RUCI 2
2
Cakacaka o Ruci ena i Teitei nei Poasa
1A sa dua tiko na weka i Neomai na yacana o Poasa; a sa tamata vutuniyau sara ka semati ki na matavuvale nei watina o Ilimeleki. 2Ena dua na siga, a sa kaya vei Neomai o Ruci, “Yalovinaka me'u lako mada ki na veiloga ni teitei, ka me'u la'ki vakatomika mada na sila era biuta tu mai na dautatamusuki. Au nuitaka ni'u na sotava e dua me vakacakacakataki au.”#Vsoro 19.9-10; Vrua 24.19
A sa kaya o Neomai, “Io mo lako ga, na luvequ.”
3A sa lako yani o Ruci ki na veiteitei ka muri ira voli na dautatamusuki, ka vakatomika na sila era biuta tu mai. A sega sara ni kila ni sa cakacaka voli tiko oqo ena veiteitei nei Poasa, o koya ka rau vuvale vata kei Ilimeleki.
4Ena dua na gauna e muri, a sa qai lako mai Peceliema o Poasa, ka kaya vei ira na nona tamata cakacaka, “Me tiko vata kei kemuni ko Jiova!”
Era a qai sauma ka kaya, “Me vakalougatataki kemuni ko Jiova!”
5A sa qai vosa o Poasa vua na i liuliu ni nona tamata cakacaka, ka taroga, “O cei ga na goneyalewa o ya?”
6A sa sauma na nodra i liuliu na dautatamusuki ka kaya, “Na goneyalewa o ya na kai Moapi, ka rau a lako vata mai kei Neomai mai Moapi. 7A mai kerea vei au me la'ki vakamuri ira voli na dautatamusuki ka me dau vakatomika na sila era biu mai. E se cakacaka tiko mai o koya me tekivu mai na mataka lailai ka se qai cegu sara ga oqo me la'ki vakaruru mada.”
8A qai kaya vei Ruci o Poasa, “Yalovinaka me'u vakasalataki iko mada. Mo kakua tale ni la'ki tomitomi ena duatani tale na i teitei, ia mo tiko vakadua ga eke. Mo cakacaka voli ga kei ira na noqu goneyalewa eke; 9ka vakaraica matua tikoga na i teitei era sa tatamusuki kina, ka vakamuri ira voli ga. Au sa vakaroti ira na noqu tamata me kakua ni dua vei ira me vakasagai iko. Kevaka o sa viagunu, mo la'ki gunu mai na saqa ka ra sa takiva oti mai na cauravou.”
10A vakacuvara sobu na uluna ki na qele o Ruci ka kaya vei Poasa, “A cava na vuna o ni sa rui lomani au kina ka kauwaitaki au vakalevu kina me vakaoqo, ni'u sa yalewa ni vanua tani?”
11A sauma o Poasa ka kaya, “Sa tukuni oti vei au na ka kece o a vakayacora vua na vugomu ena gauna sa mate kina na watimu; na nomu biuti rau na tamamu kei na tinamu kei na nomu biuta na vanua o a sucu kina, ka lako mai mo bula ena kedra maliwa na tamata o sega mada ni kilai ira e liu. 12Me qai sauma vei iko ko Jiova na nomu caka vinaka. Me qai sauma vakavinaka sara vei iko ko Jiova na Kalou i Isireli; o koya o sa mai vakarurugi kina oqo ena ruku ni tabana.”
13A qai kaya vua o Ruci, “O ni sa rui yalovinaka noqu turaga. Me'u kune loloma tikoga e matamuni. Sa veivakacegui dina na i tautau ni nomuni vosa vei au, ka dina ga ni'u sega ni dua vei ira na nomuni dauveiqaravi.”
14Ena gauna ni kana, a sa kaya vei Ruci o Poasa, “Lako mai me dua vei iko na tiki ni madrai, ka tonia ki na i saluwaki ni kakana.” A sa dabe o koya e tikidra na tamata cakacaka, ka solia yani vua o Poasa na i buli madrai tavu. A sa kana o Ruci me yacova ni sa mamau, ka la'ki vo tale na kena kakana. 15Ia ni sa tucake o koya me tomi sila tale, a sa vakaroti ira na nona tamata o Poasa, ka kaya, “Dou laivi koya me tomi sila ena maliwa ni veivau sila, ka kakua ni tarovi koya. 16Mo dou ucuna talega eso mai na veivau sila, ka vakalutuma me tomika o koya, ka mo dou kakua ni cudruvi koya.”
17A sa tomana na nona tomi sila ena i teitei o Ruci me yacova sara na yakavi. A sa samuta talega na veika sa tomika rawa, ka sa volekata na 10 na kilokaramu na kena bibi. 18A sa kauta lesu na sila ki na koro me vakaraitaka vua na vugona na levu ni ka e sa kumuna rawa. A sa solia talega vua na veika sa vo mai na kena kakana ni sa vakamamautaki oti. 19Sa tarogi koya o Neomai, “O sa kumuna mai vei na veika kece oqo? Na i teitei i cei o cakacaka voli kina? Me vakalougatataka na Kalou na tagane sa kauwaitaki iko tiko oqo!”
A sa tukuna vei Neomai o Ruci ni a cakacaka voli ena nona i teitei e dua na tamata e yacana o Poasa.
20A qai kaya vakaoqo o Neomai, “Me vakalougatataki Poasa ko Jiova! Sa dau maroroya na nona vosa ni yalayala ko Jiova vei ira sa bula kei ira sa mate.” A sa kaya tale vua o Neomai, “Na tamata oqori e wekadatou tiko, e dua sara ga vei ira na tiki ni yagodatou voleka.”#Vsoro 25.25
21A qai kaya vua o Ruci, “E tukuna talega vei au o Poasa me'u cakacaka vata tiko kei ira na nona tamata me yacova sara ni sa cava na musuki witi.”
22A sa kaya o Neomai vei Ruci, “Sa donu na luvequ, e vinaka oqori mo cakacaka tikoga kei ira na goneyalewa i Poasa ena nona i teitei. Ena rawa ni vakasagai iko e dua na tamata kevaka o lakova e duatani tale na i teitei.” 23A mani mai cakacaka tiko yani o Ruci kei ira na tamata nei Poasa, ka tomi sila tiko me yacova ni sa cava na kena tamusuki tiko na barile kei na witi. Ia ena gauna kece o ya, a sa bula voli ga kei na vugona.
Currently Selected:
RUCI 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.