2 Timoteo 2
2
Mana ajayashpa willakunanpaq käyitsinqan
1Timoteo, kuyë tsurïnö kaptikim qamta kënö niq: Jesucristo yanapëkäshuptikiqa mana ajayashpa pë munashqannö kawë. 2Nunakunapa nöpanchö yachatsikushqäta qampis markäkïpaq kaq wawqikunata yachatsi pëkunapis wakinkunata yachatsiyänanpaq.
3Jesucristupa alli soldädun këkarqa imëkata jiparpis pë munashqannö kawë. 4Manam mëqan soldädupis soldädu këninta jaqirïkur juk rurëkunachötsu kakun. Tsëpa rantinqa mandaqnin nishqantam ruran. 5Tsënöllam llallinakur ëqiqkunapis premiuta chaskiyänanpaq reglamentu nishqannö ëqiyan. Tsënö mana rurarqa manam ima premiutapis chaskiyantsu. 6Chakra muruq nunapis murushqan mikïkuna wayuptin puntatam tsë wayïninta llamirin. 7Kë nishqaqkunata shumaq yarpakachaptikiqa Señornintsik Jesucristum yanapashunki shumaq käyikunëkipaq.
8Timoteo, rey Davidpa castanpita Jesucristo yurikushqanta y wanurirpis kawarimushqanta mana qonqëta willakï. Tsëtam noqapis willakïkä. 9Tsëta willakushqäpitam alläpa jipëkä. Kananpis imëka wanutsikushqanömi carcelchö llawirëkä. Noqa llawiraptïpis Jesucristupa willakïnintaqa manam pipis llawirätsintsu. 10Tsëmi imata jiparpis mana ajayashpa Jesucristupa willakïninta willakïkä. Tsënöpam akrashqan kaqkuna Jesucristuta chaskikuyaptin Teyta Dios salvanqa gloriachö wiñëpa kawayänanpaq.
11Kë willakïqa rasun kaqmi këkan:
Jesucristuwan wanushqana këkarqa pëwanmi kawashun.#Rom. 6.8; Col. 2.20.
12Jipëta awantarqa pëwanmi mandakushun.#Rom. 8.17; 1Ped. 4.13.
Negashqaqa pëpis negamäshunmi.#Mat. 10.33; Luc. 12.9.
13Änikushqantsikta mana cumplishqapis pëqa cumplinmi.
Pëqa änikushqanta manam imëpis qonqantsu.
Dios munanqannö willakunanpaq käyitsinqan
14Kë nishqaqkunata wawqikunata y panikunata imëpis yarpätsi. Teyta Diospa shutinchö käyitsi mana cäbiq yachatsikïkunata mana chaskiyänanpaq. Chaskirqa manam Teyta Dios munashqannötsu kawayan, sinöqa wawqikunata y panikunata alläpam llakitsiyan.
15Teyta Dios munanqannö willakïninta shumaq yachatsi. Alli yachatsirqa alli uryaq nuna imapitapis mana penqakushqannömi qampis penqakunkitsu. 16Mana alli yachatsikuqkunawanqa ama büllakïtsu. Pëkunawan büllakuptikiqa wawqikunapa y panikunapa shonqunkunapis waran waranmi chukruyanqa.
17Llutan yachatsikïqa imëka cáncer qeshyanömi jinantinmanpis chëkan. Himeneuwan Filetum tsënö mana cäbiqkunata yachatsir purikäyan. 18Pëkuna nikäyan Jesucristuman markäkur kawarimushqanöna kar wanushqantsikpita manana kawarimunantsikpaq kashqantam. Tsënö yachatsir pantakätsiyaptinmi wakin wawqikuna y panikuna Jesucristuman markäkuyannatsu.
19Wakinkuna mana markäkuyaptinpis Teyta Dios akrashqan kaqkunaqa alli cimientushqa wayinömi këkäyan. Tsëmi Diospa palabranchö kënö qellqarëkan: <<Pëman markäkuqkunataqa Teyta Dios reqinmi>>.#Núm. 16.5; Juan 10.14; 1Cor. 8.3.
Jina kënömi nikan: <<Teyta Diosman#2.19 Wakin qepa kaq griego copiakunaqa Cristuman niyanmi. markäkuqkunaqa jutsata amana rurayätsunnatsu>>.
20Rïcu nunapa wayinchöqa manam qorillapitatsu ni qellëllapitatsu plätukuna këkan. Qerupitapis mitupitapis kanmi. Qoripita qellëpita plätukunaqa precisaqllachö inshiyänanpaqmi. Tsënö kaptinpis qerupita mitupita kaqqa imachöpis waran waran inshikuyänanpaqmi këkan. 21Pipis qoripita plätunö kananpaqqa jutsata mana rurashpa kawatsun y mana cäbiq yachatsikïta ama chaskitsuntsu. Tsënöpam qoripita rurashqa plätuta rïcu nuna inshishqannö pëtapis allita rurananllapaq Teyta Dios inshinqa.
Timoteuta imanö kawananpaqpis ninqan
22Wakin jövinkuna llutanta rurayaptinpis qamqa ama rurëtsu. Sinöqa Teyta Dios munashqannö kawakï, pëman markäkï, pïmëtapis kuyë y llapan nunakunawanpis shumaq kawakï. Tsënölla Señornintsik Jesucristuta alabar limpiu shonquyuqkunawan imëpis juntakï.
23Mana cäbiq yachatsikïkunapita wakinkuna liryakuyaptinpis tsëman ama mëtikïtsu. Tsënö liryakurqa piñatsinakuyankim. 24Señornintsik Jesucristupa sirwiqnin këkarqa piwanpis mana liryakushllapa kawë. Tsënölla llapan nunakunawan shumaq kawakï y alli yachatsikuq y pacienciakuq kë.
25Contrëki shäriqkunata alli shimikillapa käyitsi. Tsënö käyitsiptiki itsa Teyta Dios käyitsinqa jutsankunata jaqirir pë munashqannöna kawayänanpaq. 26Tsënö kawarqa diablupa makinchö këkäyashqanpita yarqukurmi Teyta Diospa makinchöna kawayanqa.
Currently Selected:
2 Timoteo 2: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.