni. Laca ma̱ ñi'ya̱ laca sca latya sti jo'ó nu cuentya ji'i̱ ycui' Ndyosi nu laca loo tsiya' ti; ñi'ya̱ tsaca taju ñati̱ lubii laca ma̱ cha' cua'ni tlyu ma̱ ji'i̱ ycui' Ndyosi lcaa tsa̱. Ndu'ni Ni lo'o ma̱: “Ñati̱ 'na laca ma̱”, nacui̱ Ni. Bi' cha' nti' tsa Ni cha' chcui' ma̱ lo'o lcaa ñati̱ lcaa ña'a̱ cha' tso'o nu ngua'ni ycui' Ndyosi lo'o ma̱; cua ngulo Ni ji'i̱ ma̱ ji'i̱ chalyuu cuxi su talya tsa ña'a̱, cha' tya'a̱ ma̱ ca su ndubi tsa xee ji'i̱ ycui' Ni. 10Nu juani laca ma̱ ñati̱ ji'i̱ ycui' Ndyosi, masi nu ngua tya tsubi' la ná ntsu'u cha' ji'i̱ ma̱ lo'o ycui' Ndyosi tsiya' ti. Lo'o jua'a̱ cua nchca cuayá' ti' ma̱ juani cha' ndyu'ni tya'na tsa ti' Ni ji'i̱ ma̱, masi tya tsubi' la ná nchca cuayá' ti' ma̱ cha' ji'i̱ ycui' Ndyosi tsiya' ti.
Ndi'i̱ na chalyuu cha' cua'ni na cua ña'a̱ ca cña ñi'ya̱ nu nti' ycui' Ndyosi cha' cua'ni na
11Cu'ma̱ ngu' tya'a tso'o na, cua nscua cha' tyi'i̱ na ca slo ycui' Ni tyempo ca nde loo la, bi' cha' nga'a̱ cha' tyi'i̱ na chalyuu juani ñi'ya̱ si laca na ngu' tyijyu' nu ná ntsu'u tyi ngu'. Lye tsa chcui' na' lo'o ma̱ juani cha' nga'aa cua'ni ma̱ cua ña'a̱ ca cha' cuxi nu ndijña tyiquee ma̱ cha' cua'ni ma̱; nga'aa taquiya' ma̱ ji'i̱ cha' cuxi bi', cha' jua'a̱ nga'aa caca ji'i̱ nu cha' cuxi bi' cua'ni ñu'u̱ ji'i̱ ma̱. 12Xcui' cha' liñi cua'ni ma̱ lacua; xcui' cha' tso'o cua'ni ma̱, xqui'ya nu ñati̱ nu ná jlya ti' ji'i̱ ycui' Ndyosi tsiya' ti, cha' lo'o ngu' bi' taca ca cuayá' ti' ngu' cha' ñati̱ tso'o laca ma̱. Nu juani nti' ngu' bi' cha' cuxi tsa ñati̱ laca ma̱, bi' cha tso'o la si cua'ni ma̱ xcui' cha' tso'o ti cha' ña'a̱ ñati̱ bi' ji'i̱ ma̱; li' ta ngu' bi' cuentya cha' chañi cha' ñati̱ tso'o laca ma̱. Lo'o ñati̱ bi' cua'ni tlyu ji'i̱ ycui' Ndyosi tsa̱ nu cua'ni cuayá' Ni ji'i̱ ñati̱ li'.
13Xqui'ya Jesucristo nu Xu'na na tucuá ma̱ cha' ji'i̱ lcaa ngu' nu laca loo, masi rey nu laca loo tsiya' ti ji'i̱ nasiyu̱ re, 14masi ngu' gobernador nu laca cña cuentya ji'i̱ rey bi'. Ngu' nu laca gobernador ni, nchcube' ngu' ji'i̱ ñati̱ nu ndyu'ni cha' cuxi, lo'o jua'a̱ ndu'ni chi̱ ngu' loo cua ña'a̱ ca ñati̱ nu ndyu'ni cña tso'o. 15Pana nti' ycui' Ndyosi cha' cua'ni ma̱ xcui' cña tso'o, nga'aa caca chcui' ngu' cha' cuxi ji'i̱ ma̱ li'; masi nu ngu' nu ná nti' ca cuayá' ti', masi nu ngu' nu ná jlo ti' tsiya' ti, ni sca quiya' ná ntsu'u cha' sta ngu' bi' qui'ya ji'i̱ ma̱ li'. 16Ñati̱ nu ndi'i̱ tso'o ti laca ma̱ juani, pana ná tso'o si ná taquiya' ma̱ ji'i̱ ngu' nu laca loo lo yuu chalyuu; msu ji'i̱ ycui' Ndyosi laca ma̱ juani, bi' cha' tso'o la si cua'ni ma̱ cña nu cuentya ji'i̱ ycui' Ni lacua, cha' ña'a̱ xa' ñati̱ cha' ntsu'u cha' ji'i̱ ma̱ lo'o Ni. 17Tso'o si tucuá ma̱ cha' nu nchcui' lcaa ñati̱. Lo'o jua'a̱ cua'ni ma̱ cha' tso'o ti caca tyiquee ma̱ ña'a̱ ma̱ ji'i̱ lcaa ñati̱ ji'i̱ Cristo, cha' tya'a ma̱ laca ngu' bi'. Ndu'ni cha' cutsi̱i̱ ma̱ xi ji'i̱ ycui' Ndyosi, lo'o jua'a̱ ndu'ni cha' cua'ni chi̱ ma̱ loo rey nu laca loo tsiya' ti chalyuu.
Ñi'ya̱ nu nga'a̱ cha' cua'ni ngu' msu lo'o xu'na ngu'
18Cu'ma̱ nu laca ma̱ msu ji'i̱ ñati̱ ni, taquiya' tso'o ma̱ cña ji'i̱ xu'na ma̱, masi ndube ti' xu'na ma̱ ji'i̱ ma̱ xqui'ya cha' tso'o tyiquee ngu' ña'a̱ ngu' ji'i̱ ma̱, masi xña'a̱ tyiquee ngu' ña'a̱ ngu' ji'i̱ ma̱. 19Tso'o tsa ndyu'ni sca msu nu laca ñati̱ ji'i̱ ycui' Ndyosi, nu lo'o ndalo tyiquee msu bi' ji'i̱ xu'na yu, masi xña'a̱ tsa xu'na yu, masi cha' laja ti xcube' xu'na yu ji'i̱ yu. 20Si quiji'i̱ xu'na msu ji'i̱ sca msu ji'i̱ xqui'ya cha' ngua'ni msu bi' sca cha' cuxi, ná sca cha' laca li'; nga'a̱ cha' chcube' msu bi'. Pana cuentya ji'i̱ ycui' Ndyosi, tso'o tsa ndu'ni sca msu si talo tyiquee msu bi' lo'o xcube' xu'na yu ji'i̱ yu laja ti, nu lo'o tso'o tsa ndaquiya' msu bi' ji'i̱ cña ji'i̱ xu'na yu. 21Tya lo'o ngusubi Ni ji'i̱ ma̱, tya li' jlo ti' Ni cha' jua'a̱ xcube' ngu' ji'i̱ ma̱, cha' la cui' jua'a̱ nguxcube' ngu' ji'i̱ ycui' Cristo tya clyo la cuentya ji'i̱ cu'ma̱. Jua'a̱ ngua cha' ngulu'u Cristo ji'i̱ ma̱ ñi'ya̱ caca talo tyiquee ma̱ lo'o xcube' ngu' ji'i̱ ma̱. 22Ná ntsu'u ni sca qui'ya ji'i̱ nu Cristo bi', ni sca cha' cuiñi ná nchcui' yu; 23masi nchcui' ngu' cha' suba' lo'o yu, ni sca cha' tyaala ná nguxacui̱ yu ji'i̱ ngu'; nguxcube' tsa ngu' ji'i̱ yu, pana ná ngua ñasi̱' yu ji'i̱ ngu' li'. Sca ti lo'o ycui' Ndyosi Sti yu nchcui' yu ji'i̱ cha' cuxi nu ndyu'ni ngu' lo'o, cha' sca ti ycui' Ni laca nu xcui' liñi ndu'ni cuaya' ji'i̱ ñati̱. 24Ycui' Cristo laca nu sca ti quiya' ngujui'i̱ ca'a̱ ngu' ji'i̱ lo crusi cha' taca cuityi̱ Ni qui'ya nu ntsu'u ji'i̱ lcaa na, cha' clyaá na ji'i̱ qui'ya nu ntsu'u ji'na; bi' cha' cuentya ji'i̱ Cristo taca tyi'i̱ na chalyuu juani, cha' jua'a̱ tyaja'a̱ na cua'ni na xcui' cha' tso'o nu nti' ycui' nu Xu'na na cha' cua'ni na. Xqui'ya cha' nchcube' ycui' Cristo, bi' cha' ngua ti̱ cha' cuxi nu ntsu'u tyiquee na, ñi'ya̱ nti' lo'o ngua ti̱ cha' quicha na lo'o ndyaca tso'o na. 25Lo'o juani nga'aa ndya'a̱ yu'u ti ma̱, ñi'ya̱ ndya'a̱ yu'u xlya'; na cua nguxtyu̱u̱ ma̱ ñaa ma̱ ca su nga'a̱ ycui' nu Xu'na ma̱ nu ña'a̱si̱i̱ ji'i̱ cresiya ji'i̱ ma̱.
Currently Selected:
1 PEDRO 2: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.