2 Timoteo 3
3
Nunakuna imanö kayänanpaq ninqan
1Timoteo, shumaq käyikï ushanan junaqkunachö nunakuna alläpa jipayänanpaq kanqanta. 2Nunakunam kayanqa kikinllapaq imatapis munaq, qellëllapaq ërayaq, nuna tukuq, Teyta Diospa contran parlaq, tëtanta mamanta mana wiyaq, payllä nikï mana yachaq y Teyta Diospa palabrantapis manakaqpaq churaq. 3Manam kuyakïninkunapis ni ankupäkïninkunapis kanqatsu. Tsënöllam kayanqa tumpakuq, mana käyikushpa imatapis llutanta ruraq, nuna mayinta chikiq y alli ruraqkunapa contran shäriq. 4Jina kayanqam traicionëru, mana yarpakachärishpa imatapis ruraq y alläpa yachaq tukuq. Teyta Dios munashqanta rurayänanpa rantinmi kikinkuna munashqanllatana rurayanqa. 5Nunakuna rikäyänanllapaqmi Teyta Diosmanpis markäkuq tukuyanqa. Tsënö kaptinpis jutsata rurarmi kawakuyanqa. Tsënö kawaq nunakunawanqa ama juntakïtsu.
6Tsënö nunakunam jutsasapa y imëkatapis alläpa gustaq warmikunapa wayinkunamanpis yëkuyan engañayänanpaq. 7Tsë warmikunaqa mëläya yachakurpis Jesucristupa willakïnintaqa imëpis manam käyikuyantsu.
8Janeswan Jambres Moiséspa contran shäriyashqannömi#Éxo. 7.11. llutan yachatsikuqkunapis Jesucristupa willakïninta willapäkuqkunapa contran shäriyan. Llutan yarpëkuna peqankunachö kaptinmi Jesucristupa willakïninta imëpis käyiyantsu. 9Imanö kayaptinpis llutan yachatsikuq kayashqantaqa musyariyanqam. Tsëmi Janesta y Jambresta mana cäsuyashqannö pëkunatapis cäsuyanqatsu.
Pablo kawanqannö Timoteupis kawanqan
10Qamqa yachatsikushqäkunata shumaqmi chaskikurqunki. Kawashqänömi kawëkanki, yarpashqänömi yarpanki, creyishqänömi creyinki, jiparpis awantakushqänömi awantanki, kuyakuq kashqänömi kuyakuq kanki, jipatsiyämaptinpis pacienciakushqänömi pacienciakunki. 11Musyankim Antioquíachö,#Hech. 13.14-52. Iconiuchö#Hech. 14.1-7. y Listrachö#Hech. 14.8-20. nunakuna chikimar qatikachäyämashqanta. Tsënö chikiyämaptinpis pëkunapa makinkunapita Señornintsik Jesucristum salvamashqa. 12Tsënömi Jesucristo munashqannö kawaq kaqtaqa pitapis chikir jipatsiyanqa.
13Aksë nunakunaqa y ulikuqkunaqa waran waran masmi pantakäyanqa. Wakin nunakunata engañayashqannömi kikinkunatapis engañayanqa.
Teyta Diospa palabranta yachakunanpaq käyitsinqan
14Qamqa Teyta Diospa willakïnin alli kashqanta käyikur yachakushqëkinölla shumaq kawakï. Yachatsishuqnikikuna pï kayashqantapis allim musyanki. 15Tsënöllam musyanki wamra kashqëkipita patsa Teyta Diospa palabranta yachatsiyäshushqëkita. Diospa palabranmi käyitsishurqunki Jesucristuman markäkur salvakunëkipaq kashqanta.
16Teyta Diospa palabranchö llapan qellqarëkaqkunaqa Teyta Diospa yarpëninmi këkan. Tsëmi alli këkan yachatsinantsikpaq, käyitsinantsikpaq, willapänantsikpaq y Teyta Dios munashqannö kawanantsikpaq. 17Teyta Diospa palabranta yachakurmi Teyta Diosman markäkuqkuna imëpis listuna këkäyanqa alli kaqkunata rurayänanpaq.
Currently Selected:
2 Timoteo 3: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.