RUCI 3
3
Sa Kunea na Watina o Ruci
1A sa kaya vei Ruci o Neomai, “Na luvequ, au sa na vakasaqara e dua na watimu me vakavaletaki iko ka mo tiko vinaka kina. 2Mo nanuma tiko ni wekadatou dina o Poasa na turaga ka taukeni ira na goneyalewa o cakacaka vata tiko kei ira. Ena qaqi barile tiko o koya ena yakavi edaidai. 3Mo sisili mada, lumulumu vinaka, tokara na nomu i sulu digitaki, ka lako ki na nona rara ni samu witi, mo kakua sara ni vakatakilai iko vua me yacova ni sa kana ka gunu oti. 4Ia ni sa koto sobu me moce, mo raica na vanua e davo kina; mo qai la'ki cega na i tutuvi e yavana ka koto sobu e kea. Ena qai kaya vei iko o koya na ka mo cakava.”
5Sa qai sauma o Ruci ka kaya, “Au sa na vakayacora kece na veika o kaya vei au.”
6A sa lako yani ki na rara ni samu witi o Ruci, ka la'ki vakayacora na veika kece sa vakarota vua na vugona. 7Ia ni a kana ka gunu oti o Poasa, a mamarau sara na yalona, ka la'ki moce ena yasa ni binibini witi. A qai curu vakamalua yani o Ruci, cega na i tutuvi e yavana, ka davo sobu. 8Ena lomaloma ni bogi, e qai yadra cake vakasauri o Poasa me vuki, ka kurabui ni raica ni a koto e yavana e dua na yalewa. 9A taroga sara o koya ka kaya, “O cei o iko?”
A sauma o koya ka kaya, “Oi au o Ruci na nomuni vada. Me vaka ni daru veiwekani voleka, sa nomuni tavi mo ni qaravi au, ka mo ni tauri au me'u watimuni.”
10A sa kaya o koya, “Noqu lewa, me vakalougatataki iko ko Jiova. O sa vakaraitaka ni levu cake na nomu yalodina ki na nodatou matavuvale ena nomu vakayacora na ka oqo, ka lailai cake mai na kena o a vakayacora vua na vugomu; me vaka ni o sega ni lakovi ira na cauravou, era vutuniyau, se ra dravudravua. 11Mo kakua ni rere noqu lewa; ni ra sa kila kece na tamata mai na koro ni o sa yalewa vinaka. Au sa na vakayacora na veika kece o kaya. 12Sa dina ni'u sa wekamu dina, sa noqu i tavi talega me'u maroroi iko; ia e tiko tale e dua na wekamu sa voleka cake mai vei au.#Ruci 2.20 13Mo tiko mada e ke ena vo ni bogi oqo, ka me qai kilai ni mataka se sa na rawa ni qaravi iko na wekamu voleka o ya se sega, ia kevaka e vaka kina, sa daumaka; ia ke mani sega, au sa na bubuluitaka ena mata i Jiova na Kalou bula ni sa noqu i tavi me'u qaravi iko: ia mo tei moce tale mada.”
14A mani koto sobu yani e yavana o Ruci ka moce me yacova na mataka, ia sa yadra cake ga ni se buto tu ga na vanua, baleta ni sega ni vinakata o Poasa me dua e kila ni sa tiko e kea o koya. 15A sa qai kaya vua o Poasa, “Kauta mai na i sulu o a tutuvi kina ka tevuka e mataqu.” A vakayacora vakakina o Ruci, ka sova yani kina o Poasa e volekata e 20 na kilokaramu na barile, a sa qai vukei koya me colata yani e tabana. A sa lesu tale ki na koro o koya kei na ka oqo. 16Ia ni yaco yani, a sa tarogi koya sara mai o na vugona, “Sa mani vakaevei na nomu i lakolako, na vugoqu?”
A sa tukuna vua o Ruci na veika kece sara a vakayacora vua o Poasa. 17A sa kaya tale, “E a solia talega vei au o koya na i binibini barile taucoko oqo, me vaka ni a kaya vei au me'u kakua ni lesu lala vua na vugoqu.”
18A sa kaya vua o Neomai, “I Ruci, mo vosota tale mada vakalailai, me yacova sara na i tinitini ni veika kece oqo; ni na sega ni yalo vakacegu o Poasa me yacova ni sa vakayacora na lomana ena siga edaidai.”
Currently Selected:
RUCI 3: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.