EFESO 6
6
O Ira na Gone kei Ira na i Tubutubu
1 #
Kolo 3.20
Kemuni na gone, mo ni talairawarawa vei ira na nomuni i tubutubu ena ka sa vinaka vua na Turaga, ni sa ka dodonu oqo mo ni cakava. 2#Lako 20.12; Vrua 5.16“Vakarokorokotaki rau na tamamu kei na tinamu.” Sa i koya oqo na i matai ni vunau sa dua kina na vosa ni yalayala: 3“mo vinaka kina, ka bula balavu kina ena dela i vuravura.”
4 #
Kolo 3.21
Kemuni na i tubutubu, ni kakua ni dau vakacudrui ira na luvemuni ia mo ni dau vakavulici ira ga ena i vakarau kei na i vakavuvuli ni Turaga.
O Ira na Bobula kei Ira na Nodra Turaga
5 #
Kolo 3.22-25
Oi kemuni na bobula, ni talairawarawa vei ira na nomuni turaga vakayago ena rere kei na sautaninini, ni talairawarawa ena lomadina me vaka o ni sa vakayacora tiko vei Karisito. 6Ni kakua ni makutu ga ni ra rai tu, me ra vinakati kemuni kina. Ia me vaka o ni sa tamata nei Karisito, ni cakava na loma ni Kalou ena yalomuni taucoko. 7Ni qarava na nomuni i tavi ena loma vinaka me vaka o ni cakava vua na Turaga, ka sega ni vei ira walega na tamata; 8ni o ni sa kila tiko ni ka vinaka kece e cakava na tamata yadua, se bobula se tamata galala, ena saumi vakakina mai vua na Turaga.
9 #
Kolo 4.1;
Vrua 10.17; Kolo 3.25 Kemuni talega na nodra turaga na bobula, ni cakava vakakina vei ira na nomuni bobula, ka kakua ni dau vakarerei ira. Ni o ni sa kila sa tiko mai lomalagi na nomuni Turaga, o koya sa nodra Turaga talega, ka sa sega ni dauveivakaduiduitaki o koya.
Na i Yaragi Taucoko ni Kalou
10Me'u tinia, mo ni kaukauwa tiko ena vuku ni Turaga kei na nona kaukauwa mana. 11Mo ni vakaiyaragi ena i yaragi kecega ni Kalou me rawa ni o ni tudei kina ka vorata na i lawaki ni tevoro. 12Ni da sa sega ni veivala kei ira na tamata, ia eda sa veivala ga kei ira na veiyalo velavela ena veiyasana vakalomalagi, kei ira era sa veiliutaki vakatani, kei ira sa vakataulewa cala, kei na kaukauwa eso ni vuravura butobuto oqo. 13O koya oqo mo ni daramaka kina na i yaragi kecega ni Kalou! O ni na qai vorata rawa kina na sasaga ni meca ni sa yaco mai na siga ca; ia ni sa oti na nomuni veivorati, mo ni tudei tikoga.
14 #
Aisea 11.5;
Aisea 59.17
O koya mo ni qai tu vakarau kina, ni sa vauci na lomadina me beleti ni tolomuni, ka i tataqomaki ni lomaseremuni na i valavala dodonu, 15#Aisea 52.7ka i vava me daramaki ki na yavamuni na yalo sa vakarau tu me dau kacivaka na i Tukutuku Vinaka ni veivinakati. 16Ena veigauna taucoko sara, mo ni taura na vakabauta me i sasabai, ka ni oqo ena sabaya laivi ka bokoca na gasau kama kecega ni tevoro. 17#Aisea 59.17Ni ciqoma na veivakabulai ni Turaga me i vakaruru ni ulu, kei na vosa ni Kalou me i seleiwau sa solia vei kemuni na Yalo Tabu. 18Mo ni masu tikoga ena veimataqali masumasu kece sara kei na daukerekere ena Yalo Tabu. Ena ka oqo, mo ni yadrava tiko kina na kena gumatuataki na nodra dau masulaki na tamata ni Kalou kecega. 19Ni masulaki au talega me dau soli vei au na vosa ni'u dau vakarau me'u vosa, me'u vunautaka kina vakadodonu na ka vuni ni tukutuku vinaka. 20Ena vuku ni kosipeli, au sa kena mata oi au, ka dina ga ni'u sa vesu tu. Ni masulaka me'u na vunautaka vakadoudou na kosipeli me vaka ni sa dodonu ga me vakakina.
Tini ena Loloma
21 #
Caka 20.4; 2Timo 4.12 #Kolo 4.7,8O ni na via kila talega na ka e baleti au kei na ka au cakava tiko; ia ena tukuna na ka kecega vei kemuni o Tikiko na wekaqu lomani ka i talai yalodina ni Turaga. 22Au sa talai koya yani vei kemuni ena ka oqo mo ni kila kina na ka e baleti keitou, ka me vakayaloqaqataki kemuni o koya.
23Me tikoga vei kemuni na veiwekani na vakacegu, na loloma kei na vakabauta mai vua na Kalou o Tamada kei na Turaga ko Jisu Karisito. 24Me tikoga na loloma vei kemuni kece o ni lomana na Turaga ko Jisu Karisito ena loloma e sega ni mate rawa.
Currently Selected:
EFESO 6: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.