2 Timoteo 4
4
Imëpis willakunanpaq ninqan
1Teyta Diospa shutinchömi y kawaqkunata y wanushqakunata juzgaq [Señor] Jesucristupa shutinchömi qamta niq: 2Chaskikuyänan o mana chaskikuyänan kaptinpis Teyta Diospa palabranta imëpis willakï. Mana ajayashpa shumaq käyitsi, piñapë y kallpatsë.
3Chämunqam tiempu Jesucristupa willakïninta nunakuna manana wiyëta munayänanpaq. Mana alli yachatsikuqkunallatam ashiyanqa y pëkuna yachatsikushqanllatam chaskita munayanqa. 4Manakaqkunallata wiyëta munarmi rasun kaq yachatsikïtaqa chaskiyanqatsu. 5Qamqa Teyta Dios munashqannö kawanëkipaq shumaq käyikï. Imata jiparpis pëman markäkï. Willakïninta pïmëtapis willapë. Mana qelanashpa Teyta Diosta sirwi.
6Wanuratsiyämänanpaqnam këkä. Sacrificiuman ramayashqan vïnu altarchö ushakashqanönam#Éxo. 29.38-41. noqapis ushakänäpaqna këkä. 7Alli soldädunömi llapanta cumplirqü. Imëka llallinakur ëqiqnömi chänäpaq kaqman charqü. Markäkushqänöllam imëpis markäkurqü. 8Kananqa shuyarëkä alli juzgakuq juez Señornintsik Jesucristo kutimunan junaq corönata qaramänanllatanam. Tsë corönaqa këkan pëpa nöpanman jutsannaqta chaskimashqanmi. Manam noqallatsu tsë corönata chaskishaq, sinöqa Jesucristuta shuyäkuqkunaqa llapanmi chaskiyanqa.
Carcelchö kanqanta willapanqan
9Timoteo, rikänakurinantsikpaq raslla shamïkï. 10Wawqintsik Demasmi#Col. 4.14; Film. 24. kikin munashqannö kawakïta munar jaqiramar Tesalónica markaman ewkushqa. Crescentitaqa kacharqü Galacia provinciamanmi, Titutanam#2Cor. 8.23; Gál. 2.3; Tito 1.4. Dalmacia markaman. 11Lucasllanam#Col. 4.14; Film. 24. noqawan këkan. Shamurqa Marcusta#Hech. 12.12, 25; 13.13; 15.37-39; Col. 4.10; Film. 24. pushakamunki. Pëqa Teyta Diospa willakïninta willakuptï allipam yanapamanqa. 12Wawqintsik Tíquicutanam#Hech. 20.4; Efe. 6.21-22; Col. 4.7-8. Éfesuman kachëkämü.
13Troaschömi#Hech. 20.6. Carpupa wayinchö capötïta jaqiramurqä. Shamurqa tsë capötilläta y librulläkunatapis apakallämunki. Mana qonqëllata pergamïnükunatapis apakallämunki.
14Herrëru Alejandrum#1Tim. 1.20. pasëpa conträ tikrakurishqa. Tsënö kashqanpitam Señornintsik Jesucristo castiganqa.#Sal. 62.12; Rom. 2.6. 15Alejandrupitaqa qampis mäkuq mäkuq kakunki. Yachatsikïnintsik llutan kashqantam pitapis nin.
16Autoridäkunapa nöpanchö puntata defendikuptï manam pipis noqaman qaqämushqatsu. Llapanmi japalläta jaqirayämashqa. Tsënö rurayämashqanpita Teyta Dios perdonëkutsun. 17Pëkuna jaqirayämaptinpis Teyta Diosqa noqawan këkarmi kallpatsamashqa. Tsëmi mana Israel autoridäkunapa nöpanchöpis alli willakïninta willakunäpaq yanapamashqa. Wanutsiyämänanpaq këkaptinpis leonpa shiminpitanömi Teyta Dios salvamashqa. 18Tsënöllam llapan mana allikunapitapis salvamanqa. Y mandakïninchö wiñëpa kawanäpaqmi pushakamanqa. ¡Teyta Dios imëpis alabashqa këkullätsun! Tsënö katsun.
Cartapa ushanan
19Napëkullanki Priscilata y Aquilata.#Hech. 18.2, 18. Onesíforupa#2Tim. 1.16-17. castantapis napëkullanki. 20Erastuqa#Hech. 19.22; Rom. 16.23. quedakamushqa Corintuchömi. Y Trófimunam#Hech. 20.4; 21.29. Miletuchö qeshyar quedakamushqa. 21Tamya tiempu manaraq chämushqanyaq imëkatapis jaqirir shamïkï. Eubulo, Pudente, Lino, Claudia y wakin wawqikuna y panikunapis napayäshunkim.
22Señornintsik Jesucristo imachöpis yanapëkulläshï. Tsënölla tsëchö këkaqkunata llapëkita ankupëkulläyäshï. [Tsënö katsun.]
Currently Selected:
2 Timoteo 4: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.