APAKUKI 2
2
Na Vosa i Jiova ki na Vakatarotaro i Apakuki
1Au na lako cake ki na noqu vale cere-i-cake ni yadra, ka'u na waraka mai kina me'u rogoca na ka ena tukuna vei au ko Jiova kei na i sau ni noqu vosa kudrukudru ni rarawa au a tusanaka vua.
2Oqo na kena i sau sa tukuna vei au ko Jiova: “Mo vola ena vatu ni volavola na ka au sa vakaraitaka oqo vei iko, me matata ka rawarawa na kena wiliki. 3#Ipe 10.37Mo vola na i tukutuku me tu vakaivola baleta ni oqo e se sega ni gauna me yaco kina na ka oqo. Ia sa totolo tiko na lako ni gauna, ka'u na vakaraitaka vei iko ni na yaco dina sara na veika au sa tukuna oqo vei iko. A kena i rairai beka ni na berabera na kena yaco mai, ia mo waraka ga; ena qai yaco dina ga ena gauna au sa lokuca, ena sega ni lokuyarataki tale. 4#Roma 1.17; Kala 3.11; Ipe 10.38Oqo na i tukutuku: ‘O ira na tamata ca era na sega ni vakabulai. Ia o ira na yalododonu era na bula ena vuku ni nodra vakabauta.’ ”
Na Veivakarusai vei Ira na Tawadodonu
5Sa dau veivakacalai na i yau. O ira na tamata kocokoco era tamata dokadoka ka ra sega ni tiko dei - me vakataki mate, era sa sega ni dau mamau rawa. O ya na vu ni nodra dau la'ki valuti ira tiko na veivanua tale eso me baleti ira ga. 6O ira na rawai ena i valu era na qai rukaki ira era rawai ira ka vakaraitaka votu sara na nodra beci ira. Era na kaya vakaoqo, “O ni dau taura na ka e sega ni nomuni, ia oqo e sa oti vei kemuni! Me vakacava soti na dede ni nomuni vakavutuniyautaki kemuni tiko ena nomuni dau vakaukauwataki ira era dinau i lavo tu vei kemuni me ra sausaumi yani? 7Ia ena bera na nomuni kila, oi kemuni o ni dau rawai ira na tani, o ni sa na dinau tale tu ka o ni sa na vakasaurarataki tale mo ni sauma na tubu ni nomuni dinau. Era na lako mai na meca ka ra na vakasautanininitaki kemuni. Era na taura vakaukauwa na nomuni yau! 8Oi kemuni o ni a sa tauri ka vakaukauwa mai vei ira na lewe ni veivanua, o ira era a vo tu ka ra sega ni kau vakavesu era na taura na nomuni yau baleta na nomuni daulaba kei na vakayaco i tovo kaukauwa ena veivanua e vuravura kei na kena veikoro lelevu.
9O sa kalouca o iko! O sa la'ki vakavutuniyautaka na nomu vuvale ena veika o sa rawata mai ena i valavala kaukauwa, ka o sa tovolea talega mo vakabula na nomu vuvale mai na veika ca ka rerevaki! 10Na veika o a nakita ka vakayacora sa kauta ga mai na madua ki na nomu vuvale. Ena vuku ni nomu vakarusa e vuqa na veivanua, o sa kauta talega mai vei iko na rusa. 11O ira mada ga na veivatu ni lalaga era na kacivaki iko mai, io ena voqa talega mai na nodra tagi na i sa ni vale.
12O ni na vakaleqai vakaca sara oi kemuni! O ni a tauyavutaka e dua na koro levu ena caka ca, ka tara cake na koro ena nomuni daulaba. 13Era sa vakaocai ira wale ga ena cakacaka e sega na betena o ira na lewe ni veivanua o ni a vakamalumalumutaka ena i valu, ka ni veika kece sara ga era sa bau tara cake rawa sa qeyavu tale ena kama. Oqo na cakacaka ni Kalou Levu. 14#Aisea 11.9Ia ena sinai o vuravura ena kila-ka me baleta na lagilagi i Jiova, me vaka sa ubia na wasa titobu na wai.
15O ni sa vakaleqai! Ena nomuni cudru kaukauwa, o ni sa vakavelavelataki ira ka vakamaduataki ira kina na matanitu era tu veivolekati kei kemuni; O ni a vakavuna me ra taceba me vaka ga era sa mateni. 16E muri, o kemuni talega o ni na qai luvuci ena madua me i sosomi ni nomuni dokai. O kemuni talega o ni na gunu ka taceba. Ena vakayacora ko Jiova mo ni vagunuva na memuni bilo ni veivakatotogitaki, ena qai vuki na nomuni dokai me madua. 17O ni a musu kau ena veikau mai Lepanoni; ia oqo, o ni sa na tamusuki sobu. O ni a vakamatei ira na manumanu ni vanua o ya, ia oqo, era sa na i vakarere vei kemuni o ira na manumanu. Ena yaco na ka oqo me baleta na laba o ni a vakayacora kei na i tovo kaukauwa o ni a cakava vei ira na lewe ni veivanua e vuravura kei na kena veikoro lelevu.
18A cava na yaga ni matakau? Oqo e dua ga na ka sa bulia na tamata, a sa sega ni tukuna vei kemuni e dua na ka, ia na veika lasu ga. A vinaka cava e rawa ni solia vei koya e bulia me vakanuinui kina — e dua na kalou sa sega tu mada ga ni vosa rawa! 19O ni sa vakarusai! O ni sa kaya ki na dua na tiki ni kau, “Mo yadra mai!” se ki na dua na i bulibuli vatu, “Mo tucake!” E rawata beka e dua na matakau me vakatakila vei iko e dua na ka? Raica, sa rawa ni robota tu na i ukuuku siliva kei na koula, ia na bula ga sa sega sara ni tiko kina. 20Sa tiko ena nona vale tabu ko Jiova; me vakanomodi e matana na veika kecega e vuravura.
Currently Selected:
APAKUKI 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.